Sunday, January 12, 2014

ang kahadlok
mao ang nawong likod sa gugma

ang kahadlok usab kuno ang sinugdanan
sa kaalam

kon mahadlok ka unsa ba ang imong buhaton?
mibukot kas habol?
mikaratil kag dagan?

o wa kang kalihok
wa ka katingog
misiga ang imong mga mata

o kadtong nakuyapan ka
unya gipukaw ka
dayon nangutana ka ug
ngano? naunsa diay ko?

kadtong midagan ka, o mibukot kas habol
o nasiga ang imong mga mata
o nakuyapan ka,

milalom ba ang imong kaalam?

nakat-onan mo ba ang paghigugma
sa imong gikahadlokan?

sa laing bahin,
unsa ba god kining atong gikahadlokan?

nahadlok ka ba sa Diyos?
nahadlok ka ba sa imong dangaan ugma?

hadlok ka bang mamatay
unya maimpyerno?

o nahadlok
sa wa pa nimo masayri?

nangutana lang ko
gitubag ko na kini sa akong kaugalingon

ikaw sab,
tubaga.

No comments: