GIKAPOY

gikapoy iyang mama
ug pananom sa mga african daisies
sa miaging bulan

kay wala lagi siya kuyoga sa
paglubong sa ilang silingan nga
namatay
haskang sukoa sa malditong
bata

gikapoy ang bata ug pangibot
sa african daisies
nga iyang gilabay ngadto
sa karsadang batoon

gikapoy ug bunal sa sanga
sa bayabas ang iyang mama
sa bitiis sa maong bata

gikapoy ang iyang papaog
ug lantaw og pamati sa kahilom sa maong
bata nga bisan giunsa og latos
igo lang kining mitutok lapos sa
bintana paingon sa kawanangan

wala'y luha, wala'y shagit
apan sa sulod sa iyang dughan
atoa ang pagdumot nga mas
dako pa sa kalibotan....