pangandoy

mas nindot unta kon
maghawiray ang mga kamot sa kaulag
og gugma,

ang halok sa ngabil og ang
paghaploy sa bilahan kuyog sa
kabalaka kon nahupong ka na ba
sa akong dila og
ginhawa

mas nindot unta kon ang kalag og
lawas usa na
sa usa ka panghambog diha sa seremonya
sa kaminyoon

apan sa paglabay sa katuigan
sa pagpangahulog sa dahon
og pagpiko sa atong mga tudlo og
mga siko
og pagkahilis sa mga ludhanan

nagbulag ra gihapon ang duha
ang kalag nagpahipi lang gihapon sa dapi-dapi
dili mopakita
ang hunahuna midap-ig sa kilid sa dalunggan
nagpamati lamang
samtang ang lawas nakigbisog
sa iyang pagkahugno
sa pagkunot sa agtang
sa pagputi sa buhok
sa pagloyloy sa mga pagbati

karon hunahuna na lang ang nabilin
samtang ang kalag
nagpaabot sa iyang sakyanan
ang lawas
naglingkod sa kilid sa pultahan
lantaw sa hagdan
paingon sa ubos
nagsusi sa lapok