bulak sa utot-utot

wala nako kutloa ang bulak
sa utot-utot
og sumala sa pamalaod sa
mga gisalikway
mibuswak ang bulak sa
utot-utot og mibugwak
kini sa iyang kabaho
kadtong gihunahuna niya
nga makamatay kanako


apan sayop siya

kay ang dalan paingon sa
mga puti og pula nga mga rosas
halapad og ang
kahumot niini misuot sa ilong og
baba sa akong kasingkasing

mikatag ang katahom
miatak ang gugma
wala mapasgang ang kaanindot
sa kinabuhi
wala niya mapugngi
ang pag-abot
sa pagtubo sa mga dahon
sa paglaom

bisan kanus-a ang bulak sa
utot-utot
dili makatagamtam nianang
haguros sa kusog nga hangin
gikan sa akong
mga pangagho

aduna siya'y katungod sa iyang
pagkalaksot
og tungod kaniya
sa iyang kabaho og pagkamaot
ang katahom og ang kahomot
sa mga rosas
hinonoa, misamot
hinonoa, nanuotsuot