giunsa ba nga mahimong usa ka maayong balak ang NO SMOKING?

Ginaingon nga ang balak
kinahanglang mamungpong ug mga tanghaga

unya ang Kamingaw paiyakon ang Kahilom
pasyagiton
ang Bulak gani mahimo man kining usa ka
maanyag nga dalaga nga
gisuyupan sa mga Buyog sa iyang Nektar
nga kaanyag

Giunsa mo ba paghimo ang No Smoking nga
usa ka balak unsa ba ang tanghaga niini?

ang iyang tanghaga naa diha sa pagpatay nimo
sa imong puya samtang giduyan sa iyang nanay
diha sa kuna unya ikaw siging gapabulhot nga
naglantaw kay gikalipay mo ang imong unang
liwat

ang imong kalipay maoy nakapatay kaniya ug
wala ka masayod niini

sa dihang gilubong na ang bata gisuntok nimo
ang nawong sa bulan nga nasamdan sa imong
katanga

unya human sa pipila ka adlaw nasayran na usab
nimo nga ang totoy sa imong asawa mihubag
kini ug unya mipagawas ug nana imbis gatas
sa bata nga wa pa gani makwarentahe


ang pagpanigarilyo usa ka Aso sa Kamatayon
nga sigi nimong gibuga diha sa tawong imo kunong
gimahal pag-ayo

ug wala ka masayod nga ikaw, ug ikaw lang gayod
ang matood nga hinungdan sa tanan nimong
kasakit kay ikaw mismo wala man masayod sa
imong kabuang

nga kon makasulti pa lamang ang Lawak, ang mga
Hapin, ang mga patay nga ngabil ug baga sa imong
asawa ug anak

Ipanghimaraot ka gayod unta nila hangtod sa imong
kamatayon