diha sa kabugnaw sa mga kabuntagon

matag adlaw madungog mo
ang nagkadiyang dangoyngoy sa
kalibotan

sa bag-o pa kini miduyog ka
sa danguyngoy niini ug
taas kaayo ang listahan sa
imong pangutana aron ipatubag
sa adlaw, sa bulan, sa mga bitoon,
nga igo lang milantaw, ug sa hilom
milabay lang usab dayon
sama sa pagbalibalik ug abot
ug biya sa panahon

naandan mo na kini
ang kanhiay danguyngoy nahimong
gininhawa na lamang sa hangin
tayhop sa kabukiran
aginod sa suba
pagtuklod sa dagat sa iyang mga balod
didto sa mga kiliran sa baybayon

ug nahimo kang taga-dinhi
usa sa mga lumulupyo nga ug dunay
moabot ug mangutana
igo mo na lamang itudlo sa imong
simod ang ilang padulngan

"tua didto, tua didto!" ug dayon mog
pauli sa imong gipuy-an
lingkod sa ang-ang sa hagdan
lantaw sa bukid ug paanod sa
lutaw sa gapnod diha sa kabugnaw
sa mga kabuntagon