ang kabugnaw og kahumok sa alugnan
nagpasalig sa usa ka katulogon kanako
unta, apan
tapad kanimo, wala gihapon kana mahitabo,
kay ang akong gibating pagkahulog sa lalom kaayong
pangpang nagpabilin lang gihapon, og aron dili mabalaka
ang imong kasingkasing
gipiyong ko ang akong mata
diha nianang pagpadailos
og wala ako makahawid sa usa ka pagtoo
nga unta, mawala na ang tanan
nianing hawanan sa pagkalaglag
ngadto ako paingon sa lalom kaayo
nga buho
og gikan sa 12th floor
ang akong mga paghandom
mitulilik gihapon
mora ba'g walay pulos ang akong mga kamot
kay wala kini sila'y gahom sa paghawid aron unta
ako masab-it sa usa ka pagsalig
diha kanimo
halayo pa ang akong paingnan
lalom pa kini kaayo
ngitngit
bugnaw
bisag ablihan ko sa makadyot ang akong mga mata
wala ako'y nakitang
padulngan,
usa ako ka bato nga naglutaw
diha sa kawanangan
usa ako ka planeta nga wala pa'y ngalan
gustong motiglom unta
sa kawanangan,
apan wala may salog ang akong gitumban
walay hawiranan
ngitngit bugnaw
lalom walay lugdangan
usa ako ka baroto nga walay
nakitang pantalan
No comments:
Post a Comment