sa karon nga wa say sima

plantsado na ang tanan, unta,
inig abot, panihapon sa sumosam,
sashimi ug maki, ug hot green tea,

matug sa crown, ug sayo pagkaugma
lakaw-lakaw sa abellana, simba sa sto. niño, then
buffet breakfast sa Park Lane,

molapos sa Mani, then sun and sea sa malapascua,
giplano ang overnight didto,

pilgrimage sa Simala, then adtoon sab
ang Birhen sa Udlot sa Carmen,

balikan ang butanding sa oslob
tabok sab sa sumilon

dinner sa xiamen restaurant sa mango
pwede sab sa Persian resto,

wa damha, gilinog man ang  tanang plano
sa ikaduhang adlaw, buntag sayo
mikurog mi, wa kasabot, di matugkad ang
tumang kahadlok

sunod sunod ang mga aftershocks
sulod guwa sa hotel
nga nangliki ang bongbong
nabuak ang samin sa CR

haskang paita.

Kining kalibotana nadamgohan ko na
bato patong sa laing bato, patong patong
nga bisag sa usa ka kuhit lamang
mangahapla ang tanan

way klaro, dili gayod tataw
kining atong panaw
ang ugma di na matagna
sa karon nga wa say sima.