kining magsulat ta kon tinoon
morag usa ka panaw paingon sa mga kaniadtong
hagbay rang nanglabay
adunay dakong kabayong puti
nga pak-an
motugpa sa atong tungod
dayog aghat kanato nga sakyan nato
siya
kay aron balikan nato ang
mga nanglabay
usa ka gabii niana
gidala ko niya sa lugar diin
natawo si Nanay didto sa Gata
sa suok nga sitio sa
Misamis
nakita nako otro si Nong Magno
ang ikaduhang bana ni Olang nga akong iyaan
nagbaid sa iyang sanggot
aron iabis sa iyang pito ka
sanggotan
sa taas sa ilang balay nga karaan atua si Tia Olang
nagkataw-anay silang Nanay
naghangop
kay lagi dugay na ug talagsa ra usab nga magkita
sukad naundang ang
ikaduhang gubat sa kalibotan
si Panit, ang akong ig-agaw nga dunay ila sa iyang agtang
maoy nag-abri sa usa ka latang sardinas
nga isagol sa tulo ka putos nga odong
aron maoy sud-an sa panihapon
gamay lang ang dapog didto
unya
itom kaayog lubot ang mga kaldero
unya ang sugnod nga takong ug pinikas nga palwa sa lubi
inihap
ang mga plato kon magpingki
morag babayeng gikusi
mga langking nga gikan sa insik nga
manuroyay
unya nadungog nako ang badlong o
tugon nga
dili gayod usik-usikan ang tubig kay
layo baya ang tunggo nga
sag-ubanan
sa dihang nanghugas na ako sa akong mga kamot
aron mokaon
morag malipayon silang tanan didto
bisan sa kalisod o kapobrehon
gamay pa ko, ug nakita nako ang pagka-ako didto
nga naglantaw sa atop nga nipa nga buslot nga gilusutan sa ulan
unya nagkaboang ug pangita sa palanggana nga kasaloran
sapagpusotpusot nga mga tinoloan
kay ang mga ugnan ug habol
nabasa na man
gusto kong magdugay pa didtong lugara
kining kaniadto
apan ang kabayong pak-an nagpanikad na
di na pahangyo
kay daghan pa kining ihatod
sama kanako
daghan pa gihapong mobalik sa kaniadtong nanglabay
dili lang ako
ambot ug kining kabayoang puti ug pak-an
nakasabot ba kaha
kon ngano
