Friday, May 22, 2009

dili makurat sa linti

humok nga yuta ang iyang sinugdan
apan sa kainit sa adlaw
nauga, natig-a nahimo siyang
usa ka tibugol

milabay ang daghang panahon
diha sa pagkahulog sa mga dahon
og pagkabali sa mga sanga
tungod sa makusog nga hangin

kamao na siyang moligid nga dili
na gani masabod sa lapok
o mawala sa baga nga sagbot
o mahadlok sa tunok

kusog na kining motutok sa adlaw
bisan sa makapago nga kaudtohon
walay kahadlok
og wala na mabuntog
sa baga og kalayo

wala na kini siya masayod
kon unsa ang kapungot kasuko
pagdumot
kon unsa ang kalipay
kon naa ba ang himaya

dili niya madungog ang dalugdog
og sa linti dili siya makurat
kining bato
nga ang sinugdan mao lang baya
ang humok nga yuta



No comments: