gamay ra kaayo ang atong kalibotan
og nagluko ka sulod
sa akong mga bukton
bugnaw ang hangin
og mikupo ka sa imong
gamay nga kainit
diri sa akong kiliran
adunay nag-away nga duha
ka huna-huna sulod sa akong
dughan
ang sakit nga kamatooran
gustong manugid sa nahitabo kaniya
apan dunay milingo-lingo
kuyog sa senyas sa iyang tudlo
misitsit sa usa ka
ayaw, ayaw palihog
morag miingon
dili pa kini panahon sa usa ka pagsudya
lalom pa og dulot ang punyal
sa kasakit
tagamtama una ang sinukad sa mga kamot
sa kalipay
diha sa lamesa sa
duha mo ka palad
init pa ang sabaw
og atong gihigop ang
kananam
sultihan ko na unta ikaw sa pasalig
sa kamatooran og sa
pagpili nianang dili pagpasakit,
mipili ko, samtang nagtan-aw sa tag-as
kaayong
nagpaturatoy nga mga
puluy-anan sa mga pikot didto sa hongkong,
bisan unsaon nakog sumada
milugdang gihapon ang pagpalit nako
sa mga bakak
gitago ko ang mga sukli sa kamatooran
diri sa akong bulsa
dili pa panahon
gipili ko ang sayaw sa lingla
nalipay ko sa awit sa usa ka pahiyom gikan
sa imong nagbasa nga mga ngabil
No comments:
Post a Comment