Dili ko magsusulat. Mamaligyaay lang kog kamingaw Tigsuroy lang kog pinutos nga kahaw-ang.

wala ako
masayod nga ako
diay
ila na nga gidawat
nga usa ka
tigsulat

gibasa nila ang
akong mga
mugna

wa usab ako
masayod kon unsa
gayod ang tinood

nalibog na ko kon
dis-a ko gipunit ang
akong mga bakak

sa dihang gihisgotan na
nila ang kabahin sa
tinood
nakulbaan ko

basin ug tinood diay
basin ug ang bakak dili diay
bakak

basin kon ang mga bakak
nagtakuban usab ug basin
ang ilang takuban
mao gayod diay
ang matood

gisugdan ko lamang
ang paghulip sa akong
mga kalaay
gitakloban ko lang ang
mga abli
kay basin ug langawon
ang kabaho niini

gilingaw ko lang ang
mga kagabhion nga dili
makatulog ug mga
kaadlawon nga naglutok
unya wala kasuginlan

gihilot ko lang ang gasakit
ko nga liog
ang gaul-ol kong bukton

sa dihang giablihan ko ang
mga bintana
miingon ang adlaw
usa ka ka magsusulat

sa dihang migawas ako
sa pultahan
mipaghot pag-ayo ang
puti nako nga iro
ug mikiwil ang iyang
taas nga ikog

ayaw ka. Siya lang gayod
ang nakaila kanako.
Dili ko magsusulat.
Mamaligyaay lang kog
kamingaw
Tigsuroy lang kog
pinutos nga kahaw-ang.