DOHINOB CURVE

dinhing dapita daghan
ang naglirawliraw
walay kalinaw


sa unahan anaa ang
mga mipahulay
usa ka lungsod sa mga
patay

mibawog ang dalan dinhi
daghang napidyat
daghang ulo ang nangabuak
daghang kalendaryong kalit nga
miundang

miingon ang pulis nga
aduna kuno'y dakong baboy nga anay
nga nagbakya nga siging molabay
dinhi ug kadtong makuratan
molihay ug sa pagsigig lihay
anaa nangamatay

adunay usa ka pamilya nga
naraspa dinhing dapita
ug kay walay nabilin kanila
walay nagbangutan

gahapon gibalikan ko ang maong
dapit
mihunong ko ug namati
malinawon ang mga punoan sa mangga
ug mga lubi
hapsay ang hangin nga gikan sa
baybayon sa sta. cruz

wala ako'y nadungog nga mga dangoyngoy
ug ang mga nanglabay sama sa mga naandan
sama sa kinabuhi
nagpadayon ang panaw nga
morag wala lang
nga mora bag nag-ingon nga mas maayo pang
ilubong ang tanan ug
dayon hikalimtan