daghang naglibog nganong nahigugma siya niya

nakaingon iyang mga pars,
nganong siya man, ka walay lami ana,
morag palwa ang ilong,
walay mabuhi nga kandiis sa iyang aping
puno sa nauwat nga mga bugasbugas nga gipislit
sa iyang nawong
bakang og legs, putot, morag ulagan pa gani

second hand na,
wala na'y warranty choi, apan nganong nahigugma ka
man ana?
dili ka na una ana niya

naghilom hilom si choi
og wala mitubay, apan sud sa iyang dughan
gihigugma pa gihapon niya

ang lapad nga agtang nianang bayhana
sama sa kalapad sa ilang mga basakan og kalubihan
ang kabaga sa iyang nawong
sama kabaga sa hinapnig nga kwarta
nga gilaan alang
kaniya

bisag sakit ning akong mga mata

inday
bisag sakit na kining akong mga mata
og tinutok sa imong katahom
lantaw lang gayod ako
kanimo gihapon
gikan sa imong buhok
sa imong agtang
paingon sa
imong bilahan
hangtod sa imong mga kumagko
ako lang gayod gihapong
lantawon
bisan gani siguro og mangahulog na
kining akong mga mata
og mangasunog na kining akong mga pilok
ako gihapon tikang
lantawon, tutukan, pistahan,
himbisan,
apan pagkahuman
paglabay niining akong kalipay
og sa pagkamatay na unya sa akong
kahinam kanimo
palongon ko na ang tanan
sama sa lamparilya
kay mopahulay na ako
sa tumang kangitngit
saaran ko ang akong kaugalingon
dili na taka damgohon

tandayan ko na lang una
kining akong
asawang patay na
sa katulugon

ang uban kon di na gani ganahan

ang uban nga dili na gani ganahan
mohilom lang
mopailob magpakaaron-ingnon nga
namati

ang uban, lahi sab, mopakita sa ilang
pagkawalay gana, motindog, dili motingog
og dayon og pahawa
nga walay panamilit

naa po'y uban nga kurat kon dili na ganahan
dili lang mohilom, dili lang motindog, dili lang mopahawa
mosaka kini sa taas kaayong building
walay lingi lingi
walay sulti sulti
walay wili wili
og sa walay pagpaborpabor kang bisan kinsa
bisan na gani sa kinabuhi
dayog ambak, patay

ang uban usab nga mas isog isog
apan walay building nga kasak-an
magkuha og pisi
ihikot sa taas nga sanga sa kahoy
og dayog ambak, patay gihapon.

ang nangabilin, abi mo,
hangtod karon, maoy gikulbaan
maoy nahadlok
taslakan kaayong maghikog.

bag-ong tuig

kahoy nga baga og dahon
bangaw nga mabulukon

bugnaw nga balilihan
kalinaw sa kalibotan

pagkasinabot sa katawhan
kauswagan unta sa tanan

ang akong nahinagboan nga tomboy

bag-o pa lang ming nag-ila
apan kadaghan na sa nahisgotan

ambot og unsay akong nasulti
nga kalit mang nasuko nangisog

nanghasi og sumbagay
naghisgot og pakaulaway

nangutana lang gani ko
dayong hirit og "harassment ng imo !"

wa kong kasabot
kay ang nanghasi mao man hinooy

naghisgot nga siya ang giamong
og ako nga haskang bogoa, maoy nahimong

sexist pig.
pero ok lang, dili katalo.

kaganihang hapon

kaganihang hapon
giduyanduyan ko sa katulugon

sa kilid sa among balay
nga daghang kahoy

sa ibabaw sa labat nga sementado
adunay duha ka iring nga nagsunod

naghangad sa kahoy diin
ang duha ka tamsi naglupadlupad

nga mibatog sa usa ka sanga diin
ang mga dahon basa pa sa bag-ong ulan

nasayod ko sa gusto sa duha ka iring
og nasayod usab ako sa akong gipangita

diha sa duha ka tamsi nga nagduladula
ang mga iring nangita og pagkaon

lahi sab ang ako
kay ania nangita og kalipay

jean paul sartre

nagpasabot ka nga
ang impyerno mao
ang laing mga tawo

dili lugar, dili
ang umaabot,
dili ang karon

mga laing tawo
ang impyerno

dugay kong nakaamgo
apan sa dihang midagsa
ang labad sa ulo
nga wala madandan
sa usa ka bagol nga
advil,

didto ko nakatoo,
labad si x, labad si y,
labadlabad si z,
mas labad si xy,
puros labad,

impyerno gyod.

asawa og bana

kitang duha
sa sinugdanan
og kitang duha
lang gihapon
sa kataposan
apan ang
tunga-tunga
kon mahimo
ilahon na lang
pod unta.

ang dili masabtan

ang dili masabtan
tungod kay dili gayod
sabton
ato lang usa'ng biyaan
ato lang kining
balikan
kon bug-at na kaayo
ang atong mga
kasakit nga
gipas-an og ato
kining atubangon

atong paningkamotan
nga masabtan
aron ang
tyurka sa kasakit
unta
maluag-luagan

ang iro nga imong gikasab-an

galisod ug sabot
ang iro nga imong gisagpa
sa usa ka dakong
kasaba
nganong siya mipaghot
sa kahoy
og nganong namati
lang siya sa
iyang kaugalingong
paghot

unsa pa ba
ang dag-anan
sa usa ka iro
nga imong gipakasama
lamang nga
iro

iro ang nawong
ang panghunahuna
iro ang iyang balahibo
iro ang iyang
ngipon

ang imong gikahadlokan
mao lang baya
nga unya puhon
mahibalik
ka sa lugar diin
ikaw ilang giiniro

og dinhi nasabtan
sa kahoy
nganong hangtod karon
suko ka gayod
sa mga iro
og kanako nga unta
tawo man
imong gitawag
nga iro
imong gipakairo
imong gihimo
nga iro

bisan og ang akong
tingog gusto untang
magmahal kanimo
mihangyo kanimo
nga imong
baslan nianang
halok nga init
pa sa ako untang
mga gakos
kanimo

wala ka gayod mamati
babaye
mipaghot ka
iro ka usab
labaw pa sa iro
nga anaa
mitapot sa imong
hunahuna

nakahinumdum kong tibor

naguba ang nawong ni tibor
gikulata sa magulang sa babaye
nga iyang gikaipon sa hotel

si tibor babaye
ang iyang uyab si goria

si jun ang magulang ni goria
nga dili kadawat
kabahin sa gugma
sa iyang igsoon

suhi daw.

pagbutang og medyas sa pultahan

kabahin niaanang
pagbutang og medyas diha
sa pultahan
sa gawas sa balay
sa besperas sa pasko
og sa dili paghikatulog
kay siging hunahuna
kon unsay isulod
ni santa claus
pagkaugma sa buntag

hay, pagkahinam ko gayod,

mao kana
ang akong kinabuhi karon
og sa matag adlaw.

Sinderelang Serenata, esmeralda at granate,
Di ka takas na sonata sa sepulkrong alas-dose;
Manapa, sa sinisera ng sandali ay impante
Kang gumigitaw, sakay-wari ng sagradong elepante.
Kapagkuwan, sumibol ka at sumayaw sa estante
Ng retina, at sa diwa ay nagsinsil ng brilyante.
Ngayo'y oras ng paglalang, habang titig ng bitui'y

Labahang inmakulada sa planeta at sa dilim
Ng lunggati-lalo't uhaw bawat letrang isapapel,
At lapida bawat bantas. Bombilya man ay kulimlim,
Makinilyang nanlalamig ay kandilang kalawangin
Sa ngiti mo, naliligo ng asido at pormalin.
Pintig-pantig ka sa gayon, Sinderelang Serenata,
Kaulayaw ko kung gabi'y makulubot na kubyerta
At ang buwang nakalente ay may uban na sa mata.
Eskalera ng estropa at imaheng largabista
Ang handog mo; at sa tinig na may tanso ng trumpeta
Ang puso ko'y nilulunod sa posporo at bendita.
Esmeraldang pangitain at granateng kahel-anghel;
Rebelasyon-ebolusyo't rebolusyong inistensil
-Sa taludtod; tsokolate at aromang butil-butil
Na umapaw sa pandiwa at pang-uring nagdidildil.
Sa piling mo, ang pagtula ay kemika ng hilahil
Habang ako'y pasa-limbo sa palanking hasmi't nikel.
Diwa ngayon, kahit sigsig ng rayuma't dinisyembre,
Metapora ng tagsibol ang kindat mong kinoryente;
Sa pag-usad ng sandali sa magrasang engranahe,
May minutong adarna ka at naroong maging tigre
Nang linyang mabanghay ko'y naging kristong inespinghe.

Metamorposis
Mga Nota ng Isang Serenata sa
Kaibuturan ng Gabing-Disyembre
Virgilio Almario

Awit ng Pag-ibig xx

Maisusulat ko ang pinakamalungkot na berso ngayong gabi.

Maisusulat ko, halimbawa: "Mabituin ang gabi
at nanginginig, bughaw ang mga tala sa malayo."

Lumiligid sa langit ang simoy-gabi at umaawit.

Maisusulat ko ang pinakamalungkot na berso ngayong gabi.
Minahal ko siya, at minahal din niya ako paminsan-minsan.

Sa mga gabing ganito, ibinilanggo ko siya sa aking mga bisig.
Ulit-ulit ko siyang hinagkan sa lilim ng walang-hanggang langit.

Minahal niya ako, paminsan-minsan ko rin siyang minahal.
Sino ang hindi iibig sa kaniyang malalaki't mga matang tahimik?

Maisusulat ko ang pinakamalungkot na berso ngayong gabi.
Maiisip kasing hindi na siya akin. Madaramang wala na siya sa akin.

Maririnig ang gabing malawak, at mas lumalawak kung wala siya.
At pumapatak sa kaluluwa ang bersong tila hamog sa pastulan.

Maano kung hindi siya mabantayan ng aking pag-ibig.
Mabituin ang gabi at hindi siya kapiling.

Ito na ang lahat. May umaawit sa malayo. Sa malayo.
Hindi mapanatag ang kaluluwa ko sa pagkawala niya.

Upang waring ilapit siya, hinahanap siya ng aking mata.
Hinahanap siya ng aking puso, at hindi siya kapiling.

Ganito rin ang gabing nagpapusyaw sa ganito ring mga punongkahoy.
Kami, sa tagpong iyon, ang nagbago.

Hindi ko na siya mahal, natitiyak ko, ngunit minahal ko siya nang todo.
Hinahanap ng tinig ko ang simoy upang hipuin ang kaniyang pandinig.

Nasa iba. Siya'y nasa iba. Tulad noong katalik siya ng aking mga halik.
Ang kaniyang tinig, malinaw na katawan. Ang kaniyang matang walang-hanggan.

Hindi ko na siya mahal, natitiyak ko, ngunit baka mahal ko siya.
Napakaikli ng pag-ibig, napakahaba ng paglimot.

Dahil sa mga gabing ganito na ibinilanggo ko siya sa aking mga bisig
hindi mapanatag ang kaluluwa ko sa pagkawala niya.

Kahit ito na ang huling pighating ipapataw niya sa akin,
at ito ang huling mga bersong isusulat ko para sa kaniya.



"Puedo Escribir" ni Pablo Neruda salin ni Virgilio Almario

sa powitri

sa powitri, yu lit tings tek shep
kanang mora bag nagpatulo og kandila sa tubig
sugod ka siempri sa mimoris
kanang pilit-pilit bisag mais-
mais lang: gugmang nahanaw, patay'ng damgo,
nadugta nga kahilom,
kanang pagsubo, kanang giatay.
pagpatik ana sa papel, unsa.Morag paetz,
mopaak ang tayprayter kis,
molingkod ka nga morag inahan sa tanang kasakit.
haskang labada gyod, hangtod magtagbo
ang ads en inds sa giagup-op nimong gugma,
dyig so pasol, apan usahay ang tanan motugma
pero sige lang gihapong panagat og mga imidjis,
hangtod makuha sa hingpit ang triks,
mora kag bag-o pang madjikero nga
nabilib sa isli op de kamotis
nga imong gipraktis:
nagsulod og hangin sa poko, mikuot
bay goli, lantaw og unsay imong kuha:
usa ka pungpong nga aprikan disis,
sumpay-sumpay nga panyo,
kung swirtihon ka, naay duha ka pati,
makaipsot, og mo sagol sa kapunawpunawan,
di na ka kasulti, kon asa mobatog.




Sa Poetry
Rolando Tinio

Sa poetry, you let things take shape,
Para bang nagpapatulo ng isperma sa tubig.
You start siyempre with memories,
'Yung medyo malagkit, kahit mais
Na mais: love lost, dead dreams,
Rotten silences, and all
Manner of mourning basta't murder.
Papatak 'yan sa papel, ano. Parang pait,
Kakagat ang typewriter keys.
You sit up like the mother of anxieties.
Worried na worried hanggang magsalakip
Ang odds and ends ng inamag mong pag-ibig.
Jigsaw puzzle. Kung minsan, everything fits.
Pero sige ang pasada ng images
Hanggang makuha perfectly ang trick.
At parang amateur magician kang bilib
Sa sleight-of-hand na pinapraktis:
Nagsilid ng hangin sa buslo, dumukot,
By golly, see what you've got---
Bouquet of African daisies,
Kabit-kabit na kerchief,
Kung suwerte pa, a couple of pigeons,
Huhulagpos, beblend sa katernong horizon,
You can't say na kung saan hahapon.

Ang Utin Ni Bro. Ely
Madel Mercado

(Salin mula sa "The Pope's penis" by Sharon Olds)

Nakabiting patiwarik
sa loob ng kanyang pantalon,
isang maselang tubo sa gitna ng kampanilya.
Ito'y gumagalaw sa bawat galaw niya,
parang bilasang igat namumugad
sa damong-dagat, ang buhok sumasayaw
sa dilim at init---at pagsapit ng gabi
habang siya'y nahihimbing, ito ay tumatayo
nagbibigay puri sa kanyang panginoon.

ang neto sa santo papa


gibali pagbitay
sud sa iyang karsones
usa ka delikadong tubo sa tunga sa kampana
kon molihok siya, molihok sab ni
morag langgam nga igat
nagsalag sa ibabaw sa mga sagbot sa dagat, ang buhok misayaw
sa ngitngit og kainit --- pag-abot sa gabii
samtang siya natulog, motindog ni siya
aron pagdayeg sa iyang ginoo.

malipayong pasko

malipayong pasko

wala'y komedya
wala'y surahay
kanang tininoog
kanang wala'y
binuangay
kanang wala'y
pamuyok og
pag-olog olog
og pagsurang
surang

bitaw bay,
malipayong pasko diha

og kon duna pa gani sobra
masanagon pod unta
ang imong
bag-ong uyab...
aw

bag-ong tuig diay.

sa iyang adlawan.dugay nang patay si pikoy (alang sa akong amigong dali kaayong natigulang tungod sa kadaghan sa iyang suliran)

sa iyang adlawan.dugay nang patay si pikoy (alang sa akong amigong dali kaayong natigulang tungod sa kadaghan sa iyang suliran)

maayong buntag ilong
og ang ilong mitubag og maayong buntag usab

apil na ang iyang mga mata, ang iyang duha ka dalunggan,
ang iyang kilay
ang iyang mga kamot og ang iyang mga tiil
ang iyang mga kumagko
silang tanan nanubag sa dihang iyang gihanggad sa
usa ka maayong kabuntagon

mitan-aw siya sa ubos, iyang gipiso ang iyang tunga
iyang gihagwa, gibag-id, gikumot, giinat, gigitik,
gikusi, gipalpal, gikiyod-kiyod
apan wala gayod kini milihok
wala mibalos sa iyang pag-ingon og
maayong buntag pikoy!

og siya nakaingon, sus pikoy og buhi ka pa lang gihapon karon
moapil ka unta sa kasadya
sa akong adlaw.

PAGPANGHATAG

PAGPANGHATAG

ang giilok-ilok sa ilok
ang gitagoan sa sipit
ang gilubong mo og
kinse brasas aron dili
na nila makita og
mapangayo, kining

tanan, samtang sayo
pa ipanghatag na lang

wala ka ba kakita kon
giunsa kini nila pagkuha
sa kang bisan kinsa nga
nagdumili sa paghatag?

usahay ang bayag niana
mao ang gaba nga dili
baya magsaba, usahay
mas pait, kamatayon.

pasalamat

pasalamat

gibalikbalikan sa halang nga kahinam
ang nakapaghimata kaniya
sa matag adlaw sa matag gabii
gitutukan, gihikap, gihalokan,
gigakos, gikatulgan, gidamgo,
hangtod nga miabot ang usa ka
gutlo nga nagsulti kaniya nga
nahuman na ang tanan og ang
gana nawala na og kon iya pa
kining usban sa pagtan-aw
isuka na niya ang mga nangagi
og ang karon,

nakapangagho siya, miginhaw og
haskang laloma, og miyukbo siya
sa yuta, mihalok sa balas, miukit
sa mga abog, mitindog, og giisa ang
iyang mga kamot, mihangad sa
langit og

siya mibungat sa usa ka pasalamat
tungod kay karon gawasnon na
siya

patay na ang tanan nga anaa sa sulod
sa iyang kasingkasing.

pagkabibo sa among pasko

bibo
mi sa balay
daghan mi diri

ako
si emma
og ang among
mga iro og ang ilang mga
itoy

kini ang wala nimo makita

kini ang wala na nimo
makita
imong gustong ilubong
ang imong
hulagway sa likod
sa balay nga nipa
sa kilid sa punoan
sa nangka nga wala
na mamunga
sa layo dili na nimo
kaayo maklaro ang
usa ka iro nga puti
nga dunay puntik
nga itom sa iyang
wala nga mata
gutom
nangarol
bahong patay
nga baki

wala na'y tawo kining
balaya kay
amo na usab kining gibiyaan

ang nagpabilin lamang
mao ang
mga handurawan nga
nagpunay og
hinuktok
sa kilid sa bintana
nga hagbay
rang nadugta

ang iro
gibitik
gihimong sumsuman
sa mga palaigit

ang lubi nga
tigulang
wala gyoy mga
pulak

ang kabaw
gikitlan
og ilang gipaambitan

ang dalan
nangliki na sa
kainit sa
dakong hulaw

kini ang dili
mo na gusto
nga mabati

apan sayod ko
sa pag-abot sa saktong
panahon

ato lang gihapong
balikan

duha ka hinigugma

ang akong
pinalanggang goldfish

og ang akong
kadulog nga iring

akong gihunahuna
karong gabhiona

kon unsa ang akong
ihatag aron
malipay silang duha,

christmas wish sa iring
bisag usa na
lang unta ka goldfish

christmas wish sa
goldfish
wad-on ang iring

ang iyang kasub-anan wala'y anino

mas maayo pa kining mga alibangbang
kay makita nila ang ilang anino

kining iyang kasub-anan
wala

dili niya mailhan kon unsay
hinungdan
og unsa unya'y nilugdangan

dili niya mahibaw-an
kon unsa ang tambal ning tanan

panagsandurot

kanang maghugpong
nga wala'y kwentaha'y
unta kon kinsa
ang mas init og kilid
kon kinsa ang mas
daghan og balahibo
kanang magdutdota'y
lang nga wala'y
lalis og away
kanang ang atong tuyo
mao lamang ang
panagdait

pagkalami gayod unta
sa bation
karong pasko

malinawon nga daplin sa baybayon

nindot unta
nga sa pag-abot sa pasko
malinawon ang
mga kagabhion
sama sa usa ka daplin
sa baybayon

walay ulan
walay kisaw
gawas lamang sa
panaghunghong sa
mga balod
nganha sa balas
ngadto sa mga bato
nga namati lamang.

sa dihang nahulog na si Icarus

diha sa paglupad
pataas ang iyang kagawasan
tinabangan sa
iyang amahan

sa dihang mipataas pa siya
padulong sa adlaw
bisan pa sa pagbadlong sa
iyang amahan
sayod ka nga
nahilis ang iyang mga pako
nga gihimo gikan
sa kandila

pagkahulog ni Icarus
namakpak ang
katawhan
kay gikalipay nila
ang kapakyasan
sa uban

pagpakabuhi

nakita na nimo
unsay ilang
gibuhat matag
gabii

naghimo silag
mga ginagmay
nga mga estorya
morag mga
ginabas nga
kahoy nga
ilang gisugnod
gidugangdugang
aron
magsige pa gihapon
og dilaab
ang kalayo

aron lang unta
magpabilin ang
kainit alang
sa ilang
pagkapakabuhi

ang atong mga posibilidad

pagkahuman sa dakong bagyo nga
mitay-og kanato

nga miguba sa atong balay
mianod sa atong mga sapatos
mibali sa atong mga caimito

mobalik ta sa naandan
wala na tay pangutan-anay kon
asa ka paingon
og unsay atong buhaton
o magplano pa
kon unsaon ta pagsulbad
kining atong kahimtang

dili na ako mangutana niana
balikan ko na lang ang
akong ginabuhat gikan pa ko
sa gamay
hangtod na sa akong katiguwang

manilhig sa nataran
mamunit og sagbot
mamul-ong sa kahoy
manglampaso
maglung-ag og saging sab-a
magtusnob og ginamos
sa gikumot kumot nga
luto

seguro magbuntagay kog
dula og unggoy unggoy
o magdomino tang upat


basin mobalik kog basa
og mga balak
balikan nako ang mga
tanghaga

kon pananglitan og ikaw ang makauli sa balay

pakigsulti lang sa atong iring
nga usa ray mata
diha sa atubangan sa atong
pantawan

dili na siya dali mahiubos
sama nako

aduna ra gihapo'y panahon

ayaw kabalaka higala
aduna ra gihapo'y panahon nga ang imong gidamgo
matuman

ang mga damgo kamaong magpaabot
lalom ang ilang mga pailob
og moabot ra ang panahon
bisan kanus-a og bisan asa
(wala ako'y saktong kasayoran niini)
nga kini maabtan mo ra
mahikap mahagkan magakos

ang mga bintana mangaabri
og ang mga pultahan
magnganga
ang langit matunga og
ipakita kanimo ang agianan

mora ka og anaa sa pantalan
diin miabot na ang barko
og ikaw ang pasahero

og dayon dalhon ka sa lugar nga alang lang kanimo
nga sukad sukad wala pa gayod nimo makita

kasub-anan

kinsa ba'y nasayod nga ang kasub-anan
adunay daghang pako
nga kini sila morag mga maya
nga kusog kaayong manglupad
og morag mga dangan
nga mopatong sa usa ka dakong
maisan og hutdon og kaon
ang tanang mga dahon
hangtod nga ang mabilin mao
na lamang ang usa ka upaw
og gamala na nga
bungtod?

sayod ako niana.

kinsa ba'y nasayod nga aduna gihapo'y
tawo nga nagpabiling mapailobon
sa mga panghitabo
og kanunay kining nagmalaomon
nga sa iyang paningkamot
og buligan sa pag-ampo
ang mga dangan mamahawa ra
og ang maisan og ang kabungtoran
mahibalik ra gihapon sa ilang
naandan?

manubo ang mga pugas
og mga bulak og mga kahoy
og mahibalik ra ang mga
alibangbang og mga langgam

nasayod ako niana
mitoo ako niana

sayod ako nga ang kasub-anan
dili mologway

ako ang nagpabilin
og andam na usab mobalik sa akong agianan
naghinamhinam
na usab sa usa ka pagsugod

dinhis among lungsod

kalaming pakugon ang duha ka ulo
sa mayor nga nagmugna og
bulangan
atbang sa simbahan og sa

kura paroko nga
nagpakahilom lamang

mananap
tawo ginoo
mananap
tawo ginoo

tudlo og
ngipon

baba sa
kamot

usa ka gabii niana
nasakpan ni lolo jose si
nancy og paul
nga naghalok sa silong
sa dakong balay
nga karaan

abi ni nancy og makasab-an
sila og si paul
nangurog sa kahadlok
basin og
mabunalan sa baston
sa tigulang

apan ang tigulang
mikatawa lang og
milabay og
nagsultig -
"hala, ugay, ugay,
hala ugay, ugay jud
og lagay!"

Mga Simbolismo sa "Sayaw sa Kinabuhi" ni Munch

naglantaw ang
Pangidaron nga gasanina
og itom

nagdilaab ang
kasina

samtang ang
Kinabuhi misayaw
og palami
sa gapula nga
Kaulag og Kahigal

naglantaw usab
ang gaputi nga Kaputli
nga nagpakaulay
nagtabisay ang
laway

ang mga bitoon sa langit

alang kang binsoy
ang mga bitoon sa langit
mga baga
sa oling
ang mga panganod
lukot-lukot sa
dagat
ang mga balay sa
ubos mga
kuto
ang dakong kahoy
anino sa
kumo sa kagahapon

walay gamit ang
katarungan
gaawas ang kasuko
sa kasingkasing
gustong manimalos
ang tanlag

alang kang binsoy
ang kalibotan pusoy

kon abtik kaayo ang imong mga mata

imo untang makita
nga ang atong mga kamot
wala na mag-abot

didto sa Japan

didto sa Japan
dancer ang akong gwapita nga ig-agaw

cultural dancer
mosayaw siyag tinikling
og kuradang
og pandango sa ilaw
og singkil
og nobody nobody but you


walay sanina.

ang sayaw kuno sa kinabuhi

ang kinabuhi kuno
dili baya sayaw

mas daghan kuno ang
layog.

lamat

awat awat lang
ang karaan mao ang gibuhat sa duha ka kamot
dayon ang usa larawan sa mga lalaki nga niwang
karon sa kabag-ohan nga teknolohiya
ania ang mga tambok nga babaye
sa laing sayaw sa kinabuhi
ang wala mabag-o mao lamang
ang pagtuyok sa kalibotan
ang lingin
ang lilong
ang pagkahubog
ang pagsamparay

ang wala lang nimo makita
mao ang pagkadam-ag

ang ''guilt" ang "struggle within"
sa matag tagsa kanato

kay sa likod ning tanan
anaa ang linlang
ang limbong
diha sa lamat-lamat

ang sayaw sa kinabuhi

ang bag-ong magtiayon
nanirado sa bintana og ang katre
miagik-ik og ang kahilom sa mga
carpet og ang
agulo sa ref
didto sa kusina og
duha ka baso
og plato nga
wala mahugasi

ang mga bulak
sa hardin
nga gihapuhap sa bugnaw kaayong
hangin
og ang huni sa ulan nga bag-o lang miundang
kuyog sa usa ka
nindot kaayong pagsalop sa adlaw
sa bag-ong kagabhion

ugma atangan sa kaadlawon
ang masanagong pag-abot
sa bag-ong adlaw
sa malipayon kaayo nga
kabuntagon
nga giawitan sa mga kalanggaman

sa kakapoy
wala'y kisaw ang kusina sa bag-ong magtiayon

gusto na nga manungkab
ang iring nga pution
nagtuk-ong sa kilid sa bintana
dapit sa banggera
nga gibutangan
sa usa ka nagnganga nga
kulon sa
diwit nga inun-onan

kining akong gipanulti

kining akong gipanulti og akong gipanulat
wala ko na kini masabti

gitunol lang kini kanako kagabii
sa tawo nga wala nako mailhi

ang uban gihunghong samtang ako nagtapilaw
diha sa tungatunga sa katulugon
og paghimata

ang uban ganihang kaadlawon samtang ang
kalibotan nagduka pa gihapon

ikaw nga nagbasa
nagbasa lamang

misabat sa akong gipanulti kanimo
miawat-awat sa akong mga pulong
sama sa usa ka pula nga langgam sa
kagulangan sa palawan

wala ka usab makasabot apan wala ka
nagbangutan niini

nakasabot ka sa akong dili pagkasabot
og sa imong wala pagkatugkad

anaa lang gayo'y mga butang nga sama niini
og hagbay ra nato kanang gidawat

ingon si Voltaire
mao kini ang metapisiko
apan alang kanako labaw pa kini sa metapisiko

kay dili pa kini mao
kay dili pa kini ang kinutuban

ang sayaw sa lingin nga kalibotan

morag kadena ang
kinabuhi og ang kalibotan sayod ka lingin
og kita naglibotlibot
niining sayaw nga lingin
sud sa lingin
sa atong mga tunob
nga nagkariling

hawid sa kamot
sumpay ang mga bukton
sa panaghiusa
diha sa kasubo og sa kalipay
awit sa kamingaw
mohilak mokatawa
mohilom
mobakho, unsa pa ba ang wala nato mabuhat
dinhi?

nanaghan ta
gitabangan kita sa panahon
mituyok ang kalibotan
migilak ang mga bitoon
misubang ang adlaw
mipasiyo ang bulan

mipanaw ang mga tubig sa sapa
mipanaw ang atong mga higala
naglingkod kita sa dalan
morag dunay dakong hitabo
nga gipaabot

unsa pa ba ang atong mabuhat
dinhing dapita?
unsa ba ang angayan og dili angayan?
unsa ba ang imong gihunghong kanako
nga nakamugna man ako
og pahiyom sa akong
ngabil?

sayawon ko ang kataposang sayaw
og ikaw nga gustong magpabilin
ang moawit

kasubo sa imong awit
kahinay sa akong mga tiil
kabug-at sa akong mga kamot
kalalom sa akong mga mata
ang kahinam sa akong
kasingkasing
dili na nako matugkad

sa unahan aduna'y nagpaabot kanako
milantaw ko
apan wala gayod ako'y lawas nga nakita
gapnod lamang
bugnaw nga hangin
gadahunog nga ligid sa kapalaran
nagpaingon kanako

ayaw og sabta nga nanamilit na ako kanimo
kay ikaw paingon baya usab didto

ikaw ang iyang inahan

wa ko makatoo
nga sa iyang adlawan
ang imong gihatag
mao ang dili makaon
nga mga pulong

alang kanimo
ang tanan niyang gihimo
sayop
dili nimo madawat
ang kamatooran
nga siya imong anak
og ikaw ang
iyang inahan

sa dihang imo na
siyang gisagpa og gilud-an
nakapanglingo-lingo ko

didto nako nakita
nga usahay ang kinaiyahan
wala'y kasingkasing
bisan na gani seguro'g batikolon
wala lang gihapon

wala ka gani kataha
nga ako ania lang gihapon
nagmahal kaniya

dili namo mabungat
nga usa lang ang among gipaabot
ang usa ka pagpista
og pasalamat

ang imong haya puhon
ang imong hinanaling kamatayon
og sa Diyos unta kami
pasayloon

palihog

palihog ayaw na tagda ang mga gimbuhaton
sa akong lawas

ang akong mga tudlo dili na kini mabut-an
gani ang akong mga mata
nagpunay man og lalis sa akong mga tiil

wala na ang kanhiay nga panaghiusa
tungod sa ilang pagkagawasnon

ang akong mga buhok nakigkunbuya sa hangin
ang akong ilong nakighalok sa mga tood

gustong matulog ang akong mga hunahuna
apan ang akong pus-on nagtinga

ang akong mga ngabil gustong mobuklad
sama sa usa ka talulot nga gustong mahimong buwak

daghang mga pangandoy
sa hamubo lamang kaayong panahon

giihap sa mga pipila lamang ka tudlo
ang nagpanikad nga mga panaw

sa tumang gugma

anaa ang kagabhion
og adlawan sa imong hulagway
anaa ang kainit og kabugnaw
anaa ang paghinumdum
og dayon ang pagtay-og
sa kalibotan

nagmasulub-on ang bulan
nga namati sa usa ka awit sa usa ka sapa
midagayday ang mga luha
sa aping sa langit

ang imong nahinumduman mao lamang
ang kakusog sa ulan
gabii

nahikalimtan mo ang labing bililhon
samtang ikaw nahinanok sa
kalipay
sa ibabaw sa iyang mga bukton

nahimuot ka sa pag-agas sa busay
sa tungatunga sa mga paa sa usa ka bato
nga gilumutan

aduna ka ba'y isulti kanako?
pamation ko unta ikaw

ang mga pulong og ang mga hunahuna

ang imong mga gibuhian nga mga piso
kadtong nag-iyagak sa kasagbotan
nga nahabulag sa ilang inahan
nga imong gipasagdan
nga mabuhi
sa pagpangakha sa ilang kaugalingong
mga wati aron mabuhi
kaniadto

karong hapona ilang gitabonan ang adlaw
mingitngit sa ilang kabaga
nangita sa imong mga sanga
kay sila namalik
aron mobatog

og ikaw dili na makadagan o makatago
ikaw ang punoan
og ang imong mga sanga ang ilang
panimalay ang ilang kataposang
batoganan

ang imong mga bakak

tabuni ako sa imong mga bakak
himoon ko kining habol
sa katugnaw sa akong lawas

pahumuka ang mga pulong
aron akong mamahimong alugnan
ang imong mga bakak
sa akong katulugon

dili ako usa ka estranghero
kanimo
usa ako ka gugma nga nahinanok
sa imong mga paghimakak
kanako

usa ka
ka damgo alang kanako
nahikap
nahagkan
og igo na kana kanako nga balon
sa akong
sunod nga taliabot nga
panaw

ikaw, oo, ikaw

mahimong wala ako'y relihiyon
mahimong dili ako maghunahuna kabahin anang
kaluwasan
mahimong dili nako ilhon ang akong gilabyan
og gihimamat

apan dili mahimong dili ako makigsulti nimo
karong gabhiona
mamatay na ako sa tumang
kamingaw

lutaw

ang hangin sa pasko
wala usa'y kukalooy nga
mipalid sa usa ka dahon
didto sa bungtod

nahulog kini sa sapa
naanod
dugay kining naglutawlutaw

wala'y nangambat
wala'y mipunit

nahisama niana ang akong
kalag

pagpaabot

gisulayan og pilo ang hangin
makaduha, makatulo
kutob lang sa makatulo

gihanggab og gisulod sa dughan
ang hangin
gihipos kini didto og hangtod na
kini sa pasko

natulog ang kabalaka

NASULAYAN MO NA BA?

NASULAYAN MO NA BA?

dili ko nimo mangutana
kon nasulayan mo na ba ang
katorse,

dili kana mao ang akong tema
karong adlawa

og sayod ko nga wala ka na'y gana
nianang klaseha sa
pangutana
basin gani og gilood kana
niana

og busa
akong usbon ang mga pangutana:

nasulayan mo na ba ang matulog nga
mag-inusara gikan sa buntag hangtod sa hapon
kanang manginit na ang imong likod
nga morag gidabdaban sa baga
kanang imong dughan nga wala na'y sulod
nga morag wala na gani tingog ang imong kasingkasing
kanang gusto nimong ipiyong ang imong mga mata apan
wala'y madaginot nga katulugon
kanang morag mibuhakhak ang kisame
nanungog kanimo
kay ikaw morag usa na lamang ka kahoy nga
giputol og gikuhaan sa mga sanga og dahon
nga nahapla sa kilid sa
dalan nga lapokon

ayaw ko og pangutan-a kon nasulayan ko kini
napul-an na ako niini
naanad na
og kon adunay mangutana
pasensya
kay tubagon ko lang kini sa usa ka pahiyom
og bugnaw kaayo nga
manuhotnuhot nga
kahilom

kini si bukowski

kini si bukowski
dili ang balak
kon dili ang debuho
sa usa ka toro
nga misungag
sa pula nga saya
sa usa ka kuragan
sa iyang sungay
ang lingin nga bulan

ang gibati

sa kadaghan sa mga tawo
sulod sa dakong balay
nga daghang pagkaon
og kalingawan
diin ang mga bata nagdakpanay
og ang mga dalaga og ulitawo
nagtinan-away
diin ang mga tigulang nga babaye
namaypay
nagpungay og pamantay
diin ang mga tigulang nga lalake
nagpabulhot sa ilang
nga hunsoy
diin gitukar ang banda
ang tingog sa usa ka dakong martsa
isip tagbo sa miabot nga
dakong tubol sa katilingban
ang inila nga hari sa
lungsod

natanga ko nga
naglingkod
gibati nako nga ang akong
nawong nahilis
morag usa ka plastik
nga baso nga gisunog
sa dakong kayo

anaa ang dakong gubat
sud sa akong dughan
wala'y midaog
ang tanan
nga nanag-away
pulos nangamatay

wala na'y gahom ang mga pulong tungod sa hilabihang katahom

ang kaanindot sa kahilom
kon tugkaron kini
sama sa usa ka lalom kaayo
nga dagat
nga atong gisalom
daghan kaayong makita
sud sa iyang tiyan

ang mga mabulukong mga bulak
sa dagat
ang mga bukid og ang mga walog
ang mga nagtago nga katahom
ang mga dili matukib
ang mga dili ikapanulti

tungod kay wala na ang mga pulong
nga makagapos niini

pagpakahilom

sa paglabay sa daghang
mga adlaw
nawala na ang mga katingala
milambo ang
pagsabot
mikuyanap ang pagpailob

ang tanan nga iyang natagboan
iyang giyango
wala na ang kasamok
nahupay na ang daganas sa kasaba

wala diha ang yangongo
sa kabugnaw sa hikap sa kahilom

kabuntagon

og nganong gitubuan og bungot
ang sunoy
wala na mag-ambat ang
baboy nga
gihubagan og itlog

nagtagbo silang duha sa likod
sa kamalig diin ang
usa ka inaan
naglomlom sa iyang siyam
ka itlog

respeto ginagmay
walay pangutan-anay

miyango ang sunoy og ang baboy
miduko og mipahiyom og dayong lakaw

padulong sa tunaan
samtang ang sunoy mibirig birig
sa laing himungaan

pagkaoran-oran
nadungog ang putak-putak
buntag na

gamhanan

sayod ko nga ikaw kadtong gamay
nga ulod nga naglatay
sa gabok kaayong tanod og ako kang
gilantaw pag-ayo
og nahadlok ka

ayaw kabalaka
kay dili nako putlon ang maong tanod

ako kang irokon.

unsa kaha no?

unsa kaha no
kon nakakuyog ako sa convoy
paingon sa shariff aguak
og naapil ko
sa gimasaker nianang
ginganlag ampatuan?

ahh, seguro
dili ko na igkita ang akong
usa ka kamot
og ang akong atubangan
og sampot
maayo gyod segurong
pagkabotbot

ahh, seguro
ikuyog akog lubong
didto sa dakong buho
sa taas sa bungtod
kuyog sa akong
easyride nga
gakagolkol sa
kaguba

ahh, kanang panahona
mabutang na gyod
seguro ang akong
nawong
nga nagusbat sa
bala sa armalite
sa front page
sa Inquirer

unsa kaha no?

buyag. simbako.
ipalayo
sa pito ka lawod.

sikat kaha ko?

nadungog mo ang pagkabuntog
sa kahilom sa pag-abot sa kasaba

pagpaabot lang kay sa pipila ka gutlo lamang
madungog mo na
sa kataposan ang kadaogan sa kahilom

mas lig-on
mas balaanon
mas bililhon
mas gikinahanglan
mas halangdon

kay sa kataposan mao lamang kini ang molungtad
kadtong sa una
kadtong imong gianggaan og

dyotayng kahilom.

ang lumba sa dagan

ang lumba sa dagan
didto sa disyerto
sayod ka maoy atong gibuhat
sa matag adlaw
wala'y imnanay og tubig
sige lang dagan
wala'y ambatay og naunsa na
ang imong tupad
nakita mo ang gidangatan sa
mga nauna og
naulahi
wala ka malisang og
kahibawo ka na sa imong dangatan
wala ka gihapon malisang
wala ang kahadlok
kay ato kining tinuyuan

walay tubig walay pan
walay ambatay
walay paambitay
mao kini ang atong gituyuan
walay basolay

diha ang pagpahulay

and dula-dula og ang tinooray

mas nindot dagway kon
dula-dula lang tang duha

ako ang imong uyab-uyab
pwede pod nga bana-bana
og ikaw ang akong asa-asawa
diha sa atong balay-balay
maglung-ag lung-ag ka
magkaon-kaon tang duha

pagkahuman sa atong dula-dula
magbulag-bulag ta
ikaw sa inyoha og ako sa amoa

og didto sa inyoha og sa amoa
sugdan na dayon ang
tinooray nga pagmug-ot sa mga
dagway
sa pagbundak sa mga tunob
nga kusog
sa pagtutok sa kisame
sa dili pa una matulog

diha sa kalibotan sa tinood
lantawon og iphon nako kong pila na ka tiki ang
nahulog sa matag alas sais
sa hapon pagkahuman sa orasyon

pila ka lamok ang nakasulod sa kwarto
nga wala nako mapatay
pila ka ok-ok ang naglibot-libot
og naglupad-lupad sa atong
kasilyas nga wala nako
mapidyat

og kita magbungol og kita maamang
apan suma sa saad
wala baya gyo'y bulagay

sus kinsa god ko?

ambot og ngano nga imo
mang gihandig ang akong pagkaako sa akong mga

balak.
kapila ko ba

ikaw ingnon nga ang akong mga balak
dili kana ako

lahi ako, ako ang ako
og dili ako ang balak

mga pulong lamang
mga bula sa akong baba

samtang ako nahikatulog
sa kakapoy

mga gaway kana sa akong
laway nga nagtabisay sa akong mga ngabil

nanimahong patay

ayaw palihog og
tugkara kon kinsa ba gayod ako

daghan na
ang nalumos daghan na ang namasol

og bisan unsa kadugay
sa ilang pagpailob

miuli sila nga walay kuha
walay sulod ang ilang sibot

subo ang ilang nawong
namatyan og suga ang ilang mga baroto

didto sa tungatunga sa dakong lawod
sa kasakit

dili ako angayan
nga imong sundon kay wala usab ako kahibalo kon asa ang akong kapaingnan

dili ako ang balak
dili ako ang imong pagtoo