ang dili paghikalimot

naabtan na nato ang atong mga adtoan
nahuman na ang mga katuyoan
plantsado na man unta ang mga nalum-it
diha human sa usa ka paghisgot ug
dayon pagbiya

ngano ba kaha nga sud niining sakyanan
sa dihang layo na kaayo ako gikan kanimo
mabati ko pa man gihapon ang imong pag-iyak
ang imong pagpamugnaw

ako lang usa dinhi, apan pagkaguot gayod
sulod dinhi
makita ko pa gihapon ang imong panagway
sa gilabyan kong mga kabalayan
sa mga kakahoyan
ug bisan gani didto sa sapa nga akong
gitalikdan
atua pa man gihapon ang imong sayal nga
gilatag sa kabatoan