fuji apple

nindot nga tan-awon
pagkahamis sa panit

pagkahumot sa
alimyon

laming paakon
og tam-osan

pagkadako og
pagkasinaw og

sa usa ka bulok
sa sayong kabuntagon

pagkanindot gayod
untang angkonon

makalingaw nga
makatintal

apan
pagkamahal

dali lang
madugta og

dili molungtad
sa akong mga adlaw

fuchsia

sa tanang bulok
nga gibati sa akong
kasingkasing

mitumaw ang
fuchsia

dili pula nga
sama sa kalayo

dili usab lunhaw
sama sa kalinaw

naa ang madudahon
nga kalipay

naa ang kahilom nga
gustong moagulo

naa ang paghawid
sagol usab sa kahadlok

mipatigbabaw
ang kalami

apan miitumaw usab
ang gamay'ng kapait

anaa ang kahapdos
nga morag paak sa hulmigas
nga laming kalot-kaloton

nindot handomon
apan angayan
nga hikalimtan sa dayon

didto sa boracay
usa ka adlip sa kahil
sa kilid sa baso
ang akong kanunay
nga mahinumduman

sa dihang
gihinay mog sigop
ang margarita
sa pula mo nga mga ngabil
og dayon mog
hatag sa usa ka pahiyom
alang kanako

naunsa bang hitaboa

naunsa bang hitaboa
nga bisan og nagkalapoklapok
tang duha
ang atong nasimhot
og nakita mao
man ang nangalimyon
nga mga pula kaayong
mga rosas?

pagkatam-is gayod
sa imong mga ngabil
pagkainit
sa imong dughan

anahaw

dahon sa anahaw
lunhaw

nga
kagahapon
sa silong sa kusog
kaayo nga bunok sa
ulan
og lamparos sa
hangin
niadtong usa ka dulom
nga
kahaponon

padulong sa bungtod
ang nga
mga tunob
misulod sa usa ka
biniyaan nga payag
kilid sa mingaw
nga sapa

kitang duha
wala'y gibating
kahadlok og
katugnaw

hustisya sa usa ka orgasmo

wala nako mahatag ang hustisya
sa imong orgasmo

diha sa mga rebentador
nga nagpakaaron-ingnon
nga karong adlawa
mao na ang kagawasan

sa kapit-os sa atong gugma
abri ang imong baba
migawas ang kataposang pangagho
sa usa ka himayang
abi nato og wala na gayoy kataposan

gidagit ako sa usa singgit
nga gitabonan dayon
sa hapnig sa kalipay

sa pagpiyong sa mga pilok sa kahilom
og pagtabilangkad sa akong hubo nga hunahuna
sa tungatunga sa lantay nga kaganiha nabasa
sa ulan sa atong gugma

apan kalit lang kaayong nauga
sa paghikatulog sa atong mga pagbati.

tintal

tintala ako
sultihi ako sa kahumot
sa imong mga totoy
sa kahumok
sa imong pus-on
ipabati kanako
ang awit sa imong
mga hunghong
dalha ako
sa kainit sa imong
mga ilok
sa ugdo sa imong
sampot
sa bus-ok mong
dughan
nga naghipos
sa imong
kasingkasing

tintala pa ako
pag-ayo
kanang mawala na
ako sa akong
kaugalingon

tintala ako
sa matag gabii sa
akong kamingaw
sa akong
pag-inosara silong
sa takdol nga
bulan

tintala ako
sa mga bulak
diha sa imong
kagwangan
sa mga suba
sa imong baba
sud sa imong
alingagngag
diin nagpaabot
ang gahom
sa imong dila

ayaw undangi
ang imong pagtintal
kanako
duslaka sa imong
halok
ang akong
kitin ni
Akiles

og kon matintal
na ako
bitara ako
sa imong bilahan
patya ako sa
imong hugot
nga gakos
luyaha ako
sa laway
sa imong mga
halok
tam-usa ako
sa imong
mga ngabil
pang-ita
ang akong
pagkagahi
nga mahigugma
sa tiunay

tabana ako
walaa ako
dalha ako

paingon sa pantasyang
walay kapaingnan

sa matag bakak nga akong gilitok

sa matag bakak nga akong
gilitok
nga akong gisininaan sa
maanindot nga bulok
sa mga pulong

akong gihinayhinayan
og pakita kanimo
ang mga kamatooran

putol na ang mga kuko
naibot na ang mga daot nga ngipon
nga nagngotngot og naghasol
sa utok
limpyo na ang mga lapalapa
wala nay atuli ang dunggan
nalukat na ang mga
kugang og
natangtang na ang mga buling
nga gitagotagoan

hapsay na ang buhok
sinaw na ang pinahapay
wala nay muta ang mga
matang katulgon

makita mo na ang imong mga
gihandom
mahikap mo na ang imong mga
gipangandoy

naghawiray ang mga kamot sa bakak og
matood
og imo silang gisayaw
gigakos og gihagkan

apan didto ka sa bakak
nakigdulog
mas lami mas lalom
ang iyang kalipay

og ang matood nagpakahilom
na lamang
naglingkod sa daplin sa bintana
sa kabalaka
samtang naggansilyo og mga bulak
atubangan sa
bag-ong misubang nga adlaw.

lantawa

lantawa
sa dugay makita mo ang lawas sa hangin
walay pako
apan kanunay nga naglupadlupad
walay baba
apan nagtayhop sa kabugnaw
walay ngabil og tilaok og dila
apan nanag-awit sila
alang kanimo

lantawa
wala silay padulngan
bisag asa sila mopaingon
walay hunonghunong
apan sa ilang nawong dili mo
makita ang mga kabalaka

lantawa ang tanan sa imong palibot
mga kabulakan sa mga kabungturan
mga dagat nga asul
nakighawid sa mga kamot sa panganod
adlaw nga nagmingaw
og nagtultol sa iyang pahulayan
bulan nga nakighinabi
sa gabiing nag-inosara
daghang mga kamot ang mga kahoy
diha sa iyang mga dahon
daghag mga tiil ang mga sapa
taas og buhok ang mga suba
og ang mga sagbot
migakos og hugot sa yuta

lantawa kining tanan
nangabuhi sa gugma
kining tanan
sila, silang tanan
kon imong palandongon
nahigugma baya
kanimo.

kon nasayod ka lang
gilingla ka lang sa kasubo
og sa matag oras
sa matag hulog sa imong mga luha
napatik
ang mga bakak nga nauga
diha sa mga salog
sa lawak nga
nagpriso kanimo
layo sa kalipay nga giandam
sa kalibotan
alang kanimo.

horoscope ni toro

makapandol ang
imong pagkawalay-alamag
dili ang mga
bato sa dalan nga nagkatag

makalisang ang imong
pagkatapolan
dili ang pagkadili pagkasinabot
sa mga hunahuna

nagpabilin kang hubo
bisan pa sa kadaghan sa dahon
nagnganga ka
gustong kan-on ang tibook
nga bulan

ayaw paanod sa sulog sa
gugma mong
gabaha
kay ang imong panumduman
hagbay rang
kiang.

sa gapnod

sa gapnod sa kalibotan
sa kalibog
mga bukton sa
pagduda
mipauraray ka

ug sa matag abot
sa kahayag
sa adlaw
mao ray imong
pangutana kon
gihigugma
ka pa ba

ambot kon unsay
isulti ni Kupido
kon magkita pa sila
puhon ni
Sayke.

walay paglaom

kining ulat
magpabilin

kadtong gugma
mibiya

korona mo
ang kapakyasan
gihimo mong
suba
ang kasakit


dugay rang gidagit
ang kalipay
sa layong isla
wala ikaw miapas

nagtagad ang
sakayan sa
paningkamot

bug-at ang imong
mga tiil
og huyang ra kaayo
ang imong
mga kamot

ang imong kasingkasing
patay.

hep hep

1. si lourdes
2. dakog gusto nga magpa
3. e,
4. apan lagi hadlok
5. sa mga
6. hepa A,
7. hepa B,
8. og hepa C,
9. hiv, hpv, aids, gc, ngcu, cervical CA
10. kay lagi
11. kini si Lourdes
12. doktora man
13. daghang sakit ang
14. gikahadlokan
15. apan sa dihang
16. nagtagbo
17. na ang ilang mga mata
18. ni lourdes og ni luis
19. og napag-id ang iyang
20. pus-on sa
21. pus-on nga dunay
22. pug-on
23. nawala ang mga hep hep
24. nahimong

hurray!

da lami jud lagi
wa jud manangpit!

orgasmo

sa kakapoy
nahikatulog ka
og nagdamgo
kuno nako
ingon ka

dako og taas
kuno ko
nga misulod
sa imong
sabakan

og ikaw
sa kalami
nagawsan

karon,
chat lang gihapon ta.

iring.

ang estorya ni manang vicenta kang papa

samtang nagharayharay
si papa
sud sa iyang bag-o
pang nahuman nga
balay
sa among balangay

milabay si
manang vicenta
nga gikan pang
namawod
sa daplin sa suba
nga gadalag
sibit nga buli
og hait nga
kutsilyo

wala pabanban
misyagit ang
palahubog nga
tigulang

"hoy gorio
na,hala palami sa
imong balay
dili na jud ka
ganahang mamatay!"

og si papa
wala na lang mangambat
natulog
gihapon sa iyang
daan nga lantay.

mga pangutanan sa tawong giango-ango na

kon imong makita
usa ka adlaw
nga wala ko ka
zip sa akong pants
og dayon
wala pa jod ko
kasuot og brief
kay nakalimot
ko nga
angayan diay
kining buhaton
unsa may imong
buhaton?

pwede nga ako
na lay tubag?

pwede nga
wala na lay tubag

pwede nga kining
mga butanga
ato na lang untang
ihilom?

pwede kaha?
imo pa ba akong
gihigugma?

lima kami nga mga anak ni nanay

• 
  
lima kami nga mga anak ni nanay
ug kanunay niyang gipasigarbo sa una
nga wala siya'y anak nga pinalabi kay kon unsa ang ihatag sa usaiya gayong gipaningkamotan nga mahatag gayod sa tanangilantaw nako si nanay dihanggihaya na siya sa among balaysulod sa lungon nga mahalonug gialirongan sa mga puting rosasnga pinalit gikan pa sa layong syudadakong gihipos ang akong mga luhawala gisulti ni nanay nga kaming duha mao kanunay ang magkuyog pagkaonog halo-halo nga espesyal ug torta kaniadto didto sa Lenie's ug sa akong pagkawala'y buot iya kong gitugon nga dili gyod magsabasa uban nakong mga igsoon
• 
  

panglantaw

• duha lang ka panglantaw
• ang maghatag kanato og kahulogan
  
  ang una kabahin
• sa kinabuhi
• ug ang kataposan
  sa kamatayon
  
• 
  sa tunga-tunga mao ang
• atong pagkabuta ug pagkabungol

3:25 sa kaadlawon

3:25 sa kaadlawon

manira na usab
ang bintana

sa akong kalag

ang akong mga tudlo nanagan

apan wala gyod ko kahibalo kon

asa paingon

ang akong makita

mao ra ang katas-on
sa akong pilok

duha na'y nawong sa mga pulong

ug pangitaon pa nako ang usa ka

tuldok

mga balaan

mga balaan

koronang tunok ni Jesus
panyo ni Veronica
gilansangan nga Krus
mga tunob ni Moses
gabas ni Jose
tapis ni Maria
bakos ni Juan
manok ni San Pedro
liston sa sandalyas ni Pablo
mga tudlo ni Tomas
ug ang pinutos ni Hudas

paghimo og tanghaga

paghimo og tanghaga

pagkuha og bulad nga palotpot og tanod
hikti ang bulad dapit sa ikog
ayaw sa ulo
patas-i ang hikot
unya itagkos sa bitayanan
dapit sa inyong dapog
kanang maasohan pag-ayo
sa sugnod nga bil-ongan

pangitaa ang dapit diin makita sa bintana

ang pag-abot sa bulan
kanang maayong pagkatunong
sa bulad aron makakuha ka

sa iyang anino

itunong ang anino sa bulad sa imong plato

nga may tinunga na daan nga puso

ug sa tungatunga pasagdi

ang anino nga walay kalainan

sa gabilangkad nga puso
maayong pagkadusmo
ulo sa bulad

dayon pagtinidor ug ayaw pagkinamot
ipatong ang imong tuhod dapit

sa dapog ug hunahunaa nga kini na

ang kataposan nimong panihapon

panalagsang panagkita

panalagsang panagkita

bisan og sa makausa lang
sulod sa usa ka bulan
buot nakong kitang duha
mahimong mga trapo
aron makuha ang mga lama
sa kahoy ug magsinaw

pag-usab ang sawog

dayon pagkahuman
sa talagsaong higayon
nga atoa unyang balik-

balikan og handom

mag-usab kita nga angay

pahinungdan og nobena

sa mga manang sa ilang

karaang kapilya

sa kagabhion

sa kagabhion

sa kagabhion

didto sa bungtod
sa Bandera

gilantaw nako

ang daghan kaayo

nga mga bitoon

gipangita nako
imong mga mata
imong mga ngabil

sama sa usa ka hangin

sama sa usa ka hangin

malantaw sa akong pag-inusara
ang akong padulngan
dili ko mangutana kon asa
ang kataposan

matag lakang mao lamang
ang pagsugod
ang paghunong ang gipangandoy

nga pagpadayon

labing nindot ang pagtak-om
kay mahilom ang kabalaka
labing nindot ang paglutaw-lutaw
kay mahanaw ang kabug-at

sama sa usa ka dahon
sakyan ko ang hangin
ug imo akong maangkon

sama sa usa ka hangin

usa ka hapon nga mabulokon

usa ka hapon nga mabulokon

sa lawod

niining kinabuhi

nakita ko ang mga isla
sa panganod nga nakighalok
sa aping sa dagat

pagkamalinawon
sa ilang panaghagwa
ug ako nga saksi

sa landong sa ilang kahilom

nawad-an og pagsalig

sa mga pulong

kubot sa gamayng kamot sa bata

kanang gamayng kamot sa usa ka bata
ug dayon ang akong ulo motultol dumdom
sa usa ka ugnan nga duldol
labi na gyod kon ako hawiran sa gihay
sa iyang mga tudlo ug matapot ang kahumok
sa iyang palad sa akong kubal
mora ba'g giulog-ulogan na pod ako
pagtugyan sa kaugalingon balik sa ginoo
ubos sa alimyon sa iyang altar
kanang gamayng kamot sa bata
maoy mobitad nako nga maghangak paingon
sa hardin nga gilapawan og mga bulak

kutob lang sa pangagho

samtang naghimo ako
niining balak alang kanimo
aduna akoy gilantaw
sud sa akong kasingkasing
nga dili ikaw

nakita ko ang akong kaugalingon
nga dili angay kanimo

nakita ko ang akong gihigugma
og kini dugay na nga naghandom

nga modagan
apan wala kini mga tiil
nga molupad apan subo
nga palandungon
nga wala pa kini mga pako

nakita ko ang akong kalipay
nga ako lamang
nakita ko ang akong pagkalup-og
diha sa kahilom

nangagho ako
og kutob lamang ako didto.

sud sa tutunlan sa ilang kangitngit

gikalipay
mo nga ikaw usa lamang ka
anino
sa ilang panglantaw

anino
hangtod karon
ikaw usa lamang ka anino
sa ilang
mga wala maabot sa ilang
mga panglantaw

gitagoan mo ang adlaw
sud sa imong dughan
og busa
nalipay ka nga naglantaw
nga silang tanan

hangtod karon
anaa lang gihapon sud
sa tutunlan
sa ilang kangitngit

ang nahitabo sa bata

namuyok ang edad
sa kabatan-on

daghan ang gisaad
nga iyang makab-ot

sama sa adlaw og mga
panganod og mga bitoon

mihingkod ang kabatan-on
og nasayod sa kamatooran

kanang mga saad
walay tumanon og kanang

mga gugma morag mga
dahon nga mangalaya na lang

walay moabot nga ulan
og dili na gani makapamotot

og natigulang ang bata
mikugang ang agianan sa iyang mga luha.

sa kataposan
naandan na ang pagmahay

ang kasakit maoy kinaon
og ulahi na niyang gikalibang ang kalipay

nahimong abog ang mga bukog
gipalid sa hangin og wala na mitingog

usa lang unta ka hinanok sa katulogon

unsa ba ang pangayoon
sa usa ka pag-ampo?

karong gabhiona
gusto nako nga unta
wala na ako'y pangayoon

gawas lang unta sa usa
ka hinanok
kanang dili na nako madungog
ang haguros sa
pagtuyok sa akong kalibotan
kanang dili na nako mabati
ang pagpanghanaw sa
mga bitoon sa
akong langit
kanang mawala na ang
bagolbol sa usa
ka hinanaling kamatayon

realidad

makamao sa kinabuhi ang
bungi
nga mitabon sa iyang mga ngabil
samtang
naghisgot ka anang
kaminyoon

maayong pagpahaluna
ang iyang mga pulong diha
sa birtud
sa pagpakahilom

og wala niya bisan kanus-a pa man
handoma ang gahom
sa pagtaghoy

duda

sa gamay pa si Kadyo
sayo kini nga nakat-on

og ang iyang amahan
dili makatoo nga ang
iyang anak
makamao na nga moihap
og mga bulan diha
sa iyang tudlo

misaysay ang inahan nga
kuno iyang gilukip ang
unang pinutlan nga buhok
ni Kadyo
sa libro tupad sa
hulagway ni Jose Rizal

apan wala mitoo ang
amahan
og didto nagsugod ang
kalbaryo sa kinabuhi
ni kadyo

ang iyang mga tudlo
nanglabhag
sa mga bunal

kay ngano ba nga kini
makaihap man sa mga bulan

nga ang iyang amahan
og pati ang iyang inahan
haskang bogoa man.

Lord kon imo man ugaling akong lukuton

Lord
kong lukotlukoton
man nimo ugaling
ang akong kinabuhi

kanang pakyas
sagol palpak
kanang kaulaw
nga gibagnosan
og katagam
kanang kasubo
nga gisalad
sa kasakit

maayo unta og
artistic lang pod
nga pagkalukot

kanang mora bag
table napkin
nga gipilo nga
morag bulak
tupad sa mga plato
baso
kutsilyo kutsara og tinidor
sa usa ka kumbera
alang sa mga bag-ong minyo

ang dili nako malimtan kabahin ni Linda

napulog-pito pa ka kilometro
ang latason aron kami makaabot
sa ilang payag
gikan sa lungsod

walay habal-habal
nga moabot didto

kaunom ming milabang
og suba
namidpid mi sa pangpang
mitungas sa taas kaayong bungtod
misuot sa mga kakahoyan
sa kilid sa usa ka lasang
og gisuta nga walay dag-om
disir mogikan kay og
mag-ulan
dili kalapos
kay magbaha man lagi dayon

kasal sa iyang manghod nga lalaki
og ako nga gustong molantaw
anang kasal nga taltal
nananghid ni papa nga mokuyog
paingon sa balay nilang Linda
nga among katabang

og tuod man
miabot kami didto

giluthan ang akong
lapa-lapa
mikurog ang akong tuhod
nagkasamadsamad ang
akong bukton
sa kahait sa mga cogon

yano lang ang kasal
usa ka baboy giihaw
walay panakot nga
giadobo human
giihaw

wa gani patis
walay vetsin

ang tinai gihimong
dinuguan
og ang mga tiil
gilat-an

ang kanding gipapaitan
ang uban gipaklay
ginamit ang mantika
sa baboy

pulahon ang humay nga
gilung-ag
og nagbaha ang tuba
nga amot sa mga silingan

adunay sayaw-sayaw
sa agong
og gamayng pahimangno
sa mga katigulangan

nakainom ko sa pangasi
nga usa ray suyopanan

(ang straw nga gigamit
stalk sa humay)

sugilanon sa usa ka banay
nga nagkahiusa
sa pagpasanay

kinahanglan nga daghanon
ang mga anak
aron daghang magdaro og
mananom sa kabukiran

hapit na kaadlawon
sa dihang kami nangatulog
tupad sa ilang iro,
sa ibabaw ang pugaran
sa mga himongaan
sa ubos sa mga salog nga
kawayan
atua ang anayon og iyang mga baktin
ang kanding og ang
mga pato

gihikot sa kilid sa balay
sa haligi ang kabaw nga toro
ang baka nga mabdos


wala ko katulog
kay nadungog nako ang agulo
sa bag-ong magtiayon
nga bisan og kusog ang hangin
sa ibabaw sa bungtod
mosapaw gayod ang
ungto sa kalipay
sa bag-ong kaminyoon


naglaposlapos ang hangin
sa giwang sa bongbong nga sawali og kawayan

sa buslot nga atop nga nipa
nakita ko ang mga gagilak-gilak nga mga bitoon

gamayng kamot sa usa ka bata

kon makita ko na gani
ang gamayng kamot sa usa ka bata
makahinumdom ako
og ugnan nga doldol

labi na kon hawiran ako niini
mabati ko nga
pagkabaga na gayod diay
sa akong mga kubal
pagkahumok sa iyang mga tudlo
pagkahumot sa iyang palad

usahay mora bag
giulog-ulogan na pod ako
sa atong ginoo....

labi na kon
ang maong kamot sa gamayng bata
mobitad kanako
paingon sa usa ka hardin
nga puno
og mga bulak

pag-ampo

amahan
ayaw kami og tagai
og kalipay nga hilabihan
ayaw kami hubga
sa kahayahay
hangtod nga makalimot
kami kanimo

amahan
ayaw kami og hupnga
sa kahamugaway
hangtod nga kami
motalaw na
sa kasakit og
sa kapakyasan
hangtod nga kaming
tanan
wala nay pailob
wala nay paghatag
og bili nianang
pag-antos

amahan
ayaw kami tagai og linaw
kaayo nga panahon
sa among paglawig
sa among tagsa-tagsa
ka kinabuhi
hangtod nga dili na kami
mosangpit sa imong
ngalan
pagpangita sa imong
kaayo
paghandom nga kami
imong giyahan
sa among pagpangita
sa kamatooran

amahan
kining among sakayan
ianod sa dakong lawod sa kusog
nga sulog sa
kinabuhi
kanang wala na kami
makita nga isla
nga among kadunggoan
kanang ang among maaninaw
mao na lamang ang
mga bitoon og mga dagkong balod
kanang among madungog
mao na lamang
ang mga dalogdog
kanang among makita
ang mga linti og liti
kanang among mabati
ang kakusog sa hangin
aron kaming tanang
makahinumdom sa
imong pagkagamhanan
aron kaming tanan
masayod nga kami
adunay kataposan

amahan namo
dungga kining akong pag-ampo.

balak sa tawong gatindog sa kilid sa lungon sa usa ka kanhiay presidente

siyam ka oras
kong nagtindog
tupad sa iyang lungon
nga gibutang sa
usa ka taas kaayong
karo nga gilibutan
og mga pangadlaw
nga amarillo

usahay mora
kog malipong
sa kagutom og
kakapoy

alas siete na sa
kagabhion
hapit na kaming
moabot sa iyang
lubnganan
mga duha og tunga
na lang ka
kilometro ang kulang

morag nawala
ang akong mga tiil
morag wala
na koy lapalapa
nga nagdapat
sa yuta

wala kamo
kaayo makabantay
kanako tungod kay
usa lamang ako
ka ordinaryong tawo
sa hut-ong sa
atong katilingban

a tie dimple

naa may
kandiis sa iyang
maroon
nga kurbata

naa poy kandiis
sa iyang aping

bunga kana
sa iyang pahiyom

nga pagkatam-is
sama sa usa
ka duga
sa hinog nga
manggang bisaya

naa poy kandiis
sa iyang sampot
nga iyang
gikoot

nga nakapakurog
sa tanan niyang
mga unod
nga nakapatiurok
sa iyang
tambok

kini ang
entrada sa ulag ni
ranulfa

kini ang iyang
sugilanon sa
usa ka
kandiis

diha
sa iyang
aping nga
ang kapula
morag
makopa

og kini ang
akong balak
alang kaniya

kandiison
ang
hugpa.

ang halad sa matag
adlaw

bulak
sa dalunggan sa
usa ka
inosente
nga batang babaye


og ang
wala pa nimo
mabasa
nga duha ka
balak

pakapin ang
usa ka hilaw
pa kaayo nga
pahiyom

pagkalisod
ba nimo nga
lipayon

pics

yano nga
existence

kamot ni
tatay
hikap
sa hawak ni
nanay

haw-ag ang
gahayang nga
pahiyom
sa lunhaw
nga balilihan

baby girl
milantaw
sa nagkuha
sa pics.

paghandom sa usa ka ok-ok

sa atubangan
sa dakong balod nga
morag habol sa
marital bed

nagpungko ko
ibabaw sa balason
nakong pagbati

unsa ba nga akong
feeling
mora man kog
cockroach?

morag bag ang
akong ulo
usa ka mongo
ang akong mga
paa
morag duha ka
baroto

ang akong mga
lapa-lapa
morag duha
ka pawikan


ok-ok
nahimo ko nga
ok-ok

mora akog gituok
sa dose ka tuig
sa lain na usab
nga pulo ka tuig

mora ako
og ok-ok nga
bisan og
imong pidyaton
sa imong
sapatos

lata ang tiyan
apan
mokamang lang
gihapon

aron lang unta
magpalayo
na kanimo

nagkamoritsing

bitaw bay
bisag kita
sa atong
kinabuhi
nagkamoritsing

apan
nindot lang baya
gihapon
kitang paminawon
duyog sa
awit sa
kagabhion

sakto ka bay

basta naa pa
gihapon ang
pagbating
kalibotanhon...

O! tugnaw
nga panahon!

O! tindog lang
gihapon!

makalingaw
ang bata,
dili ba?