ang nahitabo

kaniadto adunay kutsilyo nga
miputol sa akong lawas
nahimong duha

og ang usa nagkisikisi nga morag ikog sa tabili
ang usa
naglutok nga mitan-aw sa iyang kaputol

ang paglabay sa panahon
nagpatubo sa bag-ong pagbati
kini lahi

ang mikisikisi
nahunong og kini sama sa mibulag kanato
nadugta rag iya
wala na gani kinahanglana pa ang paglubong

ang nagdugo nga kasingkasing
mikaging
ang samad naalim
og ang akong mga mata naalam-alaman
sa kabugnaw sa hikap sa mga kamot
sa panahon

mora akog bata nga naglingkod sa usa ka habog nga bungtod
og mitan-aw sa dakong tiyan sa dagat
nahibulong apan sa paglabay sa pipila ka gutlo
mitoo
nag-ampo, misimba
mihay-ad sama sa usa ka itoy
og dayon nahitatulog