atong tagay

mga bay, miinom ko aron dili makalimot
kay hadlok kog makalimot
basig aduna koy mabuhat diha sa silong sa gahom sa kalimot

miinom ko ug pipila ka tagay aron lang kaninyo makighugoyhugoy
tawo ko
nga kamao sang mobati ug kamingaw
apil na kamo,

karong gabii, magtagay na usab kitang tanan
ikaw, ang unang mopaambit sa imong kasubo,
siya, ang sunod nga mohisgot sa iyang kasuko,
ang sunod, maghisgot sa iyang kahiubos
ug daghan pa, ug lain lain pa gayod,
hangtod nga ako na usab
ang moyubit

apan aron malahi ako,
sulayan ko paghisgot ang dili laay,
ang dili las-ay,
ang dili subo, ang dili kasuko,

sulayan kog bali ang bukog sa kamingaw
ug gikan sa mga bali nga mga bukog
ako kining tagkoson
aron mamahimong mga pako

ug dayon hagiton ko kamo
diha sa usa ka paglupad
gamit ang ispiritu sa bino

adtoon tag sulay ang langit
kon kini anaa pa ba dinhi
sa atong gipili nga kangitngit.