gipangitaan ko niyag
balak nga morag barbekyung manok
nga makabusog
ingon ko wa ko ana
nangutana siya kon naa ba koy balak
nga morag lumay aron madani ang babayeng
way gana niya
ingon ko wa ko ana
kadtong balak nga bahal nga iyang imnon
aron mahubog siya ug magpataka na lang dayon ug
iyak ug katawa, ug sayaw bisag walay
unsa ba diay kining balak nga naa nako?
ah, dili ni ako. Hinatag lang. Gihunghong lang.
Ulipon lang ko.
Tigsulti lang.
Tighatod.
Mahimo gani nga wa koy labot aning tanan.
Apan kay ako ang mibungat
Pwes ako lang pod nga tindugan.
Ang ania kanako mao kadtong nakailad
sa tawong gustong magpakamatay
moambak na unta sa kinahabogan nga
ang-ang sa balay
apan duna koy gisulti nga nalinga siya
minaog, milingkod, dayon namati siya
ug dayong miingon siya, naunsa man diay
to? nganong mikatkat man ko?
mora bag gimino, unya aron makabalik sa
iyang kaugalingon
iyang gibali ang iyang sinina
ug dayog lakaw balik sa
ila.
No comments:
Post a Comment