sa dihang nawala na ang kahinam

sa dihang nawala na ang kahinam
nalaya ang bulak
sa gugma, og sa matag adlaw og
gabii, ang panagkita mao
na lamang ang
pagtalikdanay og panagtakbo
sa mga sampot,
nakapangagho ang kahilom
gipangita ang
mga rason ngano nga ang panag-ipon
molabay man niining
dalan sa kalaay

mipailob ang mga takna
diha sa iyang pagtuyoktuyok sa
lingin nga orasan

pagkalapad pa sa panaw
sa atong mga sakayan nga karon
nagkadaiya ang
pagbugsay
sama sa mga panglantaw nga
nagkasumpaki

gipangita ang punto sa usa ka
lansang
sa usa ka tunok sa usa ka samad
sa usa ka sagpa
sa panagbulag

ngano ba? unsa ba ang katarungan
nganong ang mga suba
mobalik man sa dagat? ngano nga
ang mga panahon
sama sa kainit og kabugnaw
misalig man og nagtoo?

gihikap ko ang imong mga kamot
militok
sabta ko sabton ta ka
karong gabhiona
ako ka og imo ako
lipayon ta ang subo nga kagabhion
itugyan ta ang alang
kanila
wala kitay pulong nga litokon
nga makakisaw sa atong
gikayam

og sama sa mangangayam atong dakpon
ang idlas
dili nato kini patyon
ato kining dalhon nga buhi sa atong
mga panumduman

tinood ba nga imo gayod akong gihigugma?
sayri ko
samtang ang mga takna anaa pa sa ilang
gituyukan.