pagsulti sa tinood

lahi ang itsura
sa tinood kon imo
kining litokon
lahi ang
bulok sa iyang
tingog
mora kinig
tutunlan nga giarat
naa ang
bukog nga nagtaop
sa tutunlan
sakit apan imo lang gihapon
kining litokon
pagaw-pagaw apan
dili hagawhaw
puno, bus-ok ang
pulong
aslom sa dila
guot sa liog
huot
paminawon
apan mogawas
kini bisan
prisohon
sa nindot kaayong
mga bakak
sud sa imong
hunahuna

pagawas niini
lami ang bation
sama
sa pagkahuman
nindot
sama sa unang
paglitok
sa usa ka amang