kapoy na

nagdulog ta
sud sa lawak

sa gawas kusog
kaayo ang ulan

dili hayag ang
suga unya

imo kong gitutukan
sa usa ka

pangutana kon
ako nahigugma ba

kanimo,
wa ko mitubag

wa kong kasabot
sa mga katuigan

nga milabay
unya ania gihapon

ako sa imong
kiliran

usahay mangagho
kon ikaw

anaa sa tunga
sa imong hinanok

dili kaayo
hayag ang suga

unya misamot
pagkusog ang ulan

mitakilid ka
ambot pero

morag nadungog
nako

ang tingog sa ulan
nga nag-iyak

dili ko mangutana
kapoy na.