medusa

i

ayaw palabi diha sa imong kasuko
naghisgot ka man god
nga ako imong himoong bato sa imong mga tutok lamang

nadungog ko kana sa imong mga buhok nga halas
ayaw pagpalabi diha nianang
kasuko
kay ang kasuko walay lamian nga bunga
dili tam-is ang iyang duga
sakit kini sa atong dila

ii


kay ako usa ka sapa og ang sapa usa ka salamin
og ang salamin motan-aw usab kanimo
motutok sa imong tutok
og unya

sayod ka nga ang imong makita mosombalik diha
kanimo sama sa usa ka lanog
mosabat sa imong sambat

og ikaw sama sa nahitabo sa karaang mito
hibaw-i, timan-i

mamahimo kang bato.