wa koy nahimo
sa dihang giinitan ko ninyo
gawas lamang
sa pagsulat kabahin sa kahiubos
nga gisagol sa gitagong kasuko
gabukal ang akong dughan
gustong molupad ang akong mga kamot
aron lang unta
makabalos diha
sa pagsumbag
lahi ang inyong gihimo
gipasulod ko ninyo sa usa ka lawak
gipainom ug kape
pakapinan ug mamon
dunay gamayng pag-ila-ila
ug sa dihang mitalikod ko
dayon ninyog pangatawa
gipildi ko sa inyong
lingla ug lipot
gipusta ko ang akong
disesyete ka tuig
ang akong pagbasa ug
pagtuki ug
pagkugi ug tuon
gamit ang kandila
hangtod sa kaadlawon
apan walay pulos ang
kakugi ug ang kaigmat
diha sa inyong
pag-init kanako
salamat, aduna ray adlaw
nga musubang alang kanako
mas gilak pa kaysa
karon
kana ang akong paaboton
wala kanako ang gahom
sa pagpanimalos sa usa ka
hayop.
