fireworks, 7:30 pm, disneyland

atong gipaabot kini
ang usa ka pantasya
sa mga bulok, sa kahayag,
sa pagkapalong
og pagboto,

nakita nato og kitang tanan
nangahilom samtang naghangad
sa langit

pagkaanindot gayod
dili nako masugid kanimo
ang akong gibati

kining pag-usob-usob sa mga
bulok sa kahayag
kalit nga pag-ulbo sa
mga bitoon og ang
pagdagan-dagan sa ilang mga
ikog gukod sa ilang mga
ulo

minganga kitang tanan
sa usa ka
kahingangha

wala ko katingog
kalit lang mihugot ang akong
mga panit

sa hamubong panahon
lamang gibati ko ang mga pako
sa akong mga kamot og mga tiil

misandig ka kanako
gibayaw tang duha kuyog sa mga pako sa pantasya
mitiglom kita sa kalit nga pagpalong
sa mga bulok sa iyang kahayag

dili baya gayod lalim ang
kalipay nga kadyot lang
nga gusto pa unta natong hawiran
apan sama sa usa ka hangin
midahilos kini sa atong
mga tudlo

og dayon nawala