Wednesday, January 8, 2014

abi mo
kapoy baya pod nang
kita kita ra ang
ga kita kita

balikan napod nato
ang mga samad
kaniadtong mga pipila na
katuig nga gialim
na man unta

kadtong
sa una sa atong
kadanghag

kadtong miingon
ang atong gipuy-an
nga kita
walay mga bout

unya karon
manihapon ta
kita ra pod
nga mga samdan
ug gibun-og
sa kapalaran
ang magsalo

bisag lami ang
lasagna (paborito mo)
ang lechon kawali (natong tanan)
ang kinilaw og tinolang isda
ug ang
dagkong alimango nga
gitunoan

di sab gihapon ko
mabusog

bisag giuhaw kaayo
kos san miguel beer
ug motungab kog
lima ka botelya
(ra)

apan di gihapon ko
matagbaw

kay ania kitang tanan
nag-iyahay ug bulikat sa atong
mga samad kaniadto
ug hikap sa atong mga bunol

gitultol na usab ang kahapdos
dayon natog
dungan ug danguyngoy
nga morag namatyan
tag baki
o kaha ba morag mga
manok nga gipangdungoy
o mga unggoy nga
nabitik sa mga lit-ag
o mga iring nga nalaphawan
anang gabukal nga
tubig

kapoy na,
kapoy na jud kaayo
mas maayo pag mag-inosara
basa basa, sulat sulat,
hay-ad hay-ad sa papag
duyan duyan sab
diha sa lapyahan
ug
manamin
ug mopahiyom lang pod
panalagsa

sakto na kana alang kanako
mabaw na lang pod baya
ang kalipay sa
tiguwang nga nakakaon
ug daghang tagam.

No comments: