Tuesday, November 26, 2013

DUHA KA PAHINUMDOM



UNA: kadtong nasakpan mo
ang nangawat sa inyong lanzones
nga tua sa taas mitago sa mga
dahon

imong gipaasohan ug wala
kaginhawa
ug midali-dalig kanaog ug
dayon dagan
kay naulaw

IKADUHA: kadtong mibisita ka
sa inyong kalubinhan unya dunay
nangahoy sa palwa ug takong unya
imong gipangutana kon kinsay
gasugo niya ug nganong ania siya
ug kon kinsay iyang gipananghiran
unya wala siya katubag sa tumang
kahadlok
unya ulahi na nimong nabantayan
nga kadtong tawhana
duna diay gamay
sa ilok.

kadtong mga panahon nga imong
giingnan ang imong kayutaan nga ikaw
ang hari dinhi ug ikaw ang magbuot nga morag
nakalimot ka nga ang kamatayon
anaa ra diay nagtindog sa imong kiliran
unya nagpakahilom lamang

No comments: