ang bug-at kong balak alang kanimo

matag gabii
magdamgo ko nga ang akong ulo imong giputol

balik, balik, balik, balik kini
ug sa kadugayan
naandan ko na nga kini imong putlon

usahay,
makalimot ko nga kini imong gibuhat
matag gabii
ang kalisang hinayhinayng nahilis
mga morag silhig nga
nangahalhag
hangtod ang nahibilin mao na lamang
ang kubtanan

naglibog ko ngano nga bisag wala
ako'y ulo ania kanunay man lang gihapon
akong nakigsulti kanimo
nangamuyo

dili ba nga ang tanan, ang ilong, mata ug baba
kuyog man unta sa ulo?

unsang hinungdan
nga kining tanan nahimo mang nahisupak
sa kinaiyahan?

pwes, ang gugma ko kanimo
gamhanan
pwes, ang akong pag-antos adunay
saktong katarungan
pwes, ako na usab ang maningil sa
saktong
bayad ning pagkuha mo gikan kanako
sa akong
mga naandan

bisan pa ug daghag kulang
ang akong kaugalingon
mibarog lang gihapon ako
nga way samang hingpit

ang pagkita sa dili unta makita
ang pagsimhot sa dili na unta masimhot
ang paghikap sa dili na unta mahikap
ang pagpakabuhi bisan unta
diha sa dayag nga kamatayon