mY secreT ponD

MGA OBSERBASYON KABAHIN SA BALAY SA MORALIDAD

i

sa dakong balay sa
Moralidad
ang gwardya usahay
Iro.

ii

diha sa kilid sa
pultahan sa dakong
balay nga bato
nga ginganlag Moralidad
anaa ang
gabantay,
itom nga iro

iii

ang itom nga iro nga ipok
nga naglingkod tupad sa dakong balay
sa Kunuhay Kalimpyo ug
Kaligdong

nagbantay.

iv

ang balay sa Moralidad abri ang pultahan
ang iyang bintana dako
ang iyang pultahan mas labaw nga dako
unya ang iyang bongbong
bato
unya ang gabantay mao kining iro nga itomon

pataka lang ug paghot

v

didto sa balay nga bato nga gimarkahan ug
Moralidad
misulod ang tulo ka tawo

ang usa napaakan sa iro nga itom
ang usa iyang amigo ug ang iyang ikog mikiwil
ang usa mituntong sa ibabaw sa lamesa
haskang hadloka

ang iro nga itom nagtangag sa dakong bukog sa baka
nga gihatag sa tawong pution

puyok.