usahay matsalens ta ginagmay

(experimento sa pagpamalak)

kon ligdong ang imong pagkatawo,
apan bisan dili
apan gusto nimong ilhon ka nga usa ka ligdong,
palihog ayaw na lang og basa,
kay dili kini alang kanimo.

basin pagkahuman moingon ka nga
this is outrageous!
bastos!)


usahay matsalenz sab ta
ginagmay
kon ang atong mga galay
giibot lang og gilabay
paghuman nato og pili
sa mga pulong paghuman
nato og gasto sa mga
pagbati kana bang
wala na gani ka kasabot
kon unsa ba gayod
ang blagblag sa imong
dughan kanang
miul-ol ang imong
bukton og inaswat sa
usa ka bug-at kaayong gugma
og sa tibook gabii naglit-ad
lit-ad ka kay imong gisapnay
ang iyang hulagway diha sa mga
tudlo sa imong utok apil na ang
mga pagkitiwkitiw sa
mga ugat sa imong kasingkasing

nagtapad mo og gusto nimong
sultian siya sa mga pulong nga
i love you
apan naunsa ba nga ikaw mora
na lang man og usa ka

ays drap nga kalit lang nahilis
og ang nabilin mao na lang ang istik
naglaway ka
gusto nimong tukbon ang iyang
ngabil og kini imong supasupaon
nga morag ugat sa kiting sa
baka
apan wala ka kaako kay unya
og mahisama ka sa usa ka
tulay nga kalit lang nga naputol
og nahugno sa tunga-tunga sa dako
kaayong suba nga

mibaha og mianod sa daghan
kaayong mga batang, mga dahon,
mga sanga,

mga patay
nga pagbati nga imong gituok
kay lagi

gusto nimong magpadayon isip
usa ka tawo nga ligdong
sa usa ka pag-aron-aron
diha sa usa ka tango
sa hipokrisya

sus ginoo ko
kon makita lamang nila ang ugdo
sa imong purol

makaingon gyod sila nga
ikaw dili diay halangdon
nga ikaw diay dili lig-on
nga ikaw dili diay tinood nga isdang til-ogon
nga ikaw diay usa ka
karne sa kabaw
nga makabughat sa usa ka babayeng
bag-ong nanganak

usahay matsalenz ko ginagmay
daghang mga hunahuna nga ako kini
ako kana
nga ako usa ka panapton nga puti
kaayo nga walay buling bisan na
lang og anino sa usa ka kugmo
o kuyamad nga napusa
diha sa ilalom sa akong uban

mopili ko
sa usa ka kinabuhing baboy nga malipayong
nagligad-ligad sa lapok

gusto nako, apan tagai ako og igong panahon,
basin ugma
kanang wala na gayod ako'y ugam
nga mokitkit sa imong
intil.