asa na ba ang mga larawan?

adunay kulang
dinhing dapita

ang babaye nga
miawit
milantaw lamang
sud sa usa ka
lawak

didto ang iyang
bana ug ang
iyang bugtong nga
anak

wala siya nanambo
sa bintana
aron masinati ang
kabugnaw sa hangin
ang pagkalunhaw
sa mga kakahoyan
ang kagaan nga
pamati sa mga
panganod
ang lamdag sa
bulan matag gabii
sa wala pa siya
matulog
ang hanoy nga paglupad
sa kalanggaman
hangtod nga nangawala
kini sa kawanangan

busa,
bisag unsa kalami sa
iyang tingog
ug sa kaanindot sa
iyang giawit

dako gihapon
ang gihambin nga
kahaw-ang

kay nahisama kini
sa usa ka patayng
lawas nga
gilalinan na sa
iyang kalag.