pipila na ka tuig human sa kasal

sulod sa CR
luag ang akong brief og ikaw wala na'y bra
nagbitay ang imong totoy
og naglabyoglabyog ang akong lagay
gihimas nimo ang imong buhok nga nanipis
og gisapot ko sa akong tubol nga dili ma-flash
nakalimot na kog hubo sa akong sapatos
og wala ka na masuko nga nalapok ang salog
nagpasad ang bula sa sabon gikan sa bathtub
ang hair sa imong flower wala na'y pul-ong
kahinumdom ko kaniadto
nga nangutana ka kon ako nahigugma ba gayod ako kanimo
og miingon ko
nga ang akong utog maoy pasultiha
apan misimang ka sa dili komedya
nga kon kunuhay sakay ta sa M/V Victoriano
paingon sa Sugbo
og nalunod ang barko dapit sa Apo kuyog sa akong inahan
kinsa ba ang akong salbahon?
siempre miingon ko nga ikaw jud
og mikatawa ka
kay wala gayod mausob ang akong pagkapuyok og
pagkabakakon

karon dili ka na madutlan sa akong mga bakak
og ako dili na usab tig-mind sa imong kadelikada
hapit sa tanang butang
pati na gani ang tikod sa akong sapatos
nga dunay tsewing gam
easy-easy na lang
gidawat bisag unsa ang moabot
sa atong kinabuhi

usahay maghinuktok ko sa kilid sa bintana ning bay tang daan
atubangan sa takdol nga bulan
naghunahuna ko kabahin nianang malipayon nga kaminyoon.