mY secreT ponD

karon ipatukar ko na
ang akong gipili nga musika

hapon na baya
unya ang adlaw mamatay na usab

ning kamatayon nga
walay nobena ug walay pagkawkarenta

ning kamatayon nga
matag-adlaw nga walay magtugaw

ni mag-iyak ni magbakho
ning kamatayon nga ikaw lang ang nasayod

kay kon imong ipanugid
yam-iran ka lamang

ug ingnon nga "paghilom diha?
naunsa ka ba? kinsa ba ang namatay?"

ug busa mahilom ka
ug sa imong kahiubos mamati ka

sa gipili mong musika
sa imong matag-adlaw nga kamatayon

sa ilang pagkawaykabana
sa ilang pagkabuta, pagkaamang, pagkapiang

sa imong nakita nga
ambot lang kaha ug ila ba kining nabati?