mY secreT ponD

hilig nako ang
paghawid sa plato nga porselana
kadtong mahalon
unya kalit nako kining ilabay sa
nag-atubang kanako

kabalo kong di jud mabuak ang maong plato
kay kadtong tawong nakalitan
nga sa kahadlok nga mabuak ang mahalon
molupad gayod ang ispiritu
aron lang pagsalo niini,

mao ra gihapon ang akong gibuhat
sa usa ka puti ug bag-ong itlog sa manok
nga akong kalit usab
gilabay diha nimo

ingon ka, bahala ka,
apan, unsang hitaboa, nganong gisalo man nimo?

tuod man,
wa gyod mabuak ang maong itlog
bisan ug
kini baratohon lamang

ang tawo hadlok gayod
sa tingog sa nabuak
sa mga nangabuak ug sa atong gihunahuna
nga kon wala kitay
buhaton
mangabuak lang gayod
lamang ug unya malitok nato ang pulong nga

"sayang!"