sa imong pagpalong sa usa ka suga

sa imong pagpalong sa usa ka suga
magpabilin baya
ang baho sa aso sa usa ka kandila

anaa ang puti nga aso
mitapot sa sidsid sa imong sinina

ang pagpalong mamahimong usa
lamang ka pagpaundang
apan adunay gahom ang pagpadayon
kini mokaylap sama sa usa
ka tinta
diha sa tin-aw kaayo nga tubig
kini mokuyanap modagan
sama sa usa ka mantika diha sa usa
ka limpyo kaayo nga papel


kini managhan sama sa akong mga balak

sama sa mga pito pito diha sa mga sapa og mga kanal
sa mga syudad
sama sa mga itlog sa ok-ok diha
sa kilid sa imong aparador
sama sa mga ulod nga migimok
diha sa usa ka patay
nga iro nga naglutaw kuyog
sa sulog sa usa ka baha

dili mo ako mapatay
mamahimo mo akong palongon

mamahimo nimo akong palongon
apan dili mo ako mamahimong patyon

mas mohait ako
sama sa usa ka binaid nga sundang

sama sa pagdaghan sa akong mga balak
sama sa pagkiblat sa akong mga bitoon