sige, balikan ta ang duyan
sa atong
eskwelahan,
1968
wala pa mauso ang tsinelas
sa mga pobre
mga dato lang ang makapalit
niini
makasapatos lang
kon magpapicture-taking
kada human sa tuig
unya kon mag-ulan
puston kay basin ug
malapok
buing.
dili ta magpalayo
balikan ta ang karaang duyan
sa atong eskwelahan
kadtong
dato lang ang magpanty
wa kay panty kay pobre
ka man
wa sad koy brief
kay pobre man sab
si tatay
anak tang duha sa pobreng
oten, mao nay bugalbugal sa mga
palahubog sa baryo
Tinamay
dili ta magpalayo
o magpalahi balikan na nato
ang karaang duyan
sa atong eskwelahan
diin ako kang giduyan
diin kusog kaayo ang imong
katawa sa imong gabaha nga
kalipay nga misakay ka sa damgo
nga hangin
gitulod ka nako
balikbalik
pataas pataas pataas pa gayod
sa duyan
nga karaan
gusto nakong undangon ang pagduyan
kay gusto nakong
mahunong na ang tanan unya
imo kong mahinumduman unya
ako kang sabakon
apan pataas, pataas na ang duyan
ug unya
nahanaw ka sa hangin
ang nabilin mao na lamang ako
nga naglingkod nga
nag-inosara
sa duyan nga karaan
pagkapaspas sa hangin
dali lang
miabot ang
2011
diha balik sa
karaang duyan
diin ka
nahanaw.
