ang kahumok nga way sama

ang kahayag sa
adlaw daw seda nga
panapton nga
mitugdong sa uga nako
nga aping

daw alibangbang nga
mihalok sa  buhok
sa hangin
nga sa kanunay mabati
lang ang
pagbalhin

balak sa kalipay

ayoha og pili ang mga pulong
sama sa pagpili mo sa mga lugas

ilain ang tipase sa bugas
iwahing ang mga bato
tayhopa ang tahop

pilia ang pulong nga ligdong
ang tam-is ang humot ang kaanindot

balika ang kabahin sa buyog og rosa
ang alibangbang og ilang-ilang

dili kaayo panimuyo ang pulong sa
hangyo ang kalit sa pagkutlo
gamita ang inanay ang labyog sa uhay
ang sentimiento sa mga kanhiay
ang misteryo sa mga kunuhay

tagoa ang sakit og hapdos ang
bunal og bun-og ihapsay ang buhok
sa alimyon sa lana sa tubig sa sapa

adtoon ta ang lugag sa kaanyag
ang mga tinguha ta kahayag
ania na ang mga bag-ong kaplag
ang taligsik sa ulan bisan kanus-a
dili baga dili gayod yabag

ania ang kabag-ohan usa ka
bandihadong kasadya sa pulong
og hunahuna ania ang sayaw
sa tamsi sa sanga sa usa ka antulanga

kabahin sa upat ka inahan

nakahinuklog kos upat ka mga
inahan

kadtong usa nanghambog
sa iyang anak nga doktor nga
haskang sikata na sa america

lain pod tong anak nga negosyante
nga haskang datoa na usab didtos
china

lain pod tong anak nga abogado
nga gidumogan sa mga datong
mga kliyente sa englatera

angay kuno kasinahan ang inahan
nga hatod kuha sa anak sa
simbahan apil na sa madyongan
kuyog sab sa tanang
lugar bakasyonan

hmm para nako patas rang tanan
kay sa kaulahian ang imong mga anak
dili nimo mga anak

tagsa tagsag suba tagsagtagsag
tulay 
tagsagtagsag pako sa ginagmayng
luna sa sapa nga hangin

lowly government employee

usa ka ka ulod
nga milanding sa
dakong lawod
sa records

balaang ulod
hutda og kitkit
ang tanan balod

pag-abot didtos
imong utlanan
kalibang suka
taman-taman

balit-ad

adunay lami usab
diha sa balit-ad

sa mapa sa imong
likod
natultulan ko ang
lamian nga
ubod

sa dalan sa imong
dalunggan
likod sa imong aping
anaay akong
mas lamian nga
nakit-an

likod sa imong agtang
likod sa gabon sa imong
labong nga buhok

sa dihang mibalit-ad
ka ug sa dihang ang
akong kalibotan usab
nabali

wa ko damha nga
makita ko ang langit

paglubad og pagluib

nausob na baya usab ang
plastada sa kadugay sa panahon sa
atong panaghagwa

dili na ako ang alibangbang
sa imong pagkabuwak
dili na ako ang kahoy sa imong
pagkaaninipot
dili na ako ang tikarol sa imong
sanga nga bakhaw
dili na ako ang isda nga nag-inosara
sa imong lam-aw

dili na ako ang buwan sa imong
abre nga bentana
dili na ako ang lab-as nga hangin
sa imong lawak

kay kon wala ka 
dili ko na mabati ang kamingaw
pasayloa
apan mahugyaw kami dinhi
na nahibilin
diha sa tumang kalipay

ang atong iro dili na mopaghot
ang imong iring dili na usab momiyaw

kitang duha wala say pagmahay
sa dakong bangkete kita nag-iyahay
akong kanta akong sayaw
imong bitbit imong bugkos
wala na ang bug-os nga  pagkuskos
wala na ang kaaslom sa mangga
diha sa ginamos nga mawos

KUNO

Kining pulunga
kanunayng gigamit
tungod sa kahadlok
kon unsay dangatan
kon ikaw paninglan
na sa kamatooran

mao kuno
matud pa niya
nagpabilin kini human
sa imong paglitok
og bahad nga kon unsa
man ugaling
dili ka gayod mangilabot

daghang nadaot bahin aning
kuno
daghang naglakaw nga
wala nay ulo
daghang way kalibotan
kon nganong naguba ang
gihimong gabalay
sa iyang kadungganan

kay lagi anaa man lang
sa kuno
apan usahay baya kining
kuno
nagsumikad nianang
aso nga dili makumkom
ang bukag nga daghag
mata
anang tawo nga mat-an
pas pinya

mitago sa kuno apan kon
imong sutaon
puno sad diay sa unod
lig-on pas bukog sa kabaw
gahi pas ugat
kuyaw pas kiting

sa dihang miabot
siya
gisunog na sa adlaw
ang paglaum

nasuko ang iyang
agalon
gikasab-an siya
nga samag gitakloban
siya sa dakong
dag-om sa kalibotan
"dili ko hingpit nga
tawo, Yo" nga mao
na may hinoony
gikasuko samot sa
gisapot
"wala gipamunit ang
kwarta dinhing
dapita" dalag
pagpangahulog sa
singot didto's
hwerto
naguba ang dalan
natunga
gibulang sa suba
ang yuta
og dinhi namugna
ang mga tampi
dili lang nobentay nuybe

mitunga ang mga kalag
didto's sam-ang
gihimas nila ang kahilom
sa mga sinaw nga
letra sa ilang metal
nga mga ngalan

gilantaw nila pag-ayo
ang mga nangabot
nga saba kaayo unya
kusog ang hudyaka
sa katawa, kaon
inom, unot og surasura
kausa lang sa usa ka tuig
kini mahitabo
apan wala sa ilang nawong
ang kalipay
wala gyod nausob
sukmat sa usa ka kalag
ngadto sa tupad
ang ilang kapalpakan
kaniadto
kapalpakan gihapon
nila karon

dinhi sa gamay
dakbayan sa Dipog
luag pa ang
menteryo
lapad pa ang mga
dalan
wa kaila ang mga
tawo ug unsa ang
trapik
o kagutom o kauhaw
pwerting pamunga

sa mga bulahan
og mga durian
ning adlaw sa mga kalag
wala ang kahadlok
o kaikag
ambot, ingon si Intoy
magkaila kuno tanan dinhi
ang patay og buhi
ang mga kalag og dili ingon
nato
saksak sinagol ang mga
balita dinhi
ang usa miingon
gibuhian na kuno adtong
myerkoles pa
apan naa sab ang usa
giputlan na saw sa liog
adtong udto sa hwebes....

dito po sa lugar namin
sa araw ng undas
masaya ang mga patay
pati na ang mga buhay

magkakilala ang mga
tao at mga kaluluwa
maluwag ang menteryo
kagaya sa boulevard
nasanay na rin sa takot
kaya ano pa ba ang ikakatakot?

samtang gipagawas ko ang akong

hugaw

mihigda ka sa katre mitutok sa kisame

gibungolan mo ako sa tumang kahilom

dili nako ikalimod nga miabot na ang panahon

nga unta ako usab manudya

gidamgo ko ang laing panimuyo

ang palasyo sa layong panganod

ang kabayong pak-an ang karwahing 

bulawan

ayaw ako ug hulgaa nianang imong mga luha

bisan gani ang yuta dili naman madutlan

kon sa kusog nga ulan siya mabasa....

halad alang sa kalamposan

mga buwak nga
bungi
mga pagkaon nga
pan-os

sobra sobra sa
langaw
gikulinitan sa
mga ulod
gipasagdan sa
gatigmi na nga
mga bakukang

bisan gani ang
mga lagong
nga gikan sa karbon
giyam-iran

giandam na nako
ang tanan
ang akong kaugalingon
ako na nga
giunag lig-on

ugma kon adunay
sunog ang mahitabo
sa atong balay nga
gipuy-an
dili nako sugpoon ang
kalayo
pasagdan ko kini nga
mokaylap
hangtod maugdaw ang
tanan

iphon ko ang mga aligato
tapokon ko ang mga abo
hiposon ko ang mga
agipo

gipanagna na ang akong panaw
ang pagbalhinbalhin nga
walay kataposan

miingon ang mananagna nga
ikaw
dili na gayod mokuyog kanako

mao kini ang akong pagpangandam
lig-onon ko ang akong kaugalingon
og sa sunod nga hugna sa akong
panaw
kauban ko na ang mga alindanaw

dili na ako motoo sa pasalig
nianang balay
nianang hardin
nianang atabay

alang kanimo nga dili mangilabot gayod kanamo

pagkadagko sa mga balod sa dagat
morang kadag-a sa imong balay didtos
sta felomina
nalisang ang mga pasehero
apil mi
gipanglabay ang ubang mga karga
sa dagat
misarasay ang dakong barko
hapit di makabalik sa iyang lugar
maygani kay gibuligan pa gihapon kini
sa maayong kapalaran
durong iyak sa mga bata
ang mga babaye nagkabuang kon unsay buhaton
ang mga tigulang wala na naningkamot kon
unsaon pagluwas ang kaugalingon
ambot unsang swerteha nga kalit man lang
miundang ang kusog nga ulan og hangin
og ang mga balod
nahapsay man nga morag plantsadong
kamison sa
dagat

gisulti ko kining tanan niining akong gisulat
unta alang kanimo
apan dili na kami manugilon niini
kon magkita man ugaling kita

bisan kanus-a wala ka gayod nahimong
apil sa among kinabuhi
dili namo malimtan ang imong mga pulong
kaniadto
nga ikaw walay labot kanamo

kon nalunod pa ang barko og kon kami sumala
sa among kapalaran
mawala man ugaling og dili na gayod makit-an pa
dili namo igsapayan
nga ikaw wala gihapoy labot sa among
gidangatan

busa kon aduna ka may maayong nabuhat o
nahatag sa among kinabuhi
dawata lang  usab ang among pasalamat
kon sa usa ka higayon
mabasa mo kining akong balak.

kabalo na ko
nganong si Blues
bisag mapiit iyang tiil
dili motingog

apil na si Gladys
nga bisag kusion
dili gyod mosyagit

liwat sila sa ilang
Papa nga dili na motingog

sa ilang Mama
sa pipila na ka tuig nga
nanglabay

sa adlaw ni tatay

sa adlaw ni tatay

lantaw mi sa dagat
kami ni tatay
dako ra kaayo ang iyang hawak
dili nako magakos
dap-ig ang akong ulo sa iyang ilok
sa pipila ka higayon
kaming duha lang sa baybayon
tupad sa pagkadako kaayong kahoy
si tatay nanaghoy

ania
miabot na ang kamingaw
ania
gilukop na ang atong
lawak sa
kahaw-ang

dili lang kini
karon,
ugma damlag,
dugay na kini
dugay na,

wala kay
makita karon,
wala kay
madungog
gikan kanako

ako nga usa ka
panas

pangpang,
siak,
bato, pulpog

wa ka nay
madawdaw pa kanako

busa unsa pa ba
ang akong kahadlokan?

kining
lunaa alang sa umaabot,
tilawi ang
tab-ang, batia ang kabugnaw sa hangin,
hikapa ang kasap
haploya ang loyloy
ayaw na ampoi ang nanglabay
lakat na,
kining lunaa alang sa taas nga panaw, lantawa ang kalay-on, abta ang kinatumyan sa atong pagkahanaw.

sa kalami sa gidili

lad-ang ang timpla sa atong
panagtagik,daghang nangausik
puti ang tinta nga nawitik sa
akong papel nga tipik
adunay dakong mata sa ungo ang
misiplat sa gamayng buho
wala panumbalinga sa atong hinanok
ang kasamok sa mga lalaki ug

syagit sa mga babaye kabahin sa sunog sa unahan

nagmantika kuno ang mga bombero 
sa syudad nga abo.

alak ang balak

bug-at na kaayo ang balak
samas imong gibating nangatagak
alak ang balak, bibo ang tagay
sa lima ka tudlo sa dalunggan sa tasa
nga unta ang
naandan kape nga karon gipuno mo
sa kamatooran sa isog nga ispiritu
sa vino
en veritas kuno, amor omnia, unya na
tagay usa, kaugalingon sa akong
kaugalingon, ning akong kasubo nga
wala ka na, nga hangtod karon unsaon ba
pagsabot nga ang nahigugma mismo mao may

nagpalayas sa kasingkasing, saon ba pagsabot
kining pagbati sa usa ka unggoy nga pisot,
sakto kadtong tiguwang nga nakigtagay sa
bulan, malipayon sa kuyog sa iyang anino,
samtang ang iyang kahilom maoy nagmaymay
kanunay nga ang dahon sa sibuyas dili gayod gihapon
kadaog sa usa ka lawas.

ang samdan

kining tawhana samdan
dako ang samad sa iyang dughan
anaa ang dugo mibuhagay
naglama ang iyang sapot
nabasa ang salog sa dugo nga
lapot,

misinyas siya kanimo
magpakuyog sa tambalanan
nagsalimuang ang iyang
diwa, ang kasingkasing nahiwa

hapit na mawala ang iyang ginhawa
nagtinga na gayod siya

ikaw nagbasa sa peryodiko
sa ibabaw sa imong lamesa anaa
ang init nga kape
sa imong mata mitabon ang baga
nga linte sa imong
antipara

sa imong dalunggan anaa ang
musika
nga ang tema bahin sa walay
pagpakabana

busa wala kay nadungog
wala kay nakita
ikaw ang malipayon sa iyang
kamatayon

mga tingog nga gidalag balik sa kusog nga ulan sa baryo sa Olingan

mga tingog nga gidalag balik sa kusog nga ulan sa baryo sa Olingan

mibalik ang mga tingog sa
pagbadlong
"ayaw kamo pagpaulan basin
unya kamog hilantan"

sa laing bahin sa dakong nataran
ang mga batang nanggihumo nanagan
nagdulag dakpanay sa ilalom sa ulan
" dakpa ko, dakpa ko, 
dili ka kaapas kanako"

sa kilid sa bintana atua ang babaying
tigulang, nanambo, nanampiling
dugay na nga pinaabot sa wala
miabot, " kanus-a pa kaha motuwak
kining ulana?"

tunggo

tunggo

sa tumoy sa
bungtod
human sa pipila
ka oras
nga paglakat
sa kilid sa punoan
sa mangga
diha sa liki sa
dakong bato
mibuhagay ang
bugnaw kaayo
nga tubig

karon
manalagna ka
na kabahin
sa kataposan
sa kalibotan

sukwahi kaayo

ikaw nga gitagna
kaniadto nga
maoy moluwas
sa kadaot

karon ikaw na
ang naghadlok kanamo

ambot naunsang
pagkabaliha
sa atong kalibotan

ikaw man unta
ang langit
og ako ang yuta

sakto ang lapok
atong kagikan

mahiko sa mehiko
ang bata kanunay nga nangandoy kanimo

pising gihimong halas
mga buwak nga nag-awas gikan sa imong kamot
papel nga gihimong kwarta
nganong dunay kalapati ang imong bulsa?

nangatawa ang kadaghanan
haskang lingawa
nagnganga ang mga bata
naglingolingo ang  mga tiguwang

apan dunay usa nga wa ganahi
didto sa kilid sa pultahan
laing pangandoy
nga unta ikaw mawala na
sa hingpit ning
dapita

ang sakayan
duha ang katig
timbang timbang
diha
sa wala og sa too

kon walaon ang
katig
mahimo man
apan palapdan
gayod
ang kadak-on
sa tiyan

kay sa tinood
dili mahimong usa lang
duha gayod

apil na diha
ang duha-duha
ang kiay-kiay
ang
sikay-sikay
sa lipay-lipay
dalang
likay-likay

apan kanunay

ikaw lang.
ikaw lang ang nakapukaw sa akong nahikatulog nga kaulag.
gisualayan ko kinig tawag nga gugmang nangulahi.
bisan unsaon, kaulag lang gihapon.
sayod ka ba nga bisan kinsang nawong nga akong makita bisan asa
imong nawong ang atua?
unsaon ko kaha pagbalibad ang nanangpit mong dila?
ang nanawag mong sampot?
ang bukid mong dughan nga sa matag kaadlawon gusto nakong tungason

nanghinuktok ko
kon unsa ang maguba kon sugdan ko na ang akong kamaldito.

maguba ang tibuok lungsod
makisaw ang dagat
mahubas ang sapa
maglinti, modalugdog ang langit
maglinog ang patag
mangadukmok ang pangpang

gipaningot kog bulbog
mikunot ang akong agtang
miuk-ok ang akong ikog

maong miingon ko: di na lang.
gilitok ko: jawa, pahawa!

makamao sab kong
manira og pultahan

daghan na kog
nasiradhan

anad na anang tingog
sa pagpanira
apil na ang agik-ik
sa bisagra

ang kapiit sa tiilan sa
pultahan nga misagyad
sa salug

kanunay ko na kining
gibuhat
dala sa panginahanglan

dunay panahon nga
dili agik-ik ang madungog
sa taya nga siradora

subo nga tingog nga
nagpabilin sa bulsa sa akong
dughan

nahulog ang akong abaga
milaylay ang akong bukton

apan, apan unsaon ta man
kinahanglan lang gayod nga

ang pultahan sirad-an alayon
sa kangitngit usahay sa
kagabhion...

dali na, o ispirito

dali na, o ispirito

dali
sulod sa akong lawak
dali sulod sa akong lawas
dali sulod sa akong kalag
kay ania dinhi
ang mga pagtoo ang mga
pagtoon kon unsaon
paglipay ang mga nahisalaag
diha sa tumong kasubo
dali na
ipakita kanako ang hubo
mo nga kasantos
nindot ang imong
gigikanan
wala pa ang sala
wala pa ang kaalam
usa ka ka paraiso
nga wala natultuli sa
langgam
wala pa masusi sa mga
kamot
sa adlaw
dali
dali na
tudloi ako kon unsa
ang putli nga gugma

adunay talamdan

adunay talamdan

adunay
tamdanan
magpabilin ang
pagsunod sa mga
talaan

sa sayong buntag
kon ikaw unya maglung-ag
ayaw ipaaibabaw ang
sugnod sa
kolon

mahimo mo bang ibutang
ang tubig
sa dapogan samtang ang
bugas
gilatag mo sa sa taklob
sa kalderong imong
gikulob?

wala miambat sa mga igihan

wala miambat sa mga igihan

igihan ang batang lalaki
sa iyang inahan
nga unta magmasahe sa
akong asawa
didto sa daplin sa baybayon
samtang gipalabay namo
ang mga oras
human sa usa ka semana
nga kahago

domingo karon
nindot ang duyanan
bugnaw ang hangin
asul ang dagat
lunhaw ang mga kalubihan
tam-is ang sabaw sa butong

humot ang sinugbang pulag ikog
init ang kan-on
nga gilatag diha sa dakong
saging nga dahon


kusog nga miiyak ang
bata
sakit sa dunggan
mas nindot ang awit sa dagat
wala miambat
sa mga igihan

mga dragon sa atong kaminyoon

mga dragon sa atong kaminyoon

kon imong bantayan ang iyang
pag-abot
hadlokon ka,
mobuga sa kalayo
mamunal sa iyang ikog
mopakita sa iyang hait nga
mga bangkil

apan kon dili nimo ambaton
magpuyo kini
matulog og gani mohaguk man

sahay molakaw lang kini dayon
nga walay pananghid

ako sab ingon ana
busa ayaw lang akog ambata
mas ganahan kong matulog
mohagok
magdamgo
mawala sa kalibotan nga atong
gipuy-an

gamay lang gayod ang gipangita
nga kalipay sa akong lawas

kapoy kini gustong mopahulay
og sa dihang mahinanok sa katulugon
mangawala ang tanang mga dragon
og nagpadragondragon
sa nataran sa atong kaminyoon

ang tighukom

ang tighukom

anaa lang gihapon
ang buwak sa gawas
ning atong bag-ong
gipuy-an

milabay sab ang hangin
paingon sa dagat
anaa ang adlaw
kanunayng mihayag

pasayloa nga dili na
ako makalantaw
kaninyo

dili ko na madayeg
ang katahom, kainit,
kaalimyon,

gasubo ako sa dagkong
suliran sa uban
sa kanunay gisulayan ko
paghubad ang
mga kagubot

pulong nga misalapid
buhok nga nanagsupak
mga balikog nga katuyoan
tinipigang kasilag
pahiyom nga gadumot
saad nga pasundayag

gamhanan gihapon ang
kalaog
gipukan ang matood

ang Sphinx ngadto kang Oedipus

ang Sphinx ngadto kang Oedipus

dili unta angayan
apan ambot ikaw man
ang makamaong
mopukaw kanako

gikahadlokan ko ang
sunod
kon unya mahitabo
unya ako mapukan

sama sa pagkatubag
sa akong tigmo diha
kanimo
gamhanang Oedipus

mahimong mabuak
ang tanang ania kanako
ang akong kasingkasing
ang akong mga pako
nga karon puros mga
bildo sa imong atubangan

apan kalooy ba
kay sayod ka nga sumala
sa tagna sa usa ka
sugilanon

ikaw lang gihapon ang
maalaot
lugiton mo ang imong
mga mata
ug maglatagaw ka
nga mag-inosara

ang mas sakit
kay bisan kanus-a
dili mo lang gayod
gihapon litokon
ang akong ngalan

deshabu

deshabu

mora kog sunoy nga
misuroy sa
balilihan ug sa kakognan

wa damha
sa way katuyoan
mibalik na usab ako

ug nangakha sa akong
agi

dunay gipangita
apan wa kabalo kon unsa

 

nakit-an nako ang 

wala

pusod

pusod

diri sa karaang
isla nanubo ang mga hagwa

hmm, mga
pulo ka tuig

ang mga hagwa wala
gyud mamunga

kadyot lang ang mga
udlot

ang kalipay mitabok
sa pikas isla

walay kisaw ang
mga bas

ang kahilom wa sab
mamunga

ang ilang mga udlot
kulungon

uga, apan adunay
kalainana

daghang gamot ang
kahilom

gilukop ang tibuok isla
nga namunga sa mga panganod

nga ang garbo mao lamang
ang mga luha

nga mihumod sa balas
nga nananga

ug mga kalig-on
samtang ang mga kalipay

giiway, sama sa
pagputol mos imong pusod

duha ka tukog

duha ka tukog

nakat-on ka baya
nalig-on man gani kadtong
ikaw ra
kaniadto

walay saktong katarungan
nganong kamong duha magmahuyang
sa inyong
duha ka tukog nga
sa nahibiling sagbot sa inyong
lawak

nanilhig

basa na kaayo

basa na kaayo

bisan pag makamao na nga mosulti ang
ulan sa atong pinulungan
dili gihapon kini nato masabtan

basa ka naman god kaayo.

ang nag-inosarang poste

ang nag-inosarang poste

dili mingaw lantawon
ang  poste nga nag-inosara
sa kilid sa tulay
tabok  sa
sitio sa rizal

bibo man god ang iyang
kahayag
nga nanamin  sa
sabakan sa  hilom nga sapa

magduda, dili kaha ako sayop?

wa niya hikaplagi
ang tinood nga gugma

kon unsa ang tinood nga gugma
gihunahuna niya kadtong makadulog niya sa 
mingaw nga kagabhion nga malimtan niya
ang mga bato, ulan, abog, 

kadtong mawa siya sa iyang kalibotan
kadtong mabuang siya og dili na niya mailhan
ang iyang ngalan og ang iyang pinuy-anan

wa niya kini makita
nga ang kalipay sa tinood nga gugma
mao ang iyang pagkapapas
isip pulong lamang

nabuhi siya nga usa ka haw-ang
nga hawla nga gagilak sa bulawan
apan wala kini sulod bisag usa na lamang
ka buang nga langgam

kon makita mo kini siya
gisuot niya ang antipara unya nindot ang
iyang pahiyom

moingon ka, pagkanindot niya
nganong dili man ako siya?

kon lantawon sa layo
makapanghupaw ka
magduda, dili kaha ako sayop?

gani ang imong ngalan wala na usab sa among listahan sa pagkaugmang sukad sa laing pamahaw

gani ang imong ngalan wala na usab sa among listahan sa pagkaugmang sukad sa laing pamahaw

gisulayan ka nako og tudlo kon unsay
angayng buhaton

sama sa akong giingon ikaw ang
mopanaw sulod sa imong dughan
ikaw ang maghimo og sakayan og layag
imong paminawon ang hunghong sa hangin
imong bation ang giyagyag sa mga balod
sa kinabuhi
alang kanimo

daghan ka na ug gikuha kanako pinaagi sa dayag nimong
mga bakak
gabalik-balik ang mga pasalig
nga sa akong pagpakahilom gipalapos lang usab nako
sa pikas dunggan

gikan na ako sa maong panaw
og ang kinabuhi mismo ang nagtudlo kanako
kay patay na man ang akong
mga ginikanan

karon kay di ka man motoo
ang kinabuhi na usab mismo ang magtudlo kanimo kon unsaon

pahimangnoan ko ikaw nga ang kinabuhi isip usa ka magtutudlo
dili sama kanako

masakitan ka apan dili kini panumbalingon sa kinabuhi
kon dimalason
(maayo unta og dili lang kini mahitabo)
ang kinabuhi na mismo ang mokuha sa kinabuhi nga gitugyan diha kanimo

ang among makita mao na lamang ang imong kataposan
manghilak kami
apan ang kinabuhi walay luha
human niyag kuha kanimo
dili gani kini motingog

kay ang iyaha iyaha gayod
dili kini para imo

wala ka man god gihapon makat-on
nagpabilin ka pa man gayod diha sa salag
sa imong pagkabakakon

dili gani moabot ang kwarenta dias
mosibog na usab kami
sakay sa among baroto
og inig abot sa among kagabhion
papason na usab dayon namo
ang imong ngalan

ang imong bitoon sa langit
mawala na usab
ang bulan magpadayon sa iyang paglawig
og dili ka namo mahisgotan
gani ang imong ngalan
wala na usab sa among listahan
sa pagkaugmang sukad sa laing
pamahaw

wa ko masayod kon asa.

wa ko masayod kon asa.

ang salog sa atong balay
kawayan.
nagsugod kining walay
pangag.
dili lang kay nindot lantawon.
nagpakita kinig kalig-on
busa ang atong mga tiil
kon motunob 
walay kahadlok.

usa ka adlaw niana
napangag kini unya gusto
nakong ayohon

miingon ka, ayaw.
pasagdi ang mga salog
nga mangapangag

miingon kag dugang
kining balaya kawayan lamang
pasagdi siya nga maguba
sa iyang kaugalingong panahon

kining balaya abtanan lamang
nato samtang ania pa kita
apan sayod ka, pagkaugma
biyaan na nato kini

busa gipasagdan nato ang 
pagkapangag sa salog
hangtod nga ang atong mga tiil
naanad na usab sa kahadlok

ug tuod man
ang salog nga kawayan
nahimong salog nga yuta

diin anaa ang gilubong
ang ugma, ang kagahapon
nga napuno sa kahaw-ang

karon mobiya na usab ako
wa ko masayod kon asa.

kon nasayod ka lamang

kon nasayod ka lamang

ang buyog kanunay
nga misimsim sa nektar
sa kabulakan

wa kini miundang kay
ang iyang pagkauhaw
walay pagkatagbaw

ang iyang kauhaw kauhaw
sa tanan
way pagkahuman
kay ang iyang nektar
nektar man sa tanan

matapos na ang kalibotan

matapos na ang kalibotan

sa bisan kinsang
gasubo nga akong ikahinagbo

kanunay kong gipanghambog
ayaw padala niana
pilia pilia gayod ang kalipay

maglipay ta maoy akong ingon
itagay ang tuba
ihukad ang mga sinugbang
baboy
ilamog na ang tulo ka itlog
sa tuba nga gikutawan sa
init nga sikwate

imnon na nato ang kinutil
magtagay ta
ikaw ug ako kitang tanan
mga silingan

adunay gitagong kasubo ang
dughan
nga sa mata 
nagtukawtukaw

maglipay tang tanan
kay ugma, kanang ugma
matapos na ang kalibotan

sa bisan kinsang gasubo
usa lang ang paglaum
ugma, ugma matapos na
ang kalibotan

sa pako sa kagawasan

sa pako sa kagawasan

ang kapait
dili lamang anaa sa kapait

sa tam-is mo kunuhayng 
pahiyom
sud sa imong alingagngag
anaa ang
kapait sa imong
kinabuhi

ang kabug-aton dili diha
sa dagkong mga bato
anaa usab kini sa 
kapakyas

mas bug-at ang dili makita
ang dili mataral

kon maglakaw kita paingon
sa plaza
kinsa bay magdahom nga 
wala kitay tinood nga
direksyon?

pagkaanindot sa imong buhok
pagkagubot diay sa imong utok

pagkaputi sa imong pamanit
pagkaitom ba diay sa imong tanlag

pagkakusog sa imong buhakhak
dungog kaayo ang imong layo nga katawa
dili nako makita ang luha nga nahulog
sa tugas nga salog

gidawat sa kasing-kasing ang tanan
sa iyang kamot nga balaan
pagkagaan, pagkagaan
diay kining maglupad kita
sa pako sa kagawasan