nakatawa ko

nakatawa ko
nga ikaw misulay og sunod sa akong mga tunob
morag dakong ulog-ulog
nga ikaw mosundog kanako
mora bag ako usab segurado na gayod sa akong padulngan
nga kon sa pagkatinood lang
sa matag gabii
nangalap usab ako sa akong sunod nga padulngan
apan lahi sab ka
kay bisan pa sa akong dakong katawa
og sa akong pagsulti nimo nga basin moabot na ang akong gikahadlokan
nga mangawala tang duha
mora man og walay kalisang ang nakita sa imong mga mata
mora man og wala ka madutli sa akong mga panghadlok
sa akong mga kamatooran

miingon ka nga otro ka usab nga walay kapaingnan
og gusto mo nga kon mawala ka
bahala na
basta kuyog lang gyod tang duha
bisan og asa

og nianang parteha
miundang ang akong katawa
kay morag lahi ra
og akong gihawiran ang imong kamot
og akong gipakita kanimo ang akong mga tunob
akong gipapas
og ako kang gisenyasan
ko asa ang atong sunod nga agianan