aron dili kaayo nila mabantayan

matag tagsa kanato
naghambin ug mga bato sa
usa ka bakat nga
kahigwaos

sa gabii masugid mo kini
sa imong tupad nga dili nimo
kaayo kaila

pagkabuntag isul-ob na usab
dayon nato ang sapot sa usa
ka pahiyom

aron dili kaayo nila mabantayan
ang tinood nga kaguol
doblehan mo ang sapot sa pahiyom
sa usa ka mas baga pa
nga buhakhak

ug kinsa pa ba'y motoo nga kitang
tanan
pareho ra diay ug mga bukog
nga nagtakuban ilalom sa panit
sa atong tagsa-tagsa ka mga
dughan?