BALAK ALANG SA DATO NGA AMO NI MELANIA
NGANO ba
nga ang kaguol sa imong katabang
gihimo mo mang
mga dwende?
gipataya ng iyang bana
ug wala ang hustisya
wala katilaw ang iyang anak nga dalaga
ug pag-eskwela
ug ang iyang anak nga lalaki
nagpaulipon sa layong lugar
ang ilang pasko usa lamang ka kilong bugas
ug tulo ka bulad nga palotpot
unsa ba ang imong kaguol?
nga wala kauli ang imong abogada gikan sa america
kay nawili sa iyang uyab
nakansel ang flight agi sa snowstorm
unya ang imong bana usa na lang ka milyon ang bonus
sa corporasyon nga iyang gitrabahoan
unya ikaw
wala mapalit ang gikahinaman nga dyamante
alang sa imong dughan ug dalunggan
ug tudlong taas ug pution
nag-iyak kag duha ka gabii
naghubog
unya ang imong katabang nga wa dayon
mitunol sa bugna nga tubig
giayo nimog binaboy ug kasaba
Pagkadako gayod sa imong kaguol
Pagkawala gayod nimoy puangod.
No comments:
Post a Comment