didto sa Mr.Poon

ang mga nangamatay sa nalunod nga barko
mga numero lamang nga nagsigig saka ang kadaghan

kita nga naglantaw samtang naghigop sa kainit sa sabaw sa
white beef lomi ning kusog nga ting-ulan
sa Manila isip usa sa mga naistranded nga mga pasahero
pauli sa atong mga pinuy-anan
wala kaayo kabati sa galuha nga mata sa amahan
nga karon gibasol ang kadangag sa duha ka barko nga
nagbangga

ang iyang bugtong anak nga lalaki naapil sa mga nangamatay

misamot ka kusog ang ulan ug misaka na ang tubig sa
pultahan sa Mr. Poon Restaurant

kon ablihan ang pultahan sa mga laing miabot
morag nagkayagaw na usab ang kalibotan ug ang gabalita
pa gihapon didto sa cebu
kuli na nakong madungog

ang gasinaw nga chop suey gisugdan na usab ug kaon
dayon ang kutchay nga dunay tofu nag-aso-aso pa gihapon
sa atong mga baba
dayong higop sa hapit na mabugnaw nga service tea

ang gihimo natong suliran mao ang walay kisaw sa cebu pacific
kay dili klaro kon canceled pa ba gihapon ang flight pagkaugma

misamot kadaghan ang mga patay, misaka na ang mga numero
dili kaayo lalom ang atong mga kasakit kaysa kasakit niining
mga numero nga milabay lang sa atong mga dunggan nga gilumsan
sa kakusog na usab sa ulan sa dihang miabot ang madre kuyog
sa iyang duha ka alalay alang sa ilang
panihapon dinhi sa Mr. Poon

dili gayod lalom ang ilang kasakit hangtod nga mahibaw-an
nato nga kita maapil man diay unta sa maong
laing trahedya sa atong kadagatan nga hapit matag tuig
mosuyop ug mga tawo unya morag walay kahubganan
walay ugam

maayo gani kay nalangan ta sa atong paingnan