ang buang

let him speak
he is a jesuit and and a medical doctor

mibawos ko

been a jesuit too
a fallen manna from heaven

sure he can

let him speak for himself
res ipsa loquitor

bawal daw sabi niya
nganong ikaw man ang manubag para niya?

letseha nimo oi
jawaa nimong babajeja ka

kining ilang gitawag ug nabuang
siempre

mibuhakhak ug katawa ug silang tanan
way duhaduha

mingtoo ug miingon ug amen

ug dayon ug tangtang sa ilang mga putong
ug mga kawo
nagpakita sa ilang
nipis nga agtang ug
buhok nga kuwang

ug namiya balik sa ilang tagsatagsa ka panimalay
nga daghang mga basa pang hinayhay
nga nanimahong patay

begin anywhere

kinsa tong di kasugod
kay galibog?

awat nako,
sugod bisag asa

batia
 ang akong gibati nga kalipay

kanang walay klaro
asang padulngan
ug walay
klaro pod gani
ang gisugdan

just do it lang god

kon sigi ka lang
sa

planning ug
iskiming

dili ka na ka
kaapas

anang dyas


fucking
doing it

don't judge, just be curious

ayaw paghusga
ba
pamati
lang

mas nindot
ning
kuryos lang
ta,

o di ba?

balik sa dati

ambot ba ning sitwasyona
mas daghan man hinoon kog mapupo nga bunga
kon isakripisyo ko ang pagsimba
sa simbahan diin ang sundalong pari
siging gadali gadali
ug kaon sa iyang mga pulong ug
paspas nga orasyon ug ako nga
nagpakahilom diha sa lingkoranan
nga layo na kaayog giabtan
wa nako tuyoa
nagkahibolos naman
sa tiyang garebolusyon sa
kapungot ug
kasakit.

shit shit shit
baliks a dati
bungol nga namati

ang mga sibuyas dahonan nga nanagan paingon sa sunny side up egg

sud diha sa plato ang sunny side up nga egg
gawas sa plato adunay mga giarrins nga spring onions nga morag mga sperm nga paingon sa egg

siempre any normal person will always have the idea nga kabahin kini sa fertilization sa usa ka ovum
sa babaye (alangan namag sa dinosaur)

ming comment lang god pod ko nga mora mora gyod ug kadto ug kining si SJ (nga para nako oa ra pod kaayo)mi comment, nga dili gayod kana maoy iyang gipasabot kay kuno sa iyang pagka SJ
bawal daw sa iya

saman, eyot ba ang akong gipasabot? saman, basin ganahan siyag ...eyot?

kinsa ba'y di ganahan aning putahea? bisan gani ang mga puros spring onions magshapol man gani
 usahay

unsa pa kaha ang ovum ngadto sa sperm? unsa pa kaha ang pasumbingay nga kinawrasan diha sa itlog
sa manok ngadto sa tag-as ug niwang nga mga sibuyas dahonan?

marginal notes sa sugilanon ni tarzan

ang mga sipat
makamao ng mosulat

ang mga but-an padaplin
sa makadyot

hilom

unya kamong mga
wala maapil sa pagkawat
sa avocado

ug wala magbilin ug tubol
sa dakong kaldero

ug wala maghikot ug
lata sa ikog sa iring

ug walay labot sa
pagsunog sa kakugnan
ni Dading nga
mikuyanap paingon
sa payag ni
Pasing

kamong wala manilip
sa panty ni Mam

ug wala miapil sa
pagplantig sa mga lapinig
didto's punoan sa
mangga ni
Tating

padaplin,pamati,
nabuang si tarzan ug kamong mga
tig-report sa iyang
kabuang

mao karon ang pagahukman nga
sad-an

magpanghadlok na kamo
kay kanang inyong mga liog
isab-it
sa karaang kahoy nga tugas
silong sa kainit

.

ayawg nag ikplin gawiks

gitapisan mo man gayod
ang bilbil samtang mipaso ka
paingon sa ubos
aron himamaton ang
kaasgad sa dagat

ayaw gaw
kay kon unsa kasuplot ang
imong bilbil
mao usab kana kalapad
ang natagmtaman mong
kalipay
diha sa tumang kakapoy
pagkahuman
diin giduaw ka sa tumang
katulugon
aron hikalimtan na usab
ang tanan

pung

wala magmugna na kinaiyahan

hilom kini, ug wala mangilabot

kita ang mga kisaw sa isda
ang mga paghot sa iro
ang mga pagarpar sa kalanggaman
ang pangagho sa pagpanghulog sa  mga dahon

kita ug kita lang gayod ang gamugna
kon unsa ang dagang
ug unsa ang iyang gigamit nga mga
hugyaw diha
sa gipiling mga pungpong.

away ning sayong kabuntagon

ang pan ug panyo
nagtapad sa puti nga
plato

bugnaw na ang kape
samtang samdan ang
bisagra

ang raynang tiguwang

pag-abli sa pultahan
motagbo ang lima ka iro
dayog uwang sa itom
paghot sa puti
kitiw ang ikog sa abohon
motuyok ang lubogon
ug sayaw ang ipok

ikaw ang ilang rayna
nga mopaso didto sa
simbahan aron mamati
sa unang misa.

pokus

ipadako
ang imong tutok

usa ka mata
lima ka pilok
ubos ug ibabaw

dunay usa ka
luha nga gabitay

naghikog

naysbyu

wa na mapanumbaling pa
ang tumang kakapoy:upat
ka oras nga lakaw ug
kusog ang ulan ug danlog
nga giagiang tinae sa
manok

nanglingkod tang duha
gatupad
sa dakong bato kilid
sa pangpang
ug sa unahan ang
mga kabungturan ug ang
iyang daghang mga anino
nga giaysingan ug
mga gabon.

ang ilang pagpanaway sa mga manuruyay ug santos

kadtong tomboyon
miingin nga alas dos pa lang
nanuktok na siya sa
iyang mga kauban

pagkaalas-tres
sugod na ang kisaw
sa ilang prosesyon
ug mga pangadyeon
diha sa kadalanan

gisaway sila nga
mga manuroyay ug santos
sa kadalanan
ug kadtong mga katulgon
pa unta
imbis puno sa grasya
napuno na hinoon sa
kalagot

ang tambok nga babaye
nahiubos pag-ayo
ug nanumboy nga sa
ilang paghago nga aron
unta mahilayo sa katalagman
kining balangay
walay utang kabubut-on
ang mga mapasagaron
nga naghatagan lang nila
ug pan de sal nga ang
kagahi
dili na angayang
hisgotan

Praningpraning

Inig sulod mo  sa lawak

Ang pultahan nahimong

Baba sa dakong sawa

Gusto nimong matulog

Busa mihay-ad ka sa kama

Pagpiyong nimo sa imong

Mata mituyok ang kalibotan

Kusog kaayo nga morag

Lilo sa dagat didto sa

Atbang sa isla sa Nonoc.

Nalilong ka ug kasukaon

Busa gibuka nimo imong mga

Mata aron pagpangita ug

Laing kalutsan

Pagmata nimo ang lawak

Nahimong  usa ka lapag

Ug ngitngit kaayong kawanangan

Ug bisan unsaon nimog pangita

Kon asa ka dili mo na gawod

Makit-an

Wala ka nay kalibotan

Ug ang sunod nga panghitabo

Sila na ang mag-asoy

Nadungog nimo pagkabuntag

Nga giguba nila ang maong

Pultahan ug aduna kuno silay

Gikuha nga dakong tawo

Gikan sa sulod nga gahangos

Nga morag mikatkat sa dakong

Bukid ug nagsigig panawag

Sa usa ka ngalan

Sa imong nahimutangan

Wala ka nay giganahan

karon wala ka nay ikasaway kanako

gisaway mo ang ulat
sa paa ug ang ap-ap
sa abaga

karon nausob ka


nanugilon siya kadtong
gisaway mo nga didto
sa kusina samtang kamo
lang duha imo daw nga
gisupsop ang ulat sa
iyang paa ug imong
gitilaan ang ap-ap sa
iyang abaga

ang hubag imong
gitutyan ug ang nana
imong giinom ug dayon
nimog tulon

mipadayon siya pagsugid
nga sa tumang kalami
nahinanok ka ug katulog
pagkahuman

kini siya karon nangutana kanako
kon ikaw tinood ba gayod nga
nahigugma ug mounong kuno
kaniya?


karon wala ka nay ikasaway
kanako

ug ako na usab ang manudya
kanimo

kon unsa ang mahitabo sa tawong
nabutaan sa gugma

wa damha

sa matag ang-ang
ug matag bato wa

mo handoma ang
panganod bisan gani

ang ugma damlag wa
mo kini damha unya

kalit mong nakita ang
dagat sa unahan samtang

ang hangin mitunol sa
imong pangandoy

pagsabot nga tiunay

gikan si Ekat
sa kabuang

pipila ka bulan
ang milabay dihang
gigaid siya sa
punoan sa doldol

domingo kadto
picnic sa baybayon

miabot ang bag-ong
buang
gasagol sa katawa ug
iyak sa iyang
pangag nga baba

gitutukan ni Ekat
sa tumang pagsabot
mitulo ang luha

apan karon wala
na kini sagol ug
katawa

yanong kalipay

sa imong pantog
nga kabuthonon

sa kilid sa pader
dihang nangihi ka

pag-agwanta

sa dihang nagsakay ka
sa bus paingon
sa Liliw
unya puno kini kaayo
ug wa nay hunong hunong
aron modawat pa
ug laing pasahero

kaihion ka kaayo

gipugngan mo apan
20 pa ka kilometro ang
daganon
aron ka moabot sa imong
kanaugan

kabuthonon na kaayo ang
imong pantog

sa matag adlaw sa nagpahiyom nga Kahitas-an.

sayon lang niyang yubiton
nga undangan na ang depression

"tiguwang ka na alang niana
wa ka nay angay
nagpakaulaw ka lang
sa atong mga kaliwat"

sayon kining isulti sa usa ka
babayeng wala nay kaligo
bulingon ang gisuot ug
nanimahong patay nga
bagtok nga nalata dayon
nauga sa sementadong
karsada

apan kon ikaw na ang
gigapos sa depression

wa ka nay mahibaw-an
kon unsa ang imong tinood nga ngalan
kon asa ka nagpuyo
ug kinsa ang imong ginikanan

sa dihang nakaikyas ka na niini
seguro masabtan mo na kon kinsa kini siya

kay sa dihang gihawiran ka na niya
milupad man gani  ang imong ispiritu
unya midagan kang gahubo sa karsada
mikatawa ka ug miiyak
dayon wa ka na mahinumdom
kon ngano ug unsa

usa ka buntag niana
sa dihang mibiya siya
nakita mo kon unsa ka bililhon
ang kaanyag sa kahayag
ang kabugnaw sa hangin nga misulod
sa imong baga
ang kabililhon sa mga nanghitabo
kaniadto nga unta samtang sayo
gikulitog, gihikap, giampingan
dayon kon unsa ang mga pangutana
matubag dayon sa way
tago-tago sa way diki-diki

kay ang bililhon mao lamang
ang kamatooran nga imong gidawat
gihambin ug andam nga ihalad
sa matag adlaw sa nagpahiyom
nga Kahitas-an.

ang nawad-an sa paglaum

adunay higayon nga ang imong lakaw
makalibog,
lahi ang tiil sa mga mata

ang mga tiil motikang sa makaduha
apan ang mga mata moatras
diha sa pagdumdom sa gigikanan

usahay diha sa kalibog mohunong ka
dayog pungko sa karsada samtang
ang usa ka driver nga hapit makaligis nimo
nagpangpeste ug nagpangyawa

daghang nanglantaw nimo samtang
wa kay nadungog ug wa kay nakita
kay didto sa sulod sa imong hunahuna
ang mga peste ug yawa nanayaw

usahay ang talan-awon sa karsada
mao na lamang ang tawong nahulpa
buak ang ulo ug naligo sa dugo
unya abi nimo ug dili kadto ikaw.

kon ako ang dahon
gusto ko nga ikaw ang ulod

kon ako ang baybayon
gusto ko nga ikaw ang balod

kon ako ang dakong bukid
gusto ko nga ikaw ang adlaw

kon ako ang agianan
gusto ko nga ikaw ang estranghero

kon ako ang dagat
gusto nako nga ikaw ang sakayan

kay mao man kana ang kanunay
mong gibuhat  kanako

ako ang siging mabilin
ug  ikaw man gayod ang
mobiya kanunay kanako.

sa bagang panon sa katawhan

mao kini ang imong papel

tiglingaw sa mga gasubo
imong ingnon sila: ginhawa ug lalom
itaas ang simod, sikop sa hangin,
ibulsa sa baga, ayaw una ipagawas,
hiposa kadyot, tingba, dayon
ibuga

sa kawanangan, ug lantawa kon
unsa  kainit ang gininhawa

pagkadaghan diay sa mga gamingaw
gawas ug sulod, puti o itom,
tambok ug niwang, walay pili ang
kasakit, walay pinihig ang kahigwaos,
pagkabalasubas sa kahaw-ang
nga milapos sa kanasuran ug walay
giila nga mga labat

miabot ang kangiob sa kalibotan
ug namati ka sa ilang hinagawhaw

ikaw usab misikop sa hangin diha
sa buho sa imong ilong ug imo kining
gihipos sa mga suok sa imong baga
ug imong gibuga sa kawanangan

walay pinihig ang kahaw-ang
apil ka sa mga numero nga napatik
diha sa bato nga bongbong

sa laing bahin, sa bagang panon sa katawhan
didto sa kahanginan, kinsa ba ang dili makapahiyom?

tigmo sa akong kinabuhi nga ang tubag dili ko malitok hangtod sa inyong kamatayon

makasina ang imong
kahimtang

nasulat mo ang
maanindot nga dili ko

man gani malitok
bisan ug silaba lamang

tungod kay managlahi
baya ang atong gipuy-an

dinhi sa akong sinugdan
gibali man god ang

kinaadman nga kon
akong litokon ako

man kining ikamatay
ug kon ako lamang kining

itiglom diha sa kahilom
kamong tanan mopahiyom

unya ako mabuhi nga
kunuhay malipayon

samtang ako nagpaabot
sa saktong higayon

aron isulat ko na ang
akong gikasinahan diha

kanimo nga kon akong
sugdan kamong tanan

magluya unya ako nga
mabuhi ania mag-inosara.

nga nagsigig hugyaw sa balita kabahin sa mga nadisgrasya.

gibiyaan ko ang
labi kong gikinahanglan

gigakos ko ang
dili unta makaayo
kanako

gilabay ko ang
makatabang sa akong
kinabuhi

gipudyot ko ang inanay
nga makamatay kanako

ug gikalipay ko kining
tanan sama sa usa ka
walay buot nga bata nga
nagdula sa ilalom sa kusog
nga ulan sa tungatunga
sa karsada nga nagsigig
hugyaw sa balita kabahin
sa mga nadisgrasya.

ang mga anino malupigon usab ug ang lawas nga mapasagaron sa kaulahian mabuntog nianang watsinanggo nga kamatayon

ang akong ipadala unta
nga tabang kanimo

kadtong salapi nga akong
gitipigan ug gisaad alang
kanimo

dili ko pa mapadala.
aduna usab ako'y panaw
nga dili ko pa
ikapanugilon kanimo

ampo lang gamay nga
unta makabalik ako
sa balay diin gilukip ko
ang maong salapi sa
kilid sa atop nga nipa

ampo lang nga unta
walay kusog nga ulan
nga unta dili magbaha
nga unta dili usab ako
maanod sa dakong lunop
sa akong kinabuhi

pangitaon ko usab ang
akong mga tinipigan
ug kon mapalgan ko kini
dili ko kini gamiton
alang kanako

ipadala ko kini kanimo
kon ako usab mahinumduman
pa sa akong
panumduman
kon ako usab mahibalik pa
sa lawak sa akong
kaugalingon

ang mga anino malupigon usab
ug ang lawas nga mapasagaron
sa kaulahian mabuntog nianang
watsinanggo nga kamatayon

kinsa ba ang gihaya dinhing dapita?

kay mingaw ang
payag

nanglakaw lang
seguro ang
mga namuyo
dinhi

wala say iro
ug mga manok
dinhi

wala say kahoy
diin ang mga
tamsi unta
mopahulay

ang akong
gikahadlokan basin
ugma
magtapok ang
mga tawo dinhi
unya walay undang
ang pagpasiga sa
mga suga

ug makapangutana
ko sa
makapanglimbayot unya
sa imong balahibo:

kinsa ba ang gihaya
dinhing dapita?

Dili ko magsusulat. Mamaligyaay lang kog kamingaw Tigsuroy lang kog pinutos nga kahaw-ang.

wala ako
masayod nga ako
diay
ila na nga gidawat
nga usa ka
tigsulat

gibasa nila ang
akong mga
mugna

wa usab ako
masayod kon unsa
gayod ang tinood

nalibog na ko kon
dis-a ko gipunit ang
akong mga bakak

sa dihang gihisgotan na
nila ang kabahin sa
tinood
nakulbaan ko

basin ug tinood diay
basin ug ang bakak dili diay
bakak

basin kon ang mga bakak
nagtakuban usab ug basin
ang ilang takuban
mao gayod diay
ang matood

gisugdan ko lamang
ang paghulip sa akong
mga kalaay
gitakloban ko lang ang
mga abli
kay basin ug langawon
ang kabaho niini

gilingaw ko lang ang
mga kagabhion nga dili
makatulog ug mga
kaadlawon nga naglutok
unya wala kasuginlan

gihilot ko lang ang gasakit
ko nga liog
ang gaul-ol kong bukton

sa dihang giablihan ko ang
mga bintana
miingon ang adlaw
usa ka ka magsusulat

sa dihang migawas ako
sa pultahan
mipaghot pag-ayo ang
puti nako nga iro
ug mikiwil ang iyang
taas nga ikog

ayaw ka. Siya lang gayod
ang nakaila kanako.
Dili ko magsusulat.
Mamaligyaay lang kog
kamingaw
Tigsuroy lang kog
pinutos nga kahaw-ang.

adunay miabot
nga bugnaw nga pagbati

kinsa ba'y ganahan
niini? basta ako
dili.

sa dihang miabot
na kini
milingiw ko

gisunod ko
busa gitagbo ko
na lang
usab

ug dayon nakog
duko ug piyong

gipalabay ko lang
ang kagabhion

ugma basin moinit
na ang adlaw

apan bisan pa niini
bisan pa ug molabay
ang tanan

di na ko ganahan
apan ania
kamao na sa duwa

nagpabutabungol
pirming dunay
gam-on
bisag unsa na lang
basta lang
kunuhay
malipayon

morag kabayong
bag-ong nahiktan

sama sa irong
bag-ong nasakpan
human kini
gihuktan sa
pipila ka tuig
ug gigaid sud
sa kamalig

sakit ang kahayag
sa adlaw
ug ang kagawasan
usahay
mongutngot sa iyang
kiting

kadtong
nakasaway
kanato

kadtong giganahag
biay-biay

kadtong misayaw
sa atong
pagkapandol

kadtong nangluwa
sa atong paglabay

nagtinga na
ug hapit na
mamatay

nanugon na
nga unta
siya pasayloon
na nato

magkita ta unya
sabotan nato
kon asa ta mangutang
ug kwarta aron
ipalit nato ug korona
nga bulak
kadto jong mahalon

ang iyang mga kamot naghinamhinam na sa iyang mahikap sa iyang mga gumunhap ug pangandoy

wala siya magmugna
ug mga pulong aron lang nimo
paminawon

kon mabasa pa lang nimo
unta ang iyang hunahuna
kon masulod pa unta nimo
ang mga pultahan sa iyang
kasingkasing
kon mapuy-an pa lang unta
nimo ang mga lawak sa
iyang mga damgo

nagpaabot usab siya sa mga
bunga sa iyang mga gipananom
naghandom usab siya ug ganti
sa iyang mga tinguha

subo pamation nga ikaw naghunahuna
nga kining tanan gibuhat niya
dili tungod kay gihigugma ka niya

ikaw lang ang buang nga
nahigugma kaniya
abi mo ug ikaw ang iyang gilantaw
sayop ka

ang iyang mga mata atua sa unahan
ang iyang kasingkasing
gitagoan niya sa dughan sa lasang
ang iyang mga kamot
naghinamhinam na sa iyang
mahikap sa iyang mga
gumunhap ug pangandoy

mipahiyom siya. andam na siya sa gipaabot niyang kamatayon.

ang tighimog banig
naghimog banig
matag-adlaw ug
gabii banig ang
naa sa iyang kamot
ug utok

ang iyang kinabuhi
nagtuyok sa banig
dili lamang kay upat
ang kiliran niini

unsaon mo man ang
daghang banig?
wala lang.

ibaligya ba nimo
kini?
dili.

higdaan mo ba kini?
himoong tabon sa
gatulo nga atop
sa imong balay?
dili.

walag gamit ang
banig.
giganahan lang gayod
siya sa paghimo
sa banig
sa pagtapak kanunay
sa kinutkutan sa
mga bagtok.

ang tighimo sa banig
bulag sa asawa ug
gibiyaan sa iyang mga
anak

siya lang usa ang
nagpuyo sa iyang
balay nga gubaon
nga haskang punoa
na gayod sa
iyang mga banig
nga hinimo.

kinsa ba'y imong
bilinan niini?
wala.

nganong gahimo ka
man sa daghan kaayong
mga banig?

wala lang.
giganahan lang.

ang pangedaron sa
tighimog banig
miabot na sa 95
apan lig-on lang
gihapon siya
ug unya ang iyang
mga kamot
abtik lang gihapon
nga mopasuot-suot
sa mga gilala nga
buli ug pagtina niini
sa klase-klaseng
bulok sa mga
lain-laing desenyo

usahay isablay niya
ang iyang bag-ong
nahimong banig
ug motindog siya
palayo niini aron
malantaw niya ang
kinatibuk-an sa
iyang mugna

ug siya mopahiyom
ug molingkod ug balik
sa iyang salog diin
himoon na usab niya
ang laing banig

kalipay. Kalipay.
sama nimo, kalipay
ang iyang gipangita
ug iya kining nakaplagan
sa paghimo ug banig.

mipahiyom siya.
andam na siya sa
gipaabot niyang
kamatayon.

didto sa Mr.Poon

ang mga nangamatay sa nalunod nga barko
mga numero lamang nga nagsigig saka ang kadaghan

kita nga naglantaw samtang naghigop sa kainit sa sabaw sa
white beef lomi ning kusog nga ting-ulan
sa Manila isip usa sa mga naistranded nga mga pasahero
pauli sa atong mga pinuy-anan
wala kaayo kabati sa galuha nga mata sa amahan
nga karon gibasol ang kadangag sa duha ka barko nga
nagbangga

ang iyang bugtong anak nga lalaki naapil sa mga nangamatay

misamot ka kusog ang ulan ug misaka na ang tubig sa
pultahan sa Mr. Poon Restaurant

kon ablihan ang pultahan sa mga laing miabot
morag nagkayagaw na usab ang kalibotan ug ang gabalita
pa gihapon didto sa cebu
kuli na nakong madungog

ang gasinaw nga chop suey gisugdan na usab ug kaon
dayon ang kutchay nga dunay tofu nag-aso-aso pa gihapon
sa atong mga baba
dayong higop sa hapit na mabugnaw nga service tea

ang gihimo natong suliran mao ang walay kisaw sa cebu pacific
kay dili klaro kon canceled pa ba gihapon ang flight pagkaugma

misamot kadaghan ang mga patay, misaka na ang mga numero
dili kaayo lalom ang atong mga kasakit kaysa kasakit niining
mga numero nga milabay lang sa atong mga dunggan nga gilumsan
sa kakusog na usab sa ulan sa dihang miabot ang madre kuyog
sa iyang duha ka alalay alang sa ilang
panihapon dinhi sa Mr. Poon

dili gayod lalom ang ilang kasakit hangtod nga mahibaw-an
nato nga kita maapil man diay unta sa maong
laing trahedya sa atong kadagatan nga hapit matag tuig
mosuyop ug mga tawo unya morag walay kahubganan
walay ugam

maayo gani kay nalangan ta sa atong paingnan

pagpanghayhay sa tingpamahaw

lahi ang gihan-ay sa kasingkasing
ang iyang piniloan sa mga damgo
mabulukon ug tungod kay gitago
na man sa sulod sa pagtak-op
sa mga pilok sa kahig-waos
dali ra kining mahikalimtan nimo
inig mata sa kaadlawon

sa imong pagpamahaw makita mo
ang humot nga aso sa kape ug
pinaagi niini mubutho ang imong
gihigugma diha sa ibabaw sa lamesa
makita mo ang iyang pahiyom ug
mabati mo usab ang kaiinit sa
iyang paghalok kanimo ug ang
panagbaid sa inyong mga lawas
diha sa kahait ug kainit sa inyong
mga kauhaw diha sa kapit-os

walay tingog ang kamatooran nga
naglutok lamang ang mga mata sa
gihukman na nga dili gayod angayang
buhaton ug kon kinsa ang nag-ingon
niini dili mo na kini mahinganlan

gimugna mo pag-usab ang mga hanap
ug mga lubog diha sa napagod nga
piniritong itlog tupad sa tuskig nga
bulad nga sa imong pagtilaw haskang
asgara ug imo kining gibasolan.

ang imong tupad nakabantay niining
kalalom sa dagat ug ang kabalaka sa
usa ka unos nakita sa pagkunot sa iyang
agtang ug pagkalit ug kahiwi sa iyang aping.

kining mga katuigan namungag pagpaubos
diha sa dili na lang pagpangutana ug naunsa
o ngano ba kaha. Pabilin ang naandan.
Tunga lang sa piniritong itlog ang nahurot.
Nabugnaw ang kape nga wala mainom.
Ug lain na usab nga usa ka plato nga luto
ang mabahaw ug kining mga panghitabo
nakalipay kaayo sa tulo ka iro nga
ganiha rang naghangad kon kanus-a
mo ilabay kanila ang wala mo na makaon.

mahimong mahilom ug mausob tungog ug alang lamang kanila.

ang mga pulong mahimong mga agianan
ug sa imong mga pamaagi nga ikaw dili
masabtan sa mga kasagaran gilikos-likos
mo kini ug gihimong mga tinae sa mga
manok nga nangamatay sa dungoy.

usa lang ang makasabot niini kadtong
nahigugma kanimo ug siya motabang sa
pagwala sa mga naandan ug sa usab
nga nakat-una kanimo didto sa tunga
sa lawod himoon usab niya ang tagawtaw
sa mga balod aron ang mga kasagaran
ug mga naandan malugaw ug masigaw.

unsa ba gayod ang katuyoan niini? kadtong
nahigugma ug gihigugma mao lamang ang
makatubag niini kay sila man lang ang
nagsabot sa ilang mga pinulungan ug
nilihokan nga ug magtagbo na sila sa
ilang salag sa tinagong luna sa kasingkasing
ang mga kasagaran ug naandan magkahinay
ug magkahilis ug gani sa kaulahian mahanaw

unya ang dayag ug ang tinood mao na lamang
silang duha diha sa ilang paggakos sa gugma
diha sa halok nga tim-os, diha sa paghiusa
sa ilang mga kalag, diin ang Ginoo bisan
sa iyang mga balaod diha sa tig-a nga bato
nga gihatag ni Moses ug iyang gisangyaw
sa pangpang, mahimong mahilom ug
mausob tungog ug alang lamang kanila.

kay ang gugma man god usa ka liso nga
gilabay sa tugkaran sa pinuy-anan sa Diyos,
nga ug kon mogitib kini, bisan si Bathala
wala masayod kon unsa ang kaanyag nga
iyang ipakita sa nataran sa lunsay nga kalipay.

awit sa duha ka hapit na mabuang

mas nindot ang awit natong duha kaysa ako lang usa

labi na ug magpakurog ko dungan sa imong pagpakurog usab

kay kining atong tingog morag duyog  sa duha ka kalipay nga kon magkuyog

sama sa duha ka kamot ug mga tiil magdug-ol dayon magtapot

unya ang makita sa bulan usa na lamang ka lawas  nga mitapo

sa iyang anino dayon ug kawala didto sa silong sa kakahoyan


dugay kini kaayo nga   gipanid-an sa buwan nga sa pag-abot sa unang kahayag sa

kabuntagon mikagiw kini ug dali-dali gahambin sa nga tunok sa pagpangabubho.

ning akong piang nga naundan

kadtong
migawas gikan sa
banyo
human mikaligo
unya gatapis
ug sihag
kadtong mikawat
kanimo ug
tan-aw
ug dayog sulod
sa iyang
kwarto
nga nagpabilig
kahumot
sa kilid sa imong
dunggan

kadto kadto siya
ang
akong
gikawid-an

ang akong hilanat
misaka
ang akong dugo
mibukal

apan bisan
pag wa kay
kaligo
apan bisan
pag
gimuta ka

wa koy mahimo
ikaw ug
ikaw lang
gayod gihapon
ang gihandom
ning akong
piang nga
naundan

kadtong mitawag nato nga balagtok

gitawag kita niyang
mag balagtok
nga buta ug ako
lang siyang gitiawtiawan
kay kadtong tawhana
mibutho lang ug kalit
gikan sa iyang lungag
ug bisan wala pa gani
niya masimhoti ang tanan
sa iyang palibot
dayon niyag syagit
nga morag nakuratan
nga mora bag karon
pa siya kakita ug
duha ka mga balagtok
nga nabutaan

sakto ka
tawo siya ug angayan
nga tahoron pinaagi
sa dili pag-ambat
sa iyang kasipat

akong gisusi ang
iyang kahimtang ug
sa akong pagsubay
usa usab diay siya
sa siyam ka mga buta nga
nakahikap sa
elepanting nasaag
sa atoa
gikan pa gayod
sa India

paghapnig ug pagpasabot

mas nindot gayod paminawon ang
imong pagpasabot kon imong kining
gihapnig sama sa mga nauga na nga
mga nilabhan

plantsahon mo pag-ayo ang mga
lum-it dayon imo kining pilo-piloon
aron limpyo kining tan-awon nga
mahipos  didto sa sulod sa aparador

pagkahuman maglingkod ka nga
malinawon diha sa kilid sa lamesa nga
lingin og nawong didto sa gawas sa
inyong balay lantaw sa mga kahoy
nga walay nahimo sa mga dahong
nangahulog kay gisugdan na usab
pagtayhop sa kusog nga hangin

kining pagpasabot kanako ni Bathala
sama usab niining naghapnig sa mga
nangalum-it, sama sa akong labandera
nga tigulang na nga kon mamalantsa
dili ganahan nga ipatukar ang radyo
kay nasumhan na nianang mga drama.

kadtong iro nga gaaw-aw

ihayang ang imong kamot
dayon ipatakilid aron makita
mo ang iyang anino diha sa 
dingding sa imong lawak
silong sa gaamag ug lingin
nga suga

aron mas magmalipayon ka
balikan mo ang imong pagkabata
ug pangitaa didto ang gaaw-aw
mong iro

ang kalinaw maanaa unta kanimo

ang kalinaw
sud sa atong ginhawaan
mas labaw pa kana
sa bag-ong kotseng
gibayran sa kahagong
kinawat sa
ubang agtang

Kamatayon sa hinay.

sa kadaghan sa perlas nga nagtapok sa imong atubangan

kon adunay mawala nga usa ka perlas

dili mo kini mabantayan. Buhong ka na niini.

Kon ako kadtong usa ka perlas, unya ikaw kadtong buhong

Ikaw ang dili makabantay sa ako nga mawala kanimo.

Ang silot niini, dili ang pagkawala sa tanang perlas.

Ikaw usab mawala. Unya bisan unsaon mog pangita ang imong kaugalingon

Dili mo na gayod kini makit-an kay perlas ka man usab

Unya sa kadaghan nga milamog kanimo

Dili mo na makita pa kon asa ka, ug kinsa ka, ung unsa ka.

Kay nabuhong ka na. Ug ang kabuhong sama kini sa kahungog

Ug ang kahungog, usa kini ka wala mamatikdi nga

Kamatayon sa hinay.

Para kini sa umaabot nga panahon

unta ikaw na.

apan dili ikaw ang unta.

lahi ang unta.

kadtong wala pa

mao ang unta. kadtong wala pa mahikap sa akong kamot magpabiling unta.

lahi ang akong mga kamot, kay ang iyang mahikap bisag kausa lamang mahimong bato.

unta ikaw na ang bato nga mahikap sa akong kamot.

apan aduna ako'y  gibating kalayo kanimo, ug dili masunog ang bato.

unsaon ko man ang bato? ihapag ko na ba usab kini sa akong agtang? ipakita ko na ba usab kanimo nga

ako mopahiyom dayon ingnon ta ka nga ako usa ka tawong hagbay rang ganahan nga

mamatay?

unta ikaw na ang bato sa akong tiilan.

apan dili kana mahimo. ikaw ang kanunayng bato sa pisi sa akong liog. ug lalom baya ang dagat,

ikaw na unta ang bato nga kulitan sa akong ngalan. unya sa kilid niini anaa ang bulak nga

ilang ipahinungod kanako.

sila nga gusto kunuhay nga mosabot apan wala mobati.

unta ikaw na. Apan bato usab ako.

Kon magsumpaki ang duha ka bato. Adunay moaso. Dayon mokalayo.

Apan kining kalayo nga atong gihimo, dili kini para ato.

Para kini sa umaabot nga panahon.

Diha sa ilang wala pa masud-ong nga kahayag.

naghandom sa gusto ko untang hikalimtan.

adunay magsunodsunod kanako
nga walay kalabotan kanato
dili ko usab kini anino dili ko kini
kaila
ang iyang pagsunodsunod
nahimo ko usang tulumanon nga
kinahanglan ako mosibog
dili sa ako iyang maabtan
kondili tungod kay ako usab
walay gihimo sa pag-usad sa
panahon,
nagsulat sa dili ko kinahanglan
naghandom sa gusto ko untang
hikalimtan.

diha sa kabugnaw sa mga kabuntagon

matag adlaw madungog mo
ang nagkadiyang dangoyngoy sa
kalibotan

sa bag-o pa kini miduyog ka
sa danguyngoy niini ug
taas kaayo ang listahan sa
imong pangutana aron ipatubag
sa adlaw, sa bulan, sa mga bitoon,
nga igo lang milantaw, ug sa hilom
milabay lang usab dayon
sama sa pagbalibalik ug abot
ug biya sa panahon

naandan mo na kini
ang kanhiay danguyngoy nahimong
gininhawa na lamang sa hangin
tayhop sa kabukiran
aginod sa suba
pagtuklod sa dagat sa iyang mga balod
didto sa mga kiliran sa baybayon

ug nahimo kang taga-dinhi
usa sa mga lumulupyo nga ug dunay
moabot ug mangutana
igo mo na lamang itudlo sa imong
simod ang ilang padulngan

"tua didto, tua didto!" ug dayon mog
pauli sa imong gipuy-an
lingkod sa ang-ang sa hagdan
lantaw sa bukid ug paanod sa
lutaw sa gapnod diha sa kabugnaw
sa mga kabuntagon

tinagoang lawak

tagsa-tagsa kanato
adunay tinagoang lawak
diin gihipos ang
pultahan diin ang
mga bongbong
mao ang gihayhayan
sa atong mga
gihandom sa kasingkasing
nga ilang gikaulaw bahin
kanato

bisan ako dili ganahang
mosulod didto apan unsaon
man nga gikinahanglan gayod
kay kon dili ko kini
sudlan panalagsa
aduna may mamatay sulod
kanako

unta kasilagan mo ako, kay mao kana ang aikong gusto

gipakita ko ang akong kalag kanimo
usa ka na ka paghanyag sa dili mo makita

puhon kon madungog mo ako ug
makita, kon mahikap mo ang akong
mga kamot,  kon mabati mo ang
pulong sa akong lawas, kon mahapuhap
mo ang akong buhok,

unta kasilagan mo ako,
kay mao kana ang aikong gusto

ALANG SA TRYING HARD TO BE IN LOVE

kab-oton ang langit

bisag dila na lang ang
di molabod

hakpon ang mga
bitoon
bisag mangaputol
ang mga tudlo

sarapon ang mga
isda bisag buslot
pa ang mga pukot

tiradoron ang buwan
hagkan ang adlaw
sulngon ang bagyo
kawaton ang bangkil
sa dugdog ug liti

langoyon ang pito
ka lawod latason
ang kawhaan ka
mga bungtod

apan kon masamdan
ang kumingking
dayog ingon:

aguy! lecheng yawa
kinsay mituslok nako ha?
bantay ka lang.

 

aduna nay makaon.

moabot ka sa punto
nga ang punyal dili
hait kon dili gilok
kay sa tumoy niini
samtang ikaw giduslak
dili ka man modugo
o masamdan kon dili
ikaw hinoon mogitib
man, mamulak,  ug
dayon mamunga ug
mahinog

dayon kadtong bata
nga bulingiton, gutom
baho, ug nag-iyak

aduna nay makaon.

Ang mga salampati sa kahoy nga niwang

Dungan kon mobatog
Ang mga salampati
Sa mga sanga
Sa kahoy
Dungan usab kini
Kon sila mobiya

Molupad palayo
Balik sa ilang
Balay tugpahanan

Nakita ko karong
Buntaga
Ang mga puting
Salampati nga mao
Pay pagtugpa sa kahoy
Nga niwang

Panaw sa Ilalom sa Ulan sa Lawod nga Dagat

milabay ta sa mga batong
bungtod nga
opaw, sa sakayan nga
walay layag
wala nato damha ang
kusog nga ulan
pagkadagko sa lusok
nga nangahulog
sa aping sa dagat
apan mas dagko ang
sa imo
wa na ko mahikurat kabahin
anang mga mais
nga luha sa langit nga
gitisok sa
lapad nga dughan sa dagat
ang akong nahihumduman
mao lamang nga
init kaayo ang tambutso sa
baroto og duro nakong
hawid sa katig

Tumong

ang mga bitoon
wala baya’y timon
ang bulan wala
say layag
apan kabalo
sila asa paingon
paspas ang pagtagbo
sa kagabhion

mga mata diha sa mga kalimutaw sa kalibotan

sa tinood lang
hagbay rang nagtigom ang
usa ka tawong
maalamon sa mga lisong
nangahulog
sa mga kahoy nga
hagbay rang
gipatay sa pag-usab-usab
sa panahon

unya iya kining isabwag
sa giulan nga yuta
diha sa kilid sa suba
sa silong sa langit
sa dughan sa hangin
sa pusod sa patag

kon motubo na kini
mamunga kinig daghang
mga mata diha sa mga
kalimutaw sa kalibotan

nahimo akong mas hait

ako nga imong gihigugma
mao ang imong samin

ikaw ang kahayag nga maghatag
kanakog talan-awon

kon imo akong ihulog ug buakon
dayon imo akong lantawon

mahimong daghan kaayo ang
imong nawong

ug ako nga imong gibuak
wala masamdi

nahimo akong mas hait
ug mas pino ug ikaw

magsalimuang na unya sa
tumang kahadlok

ang nagmugna niini dili na kapanugilon

ang usa ka mubong balak
bisan ug pipila lang ka pulong ang
gigamit

gibilaran kini sa pipila ka tuig
gisala kini sa pipila ka kasakit

ug ang nagmugna niini dili na
kapanugilon diha sa
hingtungdan

kay hagbay ra kini niyang gipasaylo
diha sa kaanyag sa kalimot

ang pagkalambigit amang

dali lang sabton ang usa ka
pagkalambigit

dili kinahanglan ang pagpangita
sa usa ka tawong nahigugma
kanimo

siya mismo ang mangita sa gugma
ug kon anaa kana sa imong dughan

dili na usab kini siya kinahanglang
motingog

ang pultahan sa duha ka kasingkasing
mangabli 
sa gihigugma ug nahigugma
bisan pa kini ug dili mo na tuktukon

ang pagkalambigit
amang kini ug magpabilin kining amang
kay walag gamit ang
pulong sa duha ka ngabil
nga nagtagbo diha sa usa ka
init kaayong halok

si Buddha si Hesus ug si Allah

usa ka adlaw niana
gibutang ko si Buddha sa akong wala
unya sa akong tuo ang atong Hesus
unya sa tunga
mao si Allah

unya akong gihalaran silang tanan
ug tagsa-tagsa ka buwak
usa ka buok mansanas nga dili
pa kaayo hinog
ug duha ka copa sa bino

gidagkotan ko ang puti nga kandila
ug ang sandalwood nga insenso

ang tanan aso mipaingon sa langit
hangtod nga naupos ang kandila
ug unya nahimong abo ang insenso

hangtod nga nalata ang mansanas
hangtod nauga ang bino sa baso

wala ko kadungog ug kasikas nilang
tanan
wala ko kadungog ug dunay nanggiaway
o nagsumbagay
o bisan lamang ug naglantugi kon kinsay
labaw kanila
o kinsay mas gamhanan

giunsa ba nga mahimong usa ka maayong balak ang NO SMOKING?

Ginaingon nga ang balak
kinahanglang mamungpong ug mga tanghaga

unya ang Kamingaw paiyakon ang Kahilom
pasyagiton
ang Bulak gani mahimo man kining usa ka
maanyag nga dalaga nga
gisuyupan sa mga Buyog sa iyang Nektar
nga kaanyag

Giunsa mo ba paghimo ang No Smoking nga
usa ka balak unsa ba ang tanghaga niini?

ang iyang tanghaga naa diha sa pagpatay nimo
sa imong puya samtang giduyan sa iyang nanay
diha sa kuna unya ikaw siging gapabulhot nga
naglantaw kay gikalipay mo ang imong unang
liwat

ang imong kalipay maoy nakapatay kaniya ug
wala ka masayod niini

sa dihang gilubong na ang bata gisuntok nimo
ang nawong sa bulan nga nasamdan sa imong
katanga

unya human sa pipila ka adlaw nasayran na usab
nimo nga ang totoy sa imong asawa mihubag
kini ug unya mipagawas ug nana imbis gatas
sa bata nga wa pa gani makwarentahe


ang pagpanigarilyo usa ka Aso sa Kamatayon
nga sigi nimong gibuga diha sa tawong imo kunong
gimahal pag-ayo

ug wala ka masayod nga ikaw, ug ikaw lang gayod
ang matood nga hinungdan sa tanan nimong
kasakit kay ikaw mismo wala man masayod sa
imong kabuang

nga kon makasulti pa lamang ang Lawak, ang mga
Hapin, ang mga patay nga ngabil ug baga sa imong
asawa ug anak

Ipanghimaraot ka gayod unta nila hangtod sa imong
kamatayon

GIGIL

giusap ang dagkong liso
sa santol nga bangkok
nga haskang bagaa ang
unod ug unya haskang
tam-isa pa gayod

wa kaantos
gitulon ang liso ug
wa na hunahunaa kon
unsa kasakit ang iyang
lubot ugma kon mogawas
na ang gahi nga tubol

ako kining ihukad sa lamesang walay gaatong

kining akong tinan-ogan nga
gugma akong gisipitan sa duha
ka alugnan
akong giinit nga morag pan-os
nga pan

kon manghumot na kini
abot sa pikas lawak sa akong
silingan

ako kining ihukad sa lamesang
walay gaatong

ang akong iro nga ang bulok sa balahibo morag abog

ang akong iro nga morag
abog ang bulok sa balahibo
ania sa ubos sa akong tiilan

gikalipay ko ang among
walay undang nga panag-amigo

ang uban morag mga hulmigas
nga namalhin painon sa tibugol

sa kamay nga nahulog didto
sa kilid sa baga nga garapon

wa tagad kasiplit

sulod sa lawak sa damgo
nakita mo siya ug ikaw

gahalog sa kagabhion
sangko sa sampot
ang tudlo sa baba
nakasulod ug mihaom

nakamata ka unya
sakit kaayo ang imong
pus-on

wala gihapon siya
nakahibalo bahin kanimo

wala nakagawas ang
unta angayang ipasiplit

gugmang mitikig morag
dahon ug buwak sa
hibi-hibi diha sa imong
libro

dili ko makatoo nga ikaw diay mismo ang nangilog ug asawa sa atong silingan.

kadtong gagmay pa kitang
bata
dakong sumbagay ang nahitabo
sa dihang
giilog sa imong kadula ang
imong tarak-tarak nga
kahoy

ang imong lastiko nga lima ka buok
unya upat na lang ang nahibilin
kay gikawatan
imong giiyakan

ang imong bisiklita nga tayaon na og
manobela
di gani ka pahulam

mahimong dakong patay seguro ang
mahitabo kon ang imong asawa tabanon
ug lain

dakong gubot gayod sa tibuok kalibotan
kon ang imong uyab hagkan ug lain


dili ko makatoo nga ikaw diay mismo ang
nangilog ug asawa sa atong silingan.

balag kabahin sa unahan

kay gisugdan ko man ang pagtikang
pwes latason ko na lang hangtod diha sa pag-abot sa unahan, ug sa unahan pa gayod

kon moabot ko didto, atua ka na, mokatawa ug moingon nga ang unahan kanunayng unahan ug
kon masabtan ko lang kuno unta nga mao kining kamatooran nga iyang nasakpan nga ang unahan ug unahan pa gayod wala baya'y kahumanan kay ang mahuman ikaw man lang nga nagsugod pagtikang unya mihukom nga latason ang tanan hangtod sa kataposan

nga unta kining tanang kasakit dili nila mahiaguman.

yano lang ang pagsulat
sa atong mga nangagi

dili na kinahanglan pang
pangitaon ang wala diha
kay anaa naglutok ang
mga mata sa imong
ihulagway
o ipatik sa imong
haw-ang nga sulatanan

ngano daw nga yanoyanohon
man lang kuno pagsulat ang mga
nangagi nga nahisama sa mga bildo
nga salog nga kon palabian mo
ug tunob maliki man kini ug
dayog kabuak?

nganong yahoyanohon man lang
niya paglitok ang mga pulong sa
mga nangagi gamit usab ang
iyang bildo nga dila?

wala ba siya masayangi sa
nagpasad nga mga buak diha
sa iyang tiilan nga bisag unsaon
pa niya ug tapak dili na man
niya kini mauli pagbalik?

pagkaisog sa iyang mga tiil
nga samdan
pagkapula sa mga dugo diha
sa iyang mga tiil
pagkahapdos usab unta
apan giyayanoyano lang usab
niya ang pag-antos

aron lang gayod masulat ang
tanan
aron dili na kini mangalimtan

aron kon mobiya na siya dinhi
aduna'y mahinumdom ug
moingon nga unta kining
tanang kasakit dili nila
mahiaguman.

patay na si Pepay

patay na siya

siya ang tighatod ug alimango
nga bayot gikan sa Lala
tambok, lamian,
barato

patay na siya

dili na nako hisgotan ang
maot nga sugilanon bahin kaniya

para unsa pa?

patay na siya ug ang tanan
kabahin kaniya atong ikuyog ug lubong
diha kaniya

si Simang malipay
si Emong magul-anon
kami naglantaw lamang ug
magpakahilom tungod

kay patay na siya ug pangadyean siya
sud sa siyam ka adlaw
ilubong siya sa biernes
ug dayon manguli na kita
sa atong mga balay

si Lolong magputong
sa iyang kumo mabuak ang mga
bongbong

si Jongjong dili motingog
walay mabulgar sa ilang mga tinagoan

mag-unsa na karon ang
gipundar nga balay sa Payatas?

kinsa na ang mobuyag kaniya
nganong wala niya gi-insert ang iyang polo
sa iyang karsones nga maong?

kalit lang ang kamatayon
diha sa usa ka katulugon

patay na siya
ug kami usab pagkahuman sa iyang haya ug lubong
manguli na.

alang kang J, nga wa ko na gayod igkita

 1976

gusto nimong
walison ang akong purol
naa kay
tan-awon nga wala
kuno nimo

morag naigkag ang
akong duha ka
paa
kay atua didto ang
akong gitagoan
nga danlog kon
haloan


1987

wa ko na gayod ikaw
igkita
gikan pa kaniadto

ang akong haloan
nagpabiling buhi sud
sa akong dughan
ug dili na kini idlas
sa gustong motan-aw
niini

wala baya usab kini
kalainan sa ubang haloan
mora lang gihapon kinig
pamay-on sa ubang
haloan


2011

kon balikan ko ang
lam-aw
mahinumduman ko ikaw
makita ko ang imong mga
mata nga
naghandom sa akong haloan

usahay basolan ko usab ang
akong kadalo
nganong wala ko walisa ang
akong purol
ug nganong wa ko ikaw
gipalantaw niini

ug bisan na lang gani ug
gipahikap ko kini kanimo

dili unta ako mahasol sa
akong tanlag

nga kon unta nahikap mo
kini
ug kon gilamian ka man

unta gikalipay ko usab
bisan makausa lamang
nga ako nakalipay usab
kanimo nga karon wa
ko na gayod igkita

walay pagkahurot, walay pagkahuman, walay pagkauga

napandol na kuno
ang iyang utok
ug dako pa ang
bunol niini ug sakit
pa gihapon

busa wala siyay
masulat karon

nauga na kuno ang
suba sa Bagacayan
ug mga isda nahutdan
sa tubig ug hangin
ug nagpasad nga patay
nangabaho sa balas
intawon

sayang ang tiguwang
nga walay madumduman
sa mga sugilanon sa
iyang pagkabata

mahimo siyang taros
taros diha sa tumang
kalimot

sayang ang mga nangaging
mga adlaw ug gabii sa
panagdulog sa duha ka
batan-on kon ilang
mahikalimtan ang
ilang panagdumog diha
sa nagbasa nilang mga
habol diha sa mga singot
nga nagbaha ug nakabasa
sa mga ponda ug habol

walay maughan sa tawong
siging mahigugma
walay malimtan sa tawong
walay hunong sa
paghalok sa init nga
lawas sa kinabuhi

alang kang jongjong nga karon nagtrabaho isip construction worker sa kuala lumpur

Hinumdumi daw jong
palihog kinsa gani kadtong
gamayng batang lalaki
nga maayo kaayong moiningles
nga gikuyog sa iyang mama didto
sa Gata
unya samtang nagkahinangopay
ang duha ka magsoong babaye
nga dugay na nga wala  magkita ang maong
batang lalaki
midagan paingon sa punoan sa
puting kalachuchi
diin nagpasad ang daghang mga
buwak nga nangahulog tungod
sa kakusog sa hangin ug
ulan kaniadtong gabhiona
sa wala pa sila miabot gikan
sa Dipolog
ug nahimo gani nilang kataw-anan
kay kadtong bataa mipunit man
sa maong mga bulak
gitohug kini niya ug gihimong
korona sa iyang ulo ug kuyog
usab sa dahon sa anahaw nga
iyang gipamaypay ug dayon niyag
sayaw ug hawaiin?

hinumdumi kuno jong
kon giunsa nimog pugong sa
imong katawa kay wala
ka ganahing
magbugalbugal kaniya.

KASTONG MIINGKIT SA HINOG NGA BAYABAS

kadtong langgam 

nga miingkit sa hinog nga bayabas 

mao kadto 

ang kanunayng naghatag kanako 

ug kalipay sa matag bisita nako nilang nanay ug tatay

sa among balay didto sa Olingan 

kaniadto sa gamay pa ako 

inig uli nako matag sabado 

gikan sa akong lola nga haskang

istriktaha.

ang sugilanon ni pacita

gituktok ni pacita
ang pultahan sa hotel
diin nakacheck-in si
wendel kuyog ang
iyang gipalit nga
kalipay

"wendel, abrihi kining
pultahan, sayod ko nga
ikaw anaa diha
kuyog sa imong kulukadidang!!!"

ug mitubag ang tawo
" sorry, dili ko si wendel
busa pahawa na diha!!"

alang kang narcisos

gusto nakong likayan
ang makapabuglat sa akong mga mata
ang makapatulo sa akong laway
ang makapakurog sa akong kiting
ang makapapitik sa akong kasingkasing
ang makagahi sa akong apapangig
ang makakakapoy sa akong suwang
nga karon gituklang sa akong
napulo ka mga tudlo

namakak ako sa akong kaugalingon
ania
naglantaw na usab sa sadyan nga
kalibotan
nga ilang gustong tipigan

gasakit ang akong liog
mitikig ang akong mga bukog

adunay kinabuhi na usab ang ubos
sa akong pusod
sa dihang misiplit ang ulan
sa gatupad nga kabukiran

ug nadungog ko ang ulang sa
akong iro
nga nahikatulog unta sa kilid
sa akong tiilan

gipaminaw ko ang ulan sa tibuok nga adlaw

ganahan ko sa tingog sa ulan

masulub-on kini
apan kon ayohog paminaw
aduna kini
awit nga gitan-ogan

alang kanimo

aduna kini gitagoang
katam-is sama sa manggang
imong gitipigan
sud sa imong dughan
nga kon mahinog kini ug dili
mo ipagawas
aron tam-osan kuyog sa imong
gitripingan
nan malata kini
madugta
ug maghatag ug kabaho
diha sa palibot sa imong
kasingkasing

gipaminaw ko ang ulan
sa tibuok nga adlaw

alang sa amigo nga gustong magpakamatay

kon mangutana ka
unsaon paghuman ang kinabuhi
sama ra usab nga nangutana ka
kon unsaon paghuman
ang usa ka sulatonon nga dili
mo man gani masugdan

gusto mong magbangutan
diha sa usa ka gugmang kanhiay
rang napan-os nga karon
nanimaho nang patay?

pagkalooy mo

mangatawa ang mga tiki sa kisame
kon mahibaw-an nila kini
ug ang mga lamok nga matabian nila
niini makaingon nga tinood jud
diay nga ikaw
dili pak-an

kon imong taposon ang kinabuhi
sa usa ka pagtoon
pinaagi unya sa usa ka kauhaw og
kagutom
diha unya sa imong lubog
mohunghong ang tigulang nga babaye
sa usa ka tigulang usab nga lalaki

"pagkabayot ba niining namatay
pagkahuyang sa iyang galamhan
pagkadaghan pa untang buluhaton
pagkatam-is pa unta sa kinabuhi
pagkalapad pa gayod sa mga lawod
pagkadaghan pa sa mga isla ug
kabukiran
pagkaanindot sa mga buwak
pagkalami sa hangin nga bugnaw
sa baybayon"

ug dayon nilag labay sa bato ug
buwak diha sa imong lungon nga
karon mokuyog kanimo sa
imong gipili nga katulugon

ang imong iro nga gibiyaan
anaa naghalhal ang dila
nagpaabot kon kanus-a ka
mobangon
aron makigkuyog kaniya ug
lakaw diha sa daplin sa
baybayon

alang kang sa mga sum-od nga yawit ni sara

napura ko sa kang sara
kabahin sa mga dahon sa agosto
sa mga adlaw sa mayo
lahos sa gisugdan nga kainit
sa kamatyonon nga
mga adlaw sa abril

gikapoy ko sa kasum-od sa
awit sa dagat
sa mga balod nga nagbalik-balik
sa gatanga nga tutok diha
sa baybayon

sakit sa dughan ang walay puas nga
pagtagaktak sa ulan diha sa atop sa
atong balay
nga sin nga morag mga tikang sa
pagsugod sa mga kaulag sa iring

mosulod ko sa lawak manirado sa pultahan
puslan man nga kining kasingkasing
punay mong samdan
sulayan kog ampo ang kahilom
aron mapusa kining itlog nga akong
gipakatulog sa kainit sa lumlom

balak alang sa kaulag nga nagtakuban nga gugma

ako ang balod
luyo sa imong balod
sundon ta ang ritmo
sa atong kiyod

ihapnig nato ang atong
mga kamot
sa abaga sa sofa
ang imong mga kamot
ilalom sa akoa

pagkaanindot lantawon
sa samin ang mga kandiis
sa akong sampot

takilid gamay
gusto nakong dakpon sa
akong dila
ang imong dila

kini ang sakay sa sakayan
sa gugma
ako ang balod luyo sa imong
balod
duyanon ta ang kiyod sa atong
kiyod
diha sa lalom nga kandiis
sa atong mga sampot

ang subm-od nga hagawhaw sa mga balod sa baybayon maoy duyan nga muyogyog na usab kanato sa katulugon

ang kalimot gamhanan
nagpasalamat ko nga gikalimtan na
ang tanan

sa akong pagbudhi
kalimot ang tambal sa mga sakit sa samad
nga imong gibati

kon dunay mosusi diha sa panugilon
diha sa panagsuod
ingnon mo sila " asa god ato?"
dayog ingon "nakalimtan ko na
kay dugay na kaayo"

bisag anaa pa kini nakasulat sa imong
panit
unya gangutngot pa gihapon ang mga
paak sa pulang hulmigas

gikalimtan ko na usab ang labawng
kalipay
nga gibati ko kaniadto nga wala ko
gibati diha kanimo

kon gisakitan ka gisakitan usab ako
ug kon akong handomon sa makausa
pa sa usa ka aghat diha sa kahidlaw
ako ang usab moingon sa akong kaugalingon
"asa god ato? gikalimtan ko na kadto
kay dugay na kadto kaayo"

lingawon ko ang akong kaugalingon sa
pagsud-ong sa kahaponon diha sa pag-usob
usob sa bulok sa adlaw nga misubang-misalop
unya ang subm-od nga hagawhaw sa mga balod
sa baybayon maoy duyan nga muyogyog na
usab kanato sa katulugon

sa lain na usab nga unang gabii sa atong gugma

kagabii
mao ang atong unang panagdulog

sa dugay nga panahon
gitukod nato ang mga labat sa adlaw
ug kagabhion

taas nga labat, sementado nga
bongbong
baga, dayon ang dagat dili na
makita

kagabii gibulag kita sa usa ka
alugnan
unya ang atong gipabati sa atong
dughan
mao ang tumang kahilom

nagkapakapa kita diha sa
kangitngit
gipangita nato ang kainit sa
atong mga kamot
kay gusto nato unta kining
hawiran

kagabii
gikalipay nato ang hagok sa
katulugon
ug didto sud sa lawak sa atong
mga damgo
gisabat nato ang taas nga
pangaliya

ning sayong kabuntagon
wala mitugtugaok ang sunoy
nga giputlan na ug liog
sa atong katabang
alang sa atong panagsalo
sa usa ka tinola
unya dapit kon kita mangmata
ug mohigop sa init nga sabaw
isip pasalamat
sa lain na usab nga  unang gabii
sa atong gugma

magsugod na usab ug sulat kabahin sa akong agianan

lahi ang sayong kabuntagon karon
ngitngit
unya kusog ang ulan

masulub-on kini sama sa usa ka
byuda nga bag-o  lang
naglubong sa iyang bana

ang tingog sa ulang sama sa usa
ka danguyngoy
sa usa ka bata nga gutom ang
tiyan ug walay pamahaw
ug diha sa ilang balay wala pa
ang mga ginikanan

ang mga gabigabi morag mga iring
nga nangabasa
nga piso nga wala nay inahan
ug nagkurog sa daplin sa labat nga
kawayan

ako ania, naglingkod sa silya nga
uway
nagdungaw sa bintana
namati, naglantaw, nangapkap
sa pulong
ug unya kuyog sa kapuol magsugod
na usab ug sulat kabahin sa akong
agianan

ikaw nga nagmalipayon

gihigugma mo siya
ug gihigugma ka niya

mao kana ang kalipay
nga makaaghat nimo ug
kanta duyog sa mga bitoon
sa langit hangtod na sa
pag-abot sa kahayag sa
adlaw hangtod na usab
sa lain pang moabot nga
kagabhion

mosayaw ka silong sa
mga kakahoyan
moambak
mag-ambaya sa gugmang
gisalohan sa inyong
duha ka kasingkasing

ako nga maglantaw
malipay usab apan dili kini
molangtad kay inig pauli
ko sa balay sa akong kasingkasing
wala ang akong gihigugma didto
ako lamang usa sa sulod sa
lawak diin sugdan ko na usab
ang pagtapak sa mga gising
sapot
sugdan ko na usab pagtambal
ang mga samad
nga walay pagkaalim
unya di na kamao unsaon
paghulma sa mga
ulat

kay sama mo nga nagmalipayon
ako nga nagmasub-on
kamao sab gihapon nga molakat
sa kinabuhi

gihigugma ko gihapon kini
bisag wa na kini mahigugma kanako

misimang ako, ug mihunong dayog biya sa lugar

kon ako magpaabot
ang gadulong makita ko
na unya andamon ko na
ang tanan:

una ang akong
kaugalingon,kinahanglang
walay iyakay,

ikaduha ang garapon
nga gisudlan ko sa akong
mga nahibiling pangandoy
kinahanglang dili gayod
kini mabuak

ikatulo mao ang pultahan
ug hagdanan, kinahanglang
lig-on aron walay maglisod
ug abri, walay maglisod
ug tikang,

nagdulong na ang mga
pulong sa pagbiya unya ang
akong baba nangandam na
sa pagyubit niini,

layo pa apan makita ko na
ug akong gibati ang sama
kaniadto sa dihang miapil
ako sa lumba sa dagan unya
didto sa tungatunga na


misimang ako, ug mihunong
dayog biya sa lugar
palayo sa mga tawong
andam na untang mopakpak
sa akong kadaogan.