gipahaluna sa babaye ang itom ug taas
kaayo niyang buhok
sa paa sa lalaki
ang iyang dila nanabsab sa
iyang umahan
morag karnero
nindot ang palibot sud
sa iyang hunahuna
init ang adlaw
lunhaw ang kasagbotan
namuswak ang
mga buwak diha sa
dughan
pagkalalom sa ginhawa
sa kasubo nga iyang
gitago sa iyang kasingkasing
busa mipiyong
ang iyang mga mata
ang sud sa kasingkasing
sa maong babaye
mao ang ngalan sa lalaking
nagpaabot kaniya
didto sa kilid sa
tindahan nga
naninda ug painit nga
kape ug torta
wala miabot ang sakayan sa gugma
ning dapita
sa hilom kaayo nga pantalan
midahili ang nawong sa maong babaye
sama sa usa ka
barkong kalunuron
miigwad ang lalaki
diha sa kalami sa iyang gibati
kinahanglan lang gayod kini
sa panahon nila karon
sa ilang tagsatagsa ka mga
katarungan
wala nay ganahan pa nga mamati
pagkahuman niini
manarapo silang duha sa ilang
mga sala
ipatukod na usab ang
gisugdan
ug dayon nilag pamauli sa
ilang
mga pinuy-anan
pareho silang malipayon
sa lain-laing mga rason
