ang tanan nga mahitabo

ang tanan nga mahitabo
og nahitabo og umaabot
tungod sa katarungan,
angayan, og atong dawaton,
nasulat na kini sa kasulatan
nabaniog na kini sa katilingban
og si bisan kinsa wala'y makapugong niini,
gisunod lang sa tubig ang sulog
gitayhop lang sa hangin ang nahipatik na sa kapalaran

ayaw katingala
ayaw kabalaka
ayaw kahadlok

kitang tanan dinhi puros lamang mga bisita
og sa pipila lamang ka yugto
o mga segundo
mopahawa na usab kita
papaon daw sama sa usa ka sinulat diha sa daplin sa baybayon

ayaw kaguol
ayaw kahiubos
ayaw pagmahay
ayaw kahingawa

pagkagamay lang sa nataran dinhing dapita
pagkaabog sa kadalanan
pagkalubog sa tubig
pagkamaot sa atong makita dinhi
dili kini angayan nga atong ikalipay
dili nato kini kawilihan

ang tanan nga nahitabo na
pahimangno lang kana kanato
kay ang mas labi natong andaman
mao ang lugar nga wala pa nato sugod maabti

pasagdi lang ang mga mapuslanon
ang mga walay puangod ang mga bugalbugalon
kutob ra kana kanila
kutob ra sila dinhi
dinhi sila madugta
og wala na sila'y mga pako nga makalupad
mga tiil nga makatikang
wala na sila'y lain pang kapaingnan
sunugon sila sa kalayong
wala'y pagkapalong

kita ang saad
og kita puhon ang tinood nga katumanan
busa pagsadya
pag-awit
pagmaya
pagsayaw

og pagkahuman ayaw ikaulaw ang imong paglingkod
og pagpakahilom
pamati sa hunghong sa baba sa imong kasingkasing.