tinuhuan

paghuman og ihaw sa itom nga baboy
gihiwahiwa ang mga tiil og
ang tiyan

gihaw-as ang mga tinae
gihugasan sa sapa

gilain ang dugo og apdo
og ang atay og kasingkasing

gitadtad ang mga unod
gibutang sa kalaha
og giluto sa kaugalingong mantika

walay asin walay suka
walay patis walay panakot

ipakaon kini sa dili ingon
nato nga nagpuyo sa dakong
punoan sa mangga
nga ugma pagatag-on na

pakapinan kini og
sigarilyo nga Boss
og lima ka sinsilyo nga
pulos piso

ugma mabalik na ang saktong bout
ni agrifina