wala lang

abi mo
ang payong mahimong
ablihan mo kini dili lang sa ting-ulan
apil na sa ting-init

mahimong dili mo kini itikyop
bisan sa unsang panahon

mahimong imo kining hikalimtan sa ting-init
ug imong hinumduman lamang sa ting-ulan

abi mo
ang payong magpabiling payong hangtod
dili ka na makamaong motikyop ug moabli niini

abi mo
wa ko na hisabti ang pamaagi kon kanus-a
motikyop ug kanus-a mangabli

usahay kon imong dalhon ang payong
wala kay gihunahuna nga hinungdan
nadala mo lang kini
nadala lang

dako kaayo ang dag-om diha sa imong nawong
unya nag-ulan ug luha sa imong mga kamot

abi mo
walay gamit ang payong sa mga panahong
lahi ang dag-om ug lahi ang ulan
nga moabot sa atong kinabuhi

nadala mo lang kini
sa walay hinungdan

mga tihuhuan

alibangbang nga itom sa buwak nga puti, sa dalan sa unahan
ang itom nga iring, mitamblingtambling gikan sa punoan sa bayabas nga walay dahon
balayng hirig, mga batong tipak, irong gikagid nagsuroysuroy sa dalan
ug ikaw gahambin sa imong dughan nga walay sulod.

paghinumdom

sakto ka baya
sayop seguro ko nga magsugod na usab sa usa ka
karaang dula

putol na ang tirador
unya ang akong bala nga bato
pangitaonon na usab

ang lapad nga bato nga imong
paborito sa taksi
nabuak na ug ang mga lastiko
nangatago na

bisan gani kadtong tsinela nga
maoy imong gamiton sa bagolbagol
nadugta na man
gani lig-on man unta kini sa atong
kabatan-on
kaniadto

gusto ko unta nga magdula kitang otro
silong sa bulan sa bugnaw nga kagabhion
gusto pa unta nakong balikon ang dakpanay
ug tagotago

apan sayop ko
mahimong mahadlok ang akong mga kauban kon ang
akong kadula
usa ka hagbay rang patay.

DOHINOB CURVE

dinhing dapita daghan
ang naglirawliraw
walay kalinaw


sa unahan anaa ang
mga mipahulay
usa ka lungsod sa mga
patay

mibawog ang dalan dinhi
daghang napidyat
daghang ulo ang nangabuak
daghang kalendaryong kalit nga
miundang

miingon ang pulis nga
aduna kuno'y dakong baboy nga anay
nga nagbakya nga siging molabay
dinhi ug kadtong makuratan
molihay ug sa pagsigig lihay
anaa nangamatay

adunay usa ka pamilya nga
naraspa dinhing dapita
ug kay walay nabilin kanila
walay nagbangutan

gahapon gibalikan ko ang maong
dapit
mihunong ko ug namati
malinawon ang mga punoan sa mangga
ug mga lubi
hapsay ang hangin nga gikan sa
baybayon sa sta. cruz

wala ako'y nadungog nga mga dangoyngoy
ug ang mga nanglabay sama sa mga naandan
sama sa kinabuhi
nagpadayon ang panaw nga
morag wala lang
nga mora bag nag-ingon nga mas maayo pang
ilubong ang tanan ug
dayon hikalimtan

hadlok kas dula

naunsa ka? gahapon ka lang natawo?
panghimuta daw bi?
apilig panghingogmo
dayon tilawi

likitlikita, sipiti, tilawi na
pod ang
imong kaasgad
ug panamin kay dili
ka na luspad
kawng ungguya ka

hadlok kas duwa

hagbay ra nimong dinuwang
unggoya ka
kapyot kapyot pa ganikas akong
sanga

baliki daw ang
imong gilabyan

tua pang kugmo ug
dalikdik sa imong duwang karaan

bagolbagol
sablaysablay nga morag nilabhang
wa mawaswasi kay
nahutdan ug sabon

kapoy sab baya
pukawon ning pagbati sa
gapaaron-ingnon
nahikatulog sa tiunay nga
gugma

gikan na si dodoy kang inday
ug si inday kang manoy
ug si manoy kang manay

gabirabira sa pising
way putlanan
gapatuwangtuwang
sa lingkoranan
walay kukurbawo

kalooy ba usab
ning gugmang buktot

another shit

lady teacher
meets girl

seven years na sila

one time
chat ming duha

joke joke lang

i sent pictures of
sexy women

bomb boobs

girl gets angry

that they are too

dirty


at 19 she's crazy

receiving dollars from ma'am

and plays

innocent


ma'am gets divorced
from hubby and
takes in
son for good


saying girl is in love
with mama

give her the f sign

too young
 to be a perfect
tick

shit

pasayloa

abi kog ganahan ka niadtong dapita

nga haskang lahia 

misungsong ang gamayng baroto
nga atong gisakyan
sud sa duha ka gaatbang nga isla
nga ang ilang
tawag "snake islands"

sa unahan atua ang ilang
ginganlag " black forest trees"

twin nipples ang duha ka
bulan


unya medyo nauwaw ko
sa dihang miingon ka
nga "you fuck me!"

karma

matag panaw nako sa
layong lugar
gisulayan ko ang dili pagdala
sa makatabang unta

kanako
nga ako puhon makabalik
lang gihapon kanimo
sa atong
naandan nga dapit

gidala ko lamang ang usa
ka pagbati
aron ko ikaw mahandom
kon ako
bation na ug kalaay
ug kakapoy

sa tungatunga sa panaw
adunay gustong akong papason
sama ning handurawan

sa unahan
adunay ako'y gibuhat nga akong
gipasalig nga kini
dali ko rang wad-on

sama sa halok, sama sa pagluhod

apan naunsa bang hitaboa nga
mora man kinig tuko nga mitapot sa akong abaga
nga bisan unsaon nakog
wakli dili na  man
mobiya

dayon iyang gipaak ang akong kalag
ug ako
miagulo sa tumang kasakit

gibasulan ko ang
pagpakiglambigit

unsa ba ang akong buhaton
aron ako makabalik sa akong dalan
balik kanato?

gisulayan ko ang pagpakahilom
gihangyo ko nga ang mga handomanan sama sa mga bagyo
manglabay lang god unta lamang

gisulayan ko ang
pagsakay sa mga pako sa panganod

nawala ka, nawala ko
ug ang ania sa lawak mao lamang ang akong mga kamot
nga nagsigig
papas sa mga luha

pagkakusog sa ulan
pagkabugnaw sa kagabhion

ang bug-at kong balak alang kanimo

matag gabii
magdamgo ko nga ang akong ulo imong giputol

balik, balik, balik, balik kini
ug sa kadugayan
naandan ko na nga kini imong putlon

usahay,
makalimot ko nga kini imong gibuhat
matag gabii
ang kalisang hinayhinayng nahilis
mga morag silhig nga
nangahalhag
hangtod ang nahibilin mao na lamang
ang kubtanan

naglibog ko ngano nga bisag wala
ako'y ulo ania kanunay man lang gihapon
akong nakigsulti kanimo
nangamuyo

dili ba nga ang tanan, ang ilong, mata ug baba
kuyog man unta sa ulo?

unsang hinungdan
nga kining tanan nahimo mang nahisupak
sa kinaiyahan?

pwes, ang gugma ko kanimo
gamhanan
pwes, ang akong pag-antos adunay
saktong katarungan
pwes, ako na usab ang maningil sa
saktong
bayad ning pagkuha mo gikan kanako
sa akong
mga naandan

bisan pa ug daghag kulang
ang akong kaugalingon
mibarog lang gihapon ako
nga way samang hingpit

ang pagkita sa dili unta makita
ang pagsimhot sa dili na unta masimhot
ang paghikap sa dili na unta mahikap
ang pagpakabuhi bisan unta
diha sa dayag nga kamatayon

blind massage, YMCA, sa ilalom sa hagdanan

ang buta, di ko makalimtan,
samtang nagmasahe sa akong abaga,
mihangyo, nga unta ang iyang
sakada
dugayan, kay wa na kining kabayad
sa iyang plitehan
ug tulo ka bulan, ug mahimong ang iyang
anak nga puya, ug asawa usab nga laing buta,
papahawaon na sa ilang
gamayng pinuy-anan

di ko, makalimtan, nga siya imong
gibalibaran
kay hadlok kang makasab-an sa imong
inahan

ang labawng, di ko makalimtan, nganong
ako nga aduna pay bagang dose ka libo sa
akong bulsa,
wala gayod mabuligi ug
saktong kaisog nga
mohatag bisag
usa ka libo lamang

anaa ang katalaw sa pagtabang
ang kalisod sa pagkaadunahan
ang kahangal ug kahadlok nga ang ubang
mga buta makakita ug makadungog ug
unya
mahiloan nianang gahom sa
kasina

depresyon

kon manghilam-os
bation ang kalumos

kon maadlaw
magduka

kon moabot ang
kangitngit

anaa ang kakulba
nga di mapuyok

sa katulugon
ayay! depresyon

ang akong atabay

kon sukdon mo sa pisi
ang akong atabay
mubo lang ang imong
itunton

kusog man god opod
ang ulan kagabii

kon lantawon mo kini
ang imong nawong maoy
ipakita niini

opinyon lang

kon nasayod ka lang
ang kagubot usa ka dakong negosyo

mahal ang mga bala, mga pusil,
mga tanke de gyera, mortar ug
uban pa

di kita kamaong magmugna niining tanan
kay sila ug sila lamang

dakong akanse kon ang kalibotan
magmalinawon
matay-an ang puthaw ug
mabahaw ang mga pulbura
ang matapol ang mga gato
sa mga pusil

ang kagubot sa zamboanga
peryahan lamang kini
diin ang mga nangamatay maoy
mga nahalin
ug ang namaligya atua sa ilang
mga hotel
nag-inom, nagbalanse,
nagsadya, nangatawa,
nakig-estorya sa mga suppliers
kon kanus-a ang sunod nga
delivery
kay ang bayad andam na
alang kanila

ang mga ilo ug mga byuda sa
mga sundalong nangamatay
ug sa mga rebeldeng muslim
mao unya'y modaog nga
mga sugilanon sa sunod nga
tigi sa literatura.

azul, puti, ug pula

ang akong
kabuntagon maanyag
ug masaaron

nakita ko ikaw
nga nagpangaway
sa imong kamot kanako

"dali na, dali na
diri, sa daplin sa
baybayon
manginhas tang
duha" maoy akong
nadungog

sa akong bintana
anaa ang puting alibangbang
mibatog
sa usa ka buwak nga
rosa

naglibot-libot
ug lupad dayon ug
pahawa

ang dagat gikan
sa akong gitindogan
morag azul nga panapton
ang iyang kalinaw

balak alang sa pangamuyo

adunay moluhod kanimo
aron ka ampoan

suklian mo kinig pipila
ka pahiyom sa kalooy

ingnon mo siya, tindog!
ug siya motindog

pagkahuman, ikaw nga
iyang nabuntog

sa ngalan sa gugma ug
kalooy, ikaw na usab

ang moluhod, mag-ampo
ug mohalok sa iyang tiilan.

ang kahigwaos in lolo

65, viudo
si lolo

wa katulog
sa udto

init kaayo
ang
panahon

migawas sa
balay


morag kabaw
nga  nangitag
tunaan

pagbalik
nangihi sa kilid
sa labat

gabasa unya
gasinaw

PANGANDOY

ang kalapdon sa akong
kamingaw
sama kalapad sa akong
kahigwaos
ang kalay-on natong duha
gipangandoy kanunay
sa usa ka tutok

ang mga tanghaga

ang wa nako makuha
nagpabilin
ug laing mas labaw pa
sa nawala

wala ako makasakay
busa wala ako
mabansay

ang nahibilin kanako mao
ang karaan
ang kabag-ohan mibudhi
kanako

busa ania nagkugi ako
pag-ihap sa nabilin kanako
ang napudpod nga lapis, ang dalag nga papel
ug ang mga tanghaga
nga akong gipangga

ang akong tinanom sa veranda

gikan sa pagbuswak sa
iyang mga bulak
handtod na sa nahimo
na kining mga bunga

gikas sa pagkalunhaw
hangtod na sa iyang
pagkahinog

ang sinaw ug pula nga
mga kamatis
makalipay gayod
sa latagaw nga
kasingkasing

ang bulad nga baho didto sa bukana

kon fried chicken
ang sud-an matag adlaw
haskang sumuha
na gayod

pagkadaghang kaspa
sa akong ulo

nanimaho na sad kong
iti ug akong nabati nga
duna nay balahibo sa manok
ang akong ilok

busa sa gabii
nagdamgo kog bulad
nga gilangaw
medyo baho ug
ang kaasgad morag
tagpilaw

pagkabuntag
masimhot ko pa gihapon ang
kabaho sa maong bulad

gisunod-sunod kos lagong
nga mora kog utangan

gabii na usab
wa ko duawa sa katulugon

migawas kos balay
milakaw paingon sa bukana
diin ang bulad nga baho
nagpakita kanako

lami ang baho, tam-is ang
baho
makabuang ang baho
makakurog sa akong tudlo
makahupong sa  ilong
makalingaw sa dila


pagkabuntag
dugay kong nakabangon
nanaghan ang mga lagong
nga nagsalag sa akong
sangkog

sayang

kasabot kos
iyang kahadlok

wa na
mangilabot

hadlok siyang
makita niya
ang iyang
nawong sa akong
nawong

ang iyang laksot nga
kalag
sa akong
kalag nga laksot

sahay
sayangan sab ko

nganong
nagkaila mi.

si melay

misimag baya ang mata ni melay
(among katabang)

ang akong nagamit sa pagkaligo:
tulo ka kabo nga tubig,
usa ka tulo sa shampoo
usa ka paghid sa sabon

ug gamay labakara

gikuyugan sa kinuripot nga
kihat halad ning bugnawng
kabuntagon

di katalo

gibutang kos iwit
ug gikalimtan

ambot, kay wa man ko
miiwik

sa dihang nawa na silang
tanan

paingon sa ilang
kalipay

dia ko ay, naghunahuna
ambot, nalipay.

lad-ang, dayon lubog

sa tinood lang
giganahan ko nga ikaw di na motingog nako

kabalo kong nagtago ka na
nga mora bag usa ako ka maningilay ug utang nga
imong gilikaylikayan

sa tinood lang
malipayon kos panghitabo

nasukod ko na ang kamabaw sa imong atabay
ug natilawan ko na ang tubig  niini

lad-ang, dayon
lubog

abi mog ikaw ra ang atabay ning yutang
balaan?
sa tinood lang,
na, pagkadaghan

malukman man dayon ang kasingkasing

ang tanang mga gitukod kong
mga panangang
nangatangtang

kadtong tambal kunuhay sa hilo
walay ayo

kadtong sapot nga kunuhay di kuno
ako madutlan sa pagpusil
nagisi na man

kadtong lana aron kunuhay dili ako
makita
napan-os man

kadtong habak nga di ko mapaakan sa
wakwak
natay-an

ang tanan kong panagang walay
gisangpotan

pait diay kining mahigugma ta
mora man tag gihubuan
sa tanang panagang

ug sa usa lang ka hikap sa atong kiting
malukman man dayon ang kasingkasing

sibuyas bombay lang gihapon

ang kabahin sa tiunay
anaa ra sa pagpakli nimo sa sibuyas bombay

una mong gikuha ang laya
(ang laksot) ug imo kining gilabay

gisunod mo ang ikaduha nga medyo hamis na
(ug imong gihipos kini kay magamit na kining
lamas)
ambot ug nasayod ka ba nga kon ugma pa kuno
nimo kini gamiton
makadaot na kini sa imong lawas

gisunod mo ang lain pa, hangtod miabot ka sa
kinalawman
abi mo ug aduna kay makita nga talagsaon
didto

sayod ka, ang kinaibawwan ug ang kinalawman
sibuyas bombay lang gihapon
walay kalainan.

ikaw na

ikaw na
ikaw na gayod ang akong awit
ning akong pagkahubog
hangtod na kini
sa sunod nga kabuntagon
ikaw na
ikaw na gayod ang akong
gipaabot nga hampol
ning sakit sa ulo
ning sakit sa dughan
ikaw na
ikaw na gayod ang akong
milungtad nga
kagul-anan

ikaw na gayod ang mobirit

miabot na ba sa imong kaugalingon
nga ikaw dili na ganahan nga mamati
sa ilang mga awit

tungod kay karon ikaw na ang ganahang
moawit?

bisan ug nindot pa ang ilang mga awit
napul-an ka gihapon sa pagpamati niini
kay karon sa subong kasingkasing
bahalag yabag
ikaw na gayod ang mobirit

ayaw kasina kanamo

lahi, lahi ug lahi gayod ang
among kahaw-ang

ang mas labing pait
mao ang kahaw-ang sa mga sapian

bisan ug unsa ka daghan sa kwarta
nga imong ihabol
anaa pa gihapon ang kabugnaw nga
dili mahabolan
anaa pa gihapon ang kahaw-ang
nga di matabang
bisan sa usa ka libong pagpangumpisal


ayaw kasina kanamo
kay pareho ra kitang adunay mga kasubo

ang di matukib nga kahaw-ang.

ang mabati mo inig abot
mao na lamang ang akong ubo

ang makita mo sa veranda
mao na lamang ang akong plema ug laway nga nangauga

kon mosulod ka sa kusina
mga platong wala mahugasi ang imong
kaatbang

kon wa ko palunga ang suga sa likod
sa balay
dili tungod nga ako malimtanon na

nagsimag kana ug kon makasulti pa lamang unta
siya ang magsulti nga siya na lamang ang nahibiling kahayag
sa akong kalibotan

ang mga amor seco nga kanunay mong giibot kaniadto
karon nagpabiling walay putol-putol

dili sa ingon nga gitapolan  ko na ang pagpanglimpyo
gipasugid ko kanila diha kanimo nga sila mao na lamang ang mga bulak sa akong pagtoo

ang mga muebles wala na usab dinhi
ambot ug mabati ba nimo ang gibilin nilang tanan : ang di matukib nga kahaw-ang.

aduna nay mihulip sa akong kaniadto gibiyaan.

sa dihang gihagkan ko ang imong liog
nahisama kadto sa usa ka calachuchi nga akong gidap-ig sa imong dalunggan

kon gihimo mo kadto kanako
way segurog mokurog ang tibook kong lawas sa kagilok  niini

ikaw nga akong gikalingawan wala matandog
namugnaw ka ug mitalikod kanako unya ang imong mga kamot imong gitabon sa
imong bilahan

gigakos ko ang imong lawas sa tibuok gabii
didto lang ako kutob sa pagkatulog sa walay nahitabo tali kanato

lahi baya pod kon sa maong panagtapad ako lang ang nagmalipayon
unya ikaw galagot sa tumang kalood ug kasilag

nganong ulahi na kaayo ang atong panagkita
nganong karon ko lang gipakita nako ang usa ka pagmahal?

sayo sa buntag ako ang miuna og mata ug human sa usa ka pagpamutos
mibiya ako kanimo: ikaw ang nagpasabot kanako nga ang aduna diay panahon

nga gitawag natog, ulahi na, nawa na ang karaang pagbati
aduna nay mihulip sa akong kaniadto gibiyaan.

karon malinawon ang akong hunahuna

ang akong kagabhion
lahi na karon

ang kaniadto naputos
sa kabalaka ug
kahadlok

di katulog bisag
unsaon og ligad-ligad

karon malinawon
ang akong hunahuna
bisag kulang ang
alugnan

salamat nga ikaw
nawa na sa akong kinabuhi

dili mo gayod kini makita.

ayaw ako ug tuhoi
kay ako usa lamang ka mamordahay
ug pulong diha sa sihag kaayong
panapton nga usahay dili  mo
makita.

lantawa, unsa ba ang akong
gimugna alang kanimo?

ang mga buwak lawas kini
sa maanyag nga babaye ug ang
sapa diin siya maligo ako kini
nga usahay mahimong tubig
nga usahay molanang ug
mobaha sa tumang kamingaw.

ang mga bungtod sa unahan
mga dughan kini nga akong katkaton
ug ang langob puluy-anan ko kini
sa tumang kakapoy.

adunay mga kahoy nga akong usahay
pasilongan. Ayaw pangutana kanako
kon unsa kini sila diha sa sida nga
panapton. Kay bisan unsaon mo ug
aninag, tungod kay dili man kita kaayo
kaila, dili mo gayod kini makita.

balak alang sa zarraga

kon nangutana ka pa unta
isulti ko unta kon unsa ug
asang dapita diin ako mas
giganahan pag-ayo kanimo

kadtong didto ta sa zarraga
diin isog ka kaayong mibarog
sa akong atubangan ug
gipatiurok mo ang kamatooran
bahin kanimo tupad sa baga
kaayong kurtina nga puti diin
ang hangin gikan sa giwang
sa  bintana hinay nga mitayhop
sa imong buhok ug aping.

ako naglantaw lamang ug
nakita ko ang imong kaanyag
ug ambot kon nabati mo ba
usab ang akong talagsaang
kaaghop nga dili ko sarang
nga gipabati sa uban nga
dili kaayo ako sinati.

ag didto ko sa Pavia

sa tinood lang walay
laing nahitabo ngadto sa Pavia
gawas lamang atong
buhing alimango nga akong
gipili aron imong laphawan
ug panakotan alang sa
akong paniudto
ug kadtong talaba nga
anggid anggid sa ako
untang gipangandoy nga
mahulom sud sa akong
baba ug duladulaan sa akong
dila isip kalingawan sa akong
panihapon ug kadtong
pinong tinadtad nga unod
sa malasugui nga lamian kaayo
kon isawsaw sa sukang pinakurat
diha sa puti ug hamis kaayong
ug wa pa mabuak nga platito.

bag-ong bokabularyo sa akong diksyonaryo

ang paghubo sa mga sapot
ug maskara
ang pagpadayag sa lawas
ang pag-abli sa gikahinaman
nga bilahan
ang pagpagawas sa dila sa
baba
ug ang pagtubod sa laway
ang paghubo usab sa imong
mga sapot ug mga maskara
nga misaknit sa dakong panahon
diri kanako nga nagpaabot sa
angay nga mahitabo
ang pagyukbo sa gibalaan ug
ang pagluhod sa mga walay
turong
ang pagpiyong sa mga mata
ug pagpang-it sa kaugalingong
ngabil ug ang pagsyagit sa
ngalan sa ginoo hangtod na
sa kataposang pagbuto sa
gihambin nga kahilom sa
gikumkom nga nga kahigwaos
sa wala mahilot og mahikap

kini ang akong mga bag-ong
bokabularyo sa akong diksyonaryo
nga akong gitago layo kanimo.

balak nga alang sa 52 ug 34

sulayi kuno ug hunahuna
kon unsay mahitabo kon ang
52 ug 34  magkita?

ako ang 52 ka kapakyasan
ug ikaw ang 34 ka kamingaw

hunahunaa kon unsay dangatan
kon magtagbo ang kapakyasan
ug ang kamingaw, unsa kahay
dangatan sa lawak diin sila
maglumbay? maigo kaha kining
tanan sa usa ka panaghigala lamang?

ang singkwentay dos ka tiil nga
lam-aw nga nahulugan sa trayntay
kwatro ka mga layang dahon sa
mangga nga nalata na lamang kay
walay namunit, dili kaha kini haskang
bahoa? ganahan ka kaha niini?

kon ako ang 52 ka mga pulong ug
ikaw ang 34 ka mga pagduhaduha
aduna kaha'y nindot nga balak nga
imong mamugna niini?

namugna ko na ang 52 ka mga pasalig
nga wala matuman ug karon ikaw ang
akong 34 ka mga bakak nga akong
ihalad sa 86 ka mga santos sa akong
altar sa kinabuhing haska gayong ugaha.

lamian unta

pagkalamian
unta sa akong nakita
ug akong
gisulayan ug hikap

human sa hitabo

akong nasabtan nga
kini atong kaaway

kon masipyat ka

bitin kini nga itom
lala, andam mopaak

ug mohatod kanimo
sa imong lubnganan

"wayfarer", roxas city

gitalikdan namo
ang nindot nga isla

ikaw ang gaatubang
kanamo

sa unang panagkita
hinay-hinay

kong nasabtan ang
mga kulang

ug mga nadugang
sa atong kinabuhi

dili lang sa dayon

morag kataw-anan ang panghitabo
nga imong kinutlo gikan sa imong kaban
ning sayong kabuntagon,

nga ikaw mikatkat sa bungtod
hawid sa mga siak nga bato
ug misulod sa dakong langob
ug didto naligo ka ug mitunga
sa usa ka nawong nga malipayon
diha sa pahiyom nga akong
kunuhay gipangandoy unya

ako nga gihuktan sa kalaay ug
kakapoy ning mga ugat nga
tago ug mga lapa-lapa nga bug-at
nagtabisay ang laway sa usa ka
alindasay,

mahimong ikaw ang akong gilantaw
kon ganahan ka
mahimo usab nga ang akong gilantaw
didto sa mga bato mao
ang akong kaugalingon nga
nag-usik-usik sa akong panahon
diha sa imong anino

pagkalooy ko niining pagpaubos
kapoy diay usab pagpangita sa
mga hingpit ug bug-os
moabot ra ang panahon sa
akong pagpahulay
ugaling dili lang sa dayon

tuis

daghang namatay
sa sayop nga pagtoo

ako namatay na ug
kawalo niini

kon magkita ta
didto sa isla
unya hawiran mo ang
akong kamot
ug ako kining iwakli

ayaw kabalaka

dili ikamatay ang sayop
nga pagtoo

kon ikaw man ugaling
matood

ug ako nagtakuban
sa usa ka bakak

matuis nato kining
kamatayon sa sayop
nga pagtoo.

Seth

sa laing lugar nga kulbahinam
atua si Seth: itomon, maalaan
nga africano kon dili lang nimo patingugon,
taas ug suwang, morag katunga sa bulan,
mahilig ug pahugot morag sumang piot,
taas, dagko ug bukton,
undan ang mga tiil, dakog
putos, morag gatago ug kamote
sa iyang pantalon,
kon bag-o mo pa lang siya
maila-ila, makaingon kag
mao kining tawhana ang
gapatay ni Adonis,
kadtong masahistang di kamaong
molaktaw didto sa
Agdao,

iyaha ang tanang estorya kon
ma-stranded mo's airport sa mactan,
unya ikaw mamati lang,

sunda ang tanang kiay sa iyang
mga kamot,
maulit ka

katulgon ka na
hangtod mopiyong na ang imong
mga mata
unya kaatik siya nga wa ka na
ganahi sa iyang mga pasiaw
ug milakaw siya
bitbit ang iyang bag nga itom
ug dayog kiay sa iyang sampot
palayo kanimo

iya lang ang iyang gihunahuna
ug ikaw nga
wala na mangilabot sa kalibotan
bisan sa damgo
kon atua man ugalaing siya didto
gilood sa maayo.

ang buwak sa akong dalunggan

walay nagsugo sa buwak
aron mobuswak kini sa kaadlawon

walay makabuot kaniya kon
sa sayong kabuntagon

magpatihulog kini sa tiilan sa
iyang sanga

dili mo usab ako mapugos sa
pagpunit niini

ang buwak sa akong dalunggan
sakto na kini alang kanako

nag-uwang

sa kagabhion
sa dihang miabot ang gikahadlokan
mong mga daotang ispiritu
ang imong lima ka iro
didto sa hagdanan
nag-uwang
silang tanan

ikaw usab nga nag-inosara
diha sa imong higdaanan
nga nakiglahotay sa salida
sa tv
nagpunay usab ug pauwang
sa imong
langgam

ang mga kamot sa imong kagahapon
nanikop ug uwang
sa kilid sa mabaw nga tubig
sa kanipaan

ang kamingaw nag-uwang
sa bintana nga abri nga nagdunga
sa kabungturan
nagpaabot sa kabuntagon

sabta ang akong pag-uwang
usahay
basin
sab diay ug dili ikaw
ang gitawag
niini.

walay kapaingnan

ang mga hunahuna
morag mga kabayo nga nagdagan
kusog kaayo sa dakong bukid
paingon sa pangpang

unya nangahulog kini sa pangpang
nagpabilin ug mga abog
sa ilang agianan

buak, katag, dugmok

ang akong kasingkasing
atua sa langob sa
alena

pak-an kini nga
mibiya sa samal

milupad kini ug usahay
mopahulay
sa mga bato sa kalaay

ang akong dughan
haw-ang

ang akong utok ania
nagsubo sulod sa iyang
kalabera

ang akong mga kamot
ug tiil
nagpunay ug lantugi

buak, katag, dugmok
buwagsa
ako,dinhi, ning
kalibotan

nahisama ako sa
mga isla
sa mga dahon nga
nangahulog

ikaw, siya, kadto,
kamo, ako, apan ikaw,
unta ug ako unta.

tinood nga kahayag

nakita ko ang
tinood nga kahayag

nakita ko ang
abri nga pultahan

anaa ang pagduha-duha
kon sugdan ko na
ang pagbiya

ang mga kamot sa
kahayag
nangamay kanako

ug ang pultahan
nagsayawsayaw

ang iyang kaugalingong lawas.

gabii lang
kon moboswak ang
dama de noche

hadlok kaha kini
sa kahayag sa adlaw?
o dili kaha kini
madawat sa kabuntagon?
o kaha ba
ikaulaw niya ang
iyang kahumot
nga lahi sa
mga lamdag?

ambot nga inig buswak
niini
pati gani ang buwan
morag gilainan
man

diha sa kangitngit
gigakos sa lalaki
ang iyang
kaugalingong
lawas.

nasayod ka kaha?

sa akong pagkahanaw
giingnan mo ang hangin
nga ako inyong
gikamingawan

gihatod kini sa hangin
kanako sa tumang
kabugnaw

ambot ug nasayod ka ba
kon unsa kining kabugnaw?
kon unsa ang bation kon
ang imong mahikap mao
lamang ang aping sa usa
ka panganod?

alang sa akong amiga sa davao

pagtugdong kos
davao
una ko ikaw nga
pangitaon
ikaw nga
nagtago
sa imong
kataha ug
kunuhay kaulaw

dapiton ko ikaw
sa usa ka
panihapon
ug atong saluhan
ang akong
kapobrehon

ayaw ako husgahi
sa usa ka platong chopsuey
ug chawpachin
usa ka dakong mangkok
sa mushroom soup
ug laing plato sa gasinaw
nga humba

ayaw pagduhaduha
magpakaisog kita
sa upat ka botelya
nga red horse

daghan kitag mga
sugilanon
kabahin sa atong
kagahapon

pamatia ako
dili na kini bahin kanato
kon dili
bahin kini sa kalibotan
sa kawanangan

manotpik ka
bation mo ang kalimpyo
sa imong ngipon

gusto man god nimo
nga walay sabod ang
kinabuhi

wala ako'y tinguha
nga mosamot ka gubot
ang lukot

gipangita ko lang ang
akong kaugalingon
ug busa gusto kita nga
ikahinabi

sa pamasin nga basin
ang akong pagkaako
anaa ra usab diay
diha kanimo

wala nako hunahunaa ang
kahugaw sa
kanal
kay bisan unsaon
magpabilin kining
puno ug baho
sa atong gipanglabay

naglawig ang akong hunahuna
sama sa usa ka sakayan
nga nangita ug
pantalan

ang akong mga kamot
wala maghambin ug mga bitoon
alang kanimo

ang gamit sa akong mga mata
alang lamang sa
pagsud-ong
ug kining akong mga kamot
alang lamang sa pagkumkom
ang akong baba
alang lang usab diha
sa pagtak-om

gaba

kon gusto nimong mahupay
ang unos
sulayi ang bisag dyotay lang
nga kahilom
sud sa lawak diin ikaw na lang
usa

ayaw pakigsulti sa imong
kaugalingon
pamatia ang kahilom sa
mga butang sa imong
palibot

tutuki kini
kon mahimo pamuniton mo
ug sugdan mo pag-ihap
kon pila sila diha
sa imong
atubangan

usa ka papel nga nasugdan
mo na ug sulat
sa duha ka pulong apan
imo kining giundangan

mohunong ka
diha sa pagpanghupaw
aron pagpasulod na usab
ug hangin
sa imong baga

lima ka staple wires, upat
ka paper clips,
mga calling cards sa mga
amigo nimo nga
milalin na sa laing kalibotan
pulo ka lastiko nga morag
tago na
giinat nimo ug naputol ang
usa

mga numero nga imong
gisuma total diha sa
cardboard
 ug usa ka dahon
sa libro nga
nagisi

malingaw ang hunahuna
sa mga ginagmayng butang
nga kaniadto
imo man lang ganing
gipasagdan kay
dili kini importante sa
imong permanenting
gadali nga kinabuhi

karon
gitutukan ka niini
nga morag gibasol ka
ug naghiwi kanimo
ug imong nadungog
nga silang tanan
miingon ug "gaba!"

nananingkamot

miluhod ka lamang
sa dihang dili ka na
kamaong
magpakabuhi

nananingkamot nga
unta ang imong mga
tiil mapugngan

ang imong mga kamot
magaid

ang imong baba mapilot
ang imong mga tudlo
magtapot

sayod ka kon asa ka
dalhon sa kalimot

mihapa ka mihalok
sa pusod sa yuta

gisimhot ang abo
gitilaan ang balas

gisumpa mo ang
pagkapalid sa imong
kalag
paingon sa gakalayong
disyerto

sulay-sulay lang

sulay-sulay lang
walay kataposan
kining pagpangita
sa mobagay nga
tingog
duyog sa
putol nga kwerdas

basin diay ug
sa kaulahian
madungog ra ang
bug-os nga
huni sa
gubang tilaok

usa ka tissue

sa usa ka tissue
nga akong iilo
napugos kog
sulat sa akong
kamingaw

nga akong
gisulayan ug
kalibang

wala ka man
god mitingog
kanako

hinog na ang pagbati

linghod pa ang
panahon
wala pa kaayo milagom
ang langit
ang hangin uga
ang dalan nagpasiatab
sa iyang kaabog

hinog na ang pagbati
ayaw pugngi
ang pag-agas sa laway
diha sa imong
baba

ang kainit sa akong
mga kamot
gabaga nga bagol

bugnaw kaayo ang
imong kakulba
diha sa imong dughan

kitang duha
ang gitakdo sa dalan
sa gugma

ako pa gihapon
ang laway
sa imong tuway

sa likod sa akong abaga

suhi ang bata
nga gisabak sa hunahuna

balihon ko ang
kalibotan

aron unta mag-una
ang ulohan
ayha ang
tiilan

kini, apan,
panglantaw lamang

ang tinood
magpabiling tinood
bisan pa
ug balhinon ko
ang akong mga
mata
sa likod sa akong
abaga

sa akong kabatan-on

miabot ang balita
sa usa ka
kasubo

ako miyukbo
sa hari sa kapildihan

pagkahuman niini
migawas ako
sa iyang gingharian
ug gipanabi ang akong
kalipay

sa tan-aw nila
unta ako moiyak apan
ako nga
nakasabot sa dagan
sa panahon
nalipay nga ang akong
silot
sa pagdawat sa
nagtakuban nga
kadaugan
wala gayod mahinayon
kay siya
ug siya lang gayod
ang mas nasayod kon
unsa ang
makaayo kanako
didtong dapita diin
wala ko
pa maaninaw pag-ayo
sa akong
kabatan-on

sa sidsid sa sinina sa tumang kahilom.

adunay adlaw nga ikaw morag di na kamaong
magpakabuhi

gilumsan sa kahadlok ang imong kasingkasing
gihulmigas ang imong hunahuna

iisa na unta nimo ang imong mga kamot diha
sa pag-ampo sa imong kontra nga dili usab nimo

kaayo sinati. Apan sa usa ka pagtukaw, diin
ikaw nahigmata, nakita mo ang imong kasingkasing


nga gilangoy gihapon ang kusog nga sulog sa
kahadlok nga walay salog, ug nahinuklagon nimo

nga ikaw gihulmigas tungod kay tam-is kaayo
ang imong pagkatawo. Ang kasingkasing nga

walay kamot, mas maayo man hinoong mohawid
sa sidsid sa sinina sa tumang kahilom.

didto sa sisipus.

aron walay samok
putlon gayod dayon

aron di na motaas pa
ang estoryahon

kay ug mas daghan sugilanon
mas mokomplikado man hinoon

putlon, putlon, putlon lang
gayod dayon

papas, papas, papas na
ang tanan

ug dayog sugod na usab
sa pagbadlis sa usa ka

linya nga pulong
ingon ana usab ang sinulat

sa laing nitibo nga nakasimhot
sa ilok sa taga sisipus

aron dili kaayo nila mabantayan

matag tagsa kanato
naghambin ug mga bato sa
usa ka bakat nga
kahigwaos

sa gabii masugid mo kini
sa imong tupad nga dili nimo
kaayo kaila

pagkabuntag isul-ob na usab
dayon nato ang sapot sa usa
ka pahiyom

aron dili kaayo nila mabantayan
ang tinood nga kaguol
doblehan mo ang sapot sa pahiyom
sa usa ka mas baga pa
nga buhakhak

ug kinsa pa ba'y motoo nga kitang
tanan
pareho ra diay ug mga bukog
nga nagtakuban ilalom sa panit
sa atong tagsa-tagsa ka mga
dughan?

ang laing nawong sa akong kaugalingon nga karon nagpaila na kanako

sa milabay nga panahon
usa ka adlaw niana
sa akong kiliran adunay
laing nawong nga mipatim-aw
ug kanunay nga gahunghong
sa akong dalunggan nga
ako kuno kadto siya
nga kanunay kong gitagoan
ug gibiyaan

akong gilantaw
wala ako masuko
akong gihikap ang
iyang aping nga
basa sa luha

ug ako siyang giingnan
karon kuyog ka kanako
dalhon ko ikaw sa dapit
nga imong gihidlawan
ug ako ikaw nga pasagdan
nga magdula didto sama
sa usa ka bata
ug ako ang magbantay
kanimo diha sa usa ka
pagsabot nga lalom pa
sa imong pinuy-anan nga
kahilom sa lawod ug
mga panganod.

talikod lamang

ikaw nga pirming
gatalikod kanako ang
gihangpan ug kanunayng
gigakos sa akong
kagabhion

ang akong mga tiil
patong sa imong paa
ug sa dihang gihikap ko
ang imong kasingkasing
sa akong duha ka palad
gisapo mo ako
ug imong gibalhin ang
akong mga kamot
didto sa imong pusod.

ang baga nga libro kabahin sa disgrasya sa gugma

ang usa ka lawak sa usa ka
disgrasya
diin kamo nagkita ug nagdulog
nga wala damha
nga kini diay gikulit man kaha
sa tigib sa kapalaran

mahimong usa ka baga nga
libro nga bisan kanus-a
wala gayod masulat ug karon
nahipatik na man hinoon sa
atong matag palad kitang
nahinanok tungod kay sa
miaging gabii wala man kitang
duha mahikatulog

unya kining libroha diin atua
ang atong mga sayop nga ngalan
atong gidaladala bisag asa
dili tungod kay kini atong basahon
apan aron unta walay bisang usa
sa atong mga kaila
makabasa sa maong disgrasya
ug unya manugilon sila kabahin
sa hiwing pagbati nga kanunay
gisapsapan sa atong katilingban
ug gisunog matag tak-op sa
hinatag nga kahayag