paghaw-as sa kabug-aton

ang tagsulat gibitbit
ang kalibotan sa iyang
abaga

makamatay ang
kabug-at

apan sa dihang nahuman
na niya ug sulat ang
tanan

nahaw-as ang kalibotan
unya ang iyang
kagaan
morag lalom kaayong


ginhawa nga
nakalingkawas sa
nagsangasangang mga ugat
diha sa iyang duha
ka baga.

meraki

nindot unta nga ang
gibuhat sa kalag mao
usay gibuhat sa lawas
apan
sukwahi lang gayod
gihapon

ang mga tudlo sa kalag
gustong mohilap sa
kasingkasing paingon
sa usa ka alawiton
nga pagdayeg sa Dios,

apan ang mga tudlo sa
lawas mihikap sa lawas
nga di ganahang mobungat
sa ngalan sa Ginoo

ang akong kalag nagbakho
gihapdosan sa gibuhat sa
akong lawas ug busa karon

ania mibalak sa dakong
pagbasol sa dakong kahiubos
sa lawas ng kanunayng
buluyagon

komorebi

silong sa mga kahoy
migilak sa adlaw pinaagi
sa mga dahon
naghimo ug mga balod
sa kahayag

mga pilok nga dahon
mga kihat sa kahayag

ikaw nga nagmingaw
sa kalingaw gibayaw

jayus

si joe dakog
apapangig
sa iyang kalimtanon
gibalik balik ang joke
unya kaming nalooy kaniya
mirespetar na lang usab
ug katawa

mamihlapinatapei

kutob lang sa tutok
kutob lang sa kihat
balos sab ang kahilom
sa iyang panagway
dayog lakaw
palayo sa usag-usa
nga dunay mga
tagkos nga kabilinggan

ambot nganong naulahi
man ang panagkita
nilang duha nga diha
sud sa ilang mga mata
naghaguros ang dakong
baha sa gugma?

hikimori

dili na baya ko batan-on
medyo edad edaran na
duna nay uban ang
likod sa bagolbagol
apan nahitabo na ang dili unta angayan kay ania nag-atubang sa computer tan-awg sine dula sa games unya di na ganahang makigsandurot sa sama nakong tawo nga mao say ilang ginabuhat sa ilang kaugalingon galumlom sa ilang salag sud sa kwarto nga mora bag haskang daghana sa itlog nga ilang pusaon nga ug kon sutaon sama sa mga utok nga nauga diha sa facebook nahimo nang puros binugok unya pagkagabii di na sang katulog kay gisiging hadla sa tumang kapuol ug kahadlok nga karon dili na masuta kon unsay tinood nga hinungdan dayog ingon nga tingali basin ug mao na kini ang sugod sa pagkabuang.

depaysement

ag didto mi sa beijing
samtang gilatas namo
ang badiling wall
mora mig isda
nga gipasol gikas
sa tubig
unya gikuhaan ug
hasang
gihimbisan
giputlan pa jud
ug ikog sa
mga negosyanting
insik.....

tiunay gayod nga makalilong

giangkon namo nga kaming duha nagkuyog
gikan sa usa ka kan-anan unya nanakay kami sa taxi
paingon sa usa ka lawak unya dungan usab kaming nagsulod didto
nga wala kami gibitbit bisan usa ka putos nga pasumangil

didto namo gipalabay ang kagabhion samtang mibusdak ang dako kaayong
ulan sa syudad

nagdugdog ug kilat ang kalangitan unya giubanan kini sa kusog nga ulan
mga mitumba sa pipila ka kahoy ug mikusokuso sa mga atop sa kasilinganan nga
barongbarong

milanab ang mga agianan ug gani daghang mga dyip ang na-istak-ap kay namatyan
sa mga makinang daan na usab
nahunong kuno ang kalihokan sa syudad unya siging ring ang mga silpon sa mga ginikanan
subay sa ilang mga anak nga wa pang kauli sa ilang balay, sa mga asawa subay sa ilang mga bana nga
atua pa sa ilang mga opisina kay kuno ga-overtime

kaming duha nga bag-o lang nagkita human sa pipila ka tuig nagrepaso sa among
tagsa-tagsa ka panid sa libro sa among kinabuhi
kabahin sa panit nga bakos ni tatay sa hait nga dila ni nanay sa kaasyoso sa among
mga igsoon
sa mga amigo og amiga nga nangamatay ug ang uban nga  nagpuyo na sa laing nasod
kay nangaminyo lagi ug mga  langyaw

hangtod nga nahikatulog kami sa among tagsatagsa ka mga higdaanan
nga nagdamgo sa mga maipayong mga  pulong nga ugma amo na usang ikutay sa tagsatagsa namo ka mga bintana aron ipakita namo nila  nga kami bisan pa sa mga kakulian nagmalampuson gihapon sa pagkab-ot
niadtong mga idlas nga kalipay sa yanong kinabuhi

pagkabuntag sayo kaming nanggawas sa lawak diha sa pagtagbo namo sa usa ka lain na usab
nga kabuntagon
dulom pa kadto unya wa pa gani nangabri ang mga kan-anan

ikaw nga kuno nakakita kanamo, naghimo ug taas kaayong sugilanon, basi sa hugaw nimong hunahuna
ug imo kining gisangyaw nga kami kuno nagpakaulaw sa among mga kaliwat

wala na kami labot niana, ug kon makadaog ka man sa sunod nga sangka sa usa ka mamugnaong
pagpamakak, ayaw kabalaka kay bisan ug dili mo kami imbitahon sa imong salusalo ug sa imong
pasundayag diha sa imong pagkabangiitan nga pagkabakakon, motambong gayod kami aron
among ipabati ang masigabong pagpakpak.

tungod kay ikaw na gayod kana, ang tinuorayng gitagna sa mananabang didto bukana
nga lubog nga gigasahan ug   napulo ka mga lilo
nga  tuod man, tiunay gayod nga makabuyong diha sa bigatlong pagkalilong.

balak sa banang limtanon na intawon

ang mga singot sa huwerto
nga gikan sa imong dughan
midahili sa imong
tiyan ug hinay hinay nga
nahilis diha sa imong
pus-on hangtod nga
nawala kini sa akong panan-aw
diha sa imong
sabsaban

hapit nako nakalimtan nga
panahon na diay usab karon sa
pagsimba ug pag-ampo sa dihang
mibagting ang akong kampana
didto sa ilalom sa
akong purol

sa dihang nahurot ang mga katarungan

nagkadaghan ang akong
gipanulti
giisa ko ang akong toong
kamot ug
gikumo ug ako kining
gisuntok sa nawong
sa lamesa

mora kog naupos nga
kandila
dayon gipatyan ug
kahayag

nasabtan mo na gayod ang tanan

sa kadugay
kamao ka nang mobalit-ad, ang imong mga bukog kamao na nga mahimong unod,
ang imong likod lahero na nga mahimong atubangan
ug sama sa atubangan, kon mobalit-ad pa gayod, mahimo kining likod,
usahay, lantawon ka nilang walay ngabil, ug dayog dagan kay kuno dili ka ingon nila,

ang ilang kahadlok, gikatawa mo kini nga mag-inosara,
dayog sayaw nimo sa imong kaugalingong musika nga gimugna sa imong kaugalingong
libreta diha sa kilid sa bukog mo nga kwerdas

gibali bali nimo ang ilang gitawag nga reyalidad, nahimo kang majikero, ug sa kadugayan
sa dihang nawala na sila sa pasing, mibilib sila nimo isip usa ka banggiitan nga tawo,
dili masakitan,dili madutlan sa ilang mga pagbiay-biay,

baga kuno imong nawong morag pader sa dato nga insik nga supplier og shabu sa mindanao
nga bisan unsaon nilag pusil, di na jud madutlan,

kini nahitabo sa dihang nakat-unan na nimo ang ilang mga binuang, sa dihang wala ka na  mitoo
sa ilang mga pasalig, sa dihang maayo na nimong pagkapiang sa ilang mga bukbok ug kulata

unya kay kamao ka mang mobangon, unya natakdan ka man sa tiki nga ug maputol ang ikog
kamao man sang mosumpay pinaagi sa hunahuna lamang, diha sa gamayng pagpailob sa
mga dag-om hangtod nga kini miulan,

gibalit-ab baya sa kamel ang iyang tiyan aron malatas niya ang kainit sa disyerto
gibalit-ad sa lalaki ang iyang ikog aron mailhan nga siya tawo ug dili unggoy sa lasang,
gibalit-ad baya ni dodong ang iyang kamisin aron maabtan niyag balik si inday sa iyang payag,
gibalit-ad baya sa abogado ang iyang mga papeles aron lang modaog sa kaso
gibalit-ad ko usab ang akong lubot aron masabtan mo ang imong nawong
ug daghan pa, ug ubay-ubay pa gayod

gibalit-ad ko ang tanan nga mga yano, aron unta ako nimo hisabtan
gipasabot ko ikaw nga diha sa pagbalit-ad, masabtan mo ang usa ka kamatooran nga
diha sa pagbalit-ad sa pagsabot

sa pagsabot nga ang tanan dili baya nato masabtan, sukwahi sa paningkamot sa syensa ug sa
literatura nga ang hapsay ug maayong pagkaplantsa maoy gikinihanglan aron masabtan ang tibuok
kalibotan nga dili ra ba gayod kana ang tinood

kay kinsa ba ang nakatungkad sa kinailawman sa dagat
ug sa kinatumyan sa kawanangan?

wala.

karon kon moingon ka, unsa ba kining giyamayama niining tawhana, nga wala man akoy nasabtan niini?
kon miabot ka na nianang punto sa kalibog, ug sa kasapat, dawata ang akong dakong pasalamat.

nasabtan mo na gayod ang tanan.

sa dihang miundang ang pagsulat

mikusog na ang ulan.

dili na kini balak, mikusog na gayod ang ulan,
dili na kini bakak, misaka ang tubig, wala kini
untay mga tiil, milapas ang tubig,

sa atop...........

gitawag kini nilang mga misteryo, ug busa balaan.

gisulayan ko ug tunob ang usa ka dalan lamang
kanang walay liku-liko

sultihan ta ka, wa ko miabot sa akong padulngan.

lingin man god ang kalibotan unya ang ilang mga
ganahan kadto mang mga balikog

kadtong tinae sa manok, kadtong panultion nga
galikos sa daghang mga tanghaga

kadtong dili masabtan,mao man ang ilang gipakpakan
gitawag kini nilang mga misteryo, ug busa balaan.

kon ako ang bakak

panananglitan ikaw ang tinood ug
ako ang bakak

unya nagkuyog ta sa usa ka panaw
sakay sa usa ka sakayan
motabok kita sa usa ka dakong lawod
nga walay anino sa panganod
nga walay timailhan nga naa pa kitay
isla nga kadunggoan

kita lang duha, unya ning panaw
usa lang ang mabuhi,
ug ingnon ko ikaw nga ikaw lang
ang mabuhi tungod kay ako
usa man ka bakak,

motoo ka kaha kanako?

ang pagpamalak

ang kalag
nalaglag
naputlan ug pako
nga wa  na
igkita

didto sa dakong
langob
ang kalag nasulod
gitak-upan sa
kangitngit

pagkamingaw
pagkalalom sa
kahaw-ang

nagbakho ang kalag
nga morag iro
nga nawad-an sa
iyang agalon

misyagit nga morag
namatyan ug inahan
ug amahan

wala nay makita
ug wala nay mahikap

ingon ana usahay
ang pagpamalak

subo nga awit
sa pagkalaglag

ang bulan nga morag nasayod sa tinood tang kahimtang

ang akong nakit-an, sakit palandungon
nga si tatay sa dihang nahimong limtanon
gisikaran si nanay nga milabay sa iyang
tugkaran ug duro niyang katawa unya si
nanay nasukamod ug wa kabangon ug
nagdangoyngoy ug iyak,

sayop ang akong pagsugod sa paglantaw
kon unsa ang kaminyoon, wa ko unta sudla
kining maong pultahan, apan lagi, kay mingaw
na man kaayo ang lawak, unya makatuok na
man sa liog ang maong pag-inosara,  migawas
ko sa lawak ug nagpakita sa akong pahiyom sa
adlaw,  nga midayeg sa akong kaisog, ug unya
nakit-an mo ako, ug kita nanayaw,

sa atong kaugalingong musika sa kasubo ug sa
kamingaw, sa edad nga lapos na sa usa ka eskinita
nga gipuy-an sa mga walay paglaom, gaduda na
akong daan,  apan kamaong motago ang akong
panagway, ug busa

mipadayon kita sa panaw, mibagting ang kampana
miulan ug bugas, gibuak ang baso,  ug midalagan
ang kabayo, ug misabsab sa kasagbotan, ug
nangahulog ang mga dahon sa panahon,

apan, ang aso aso gayod, nga bisan ug unsaon mo
ug panira sa mga bintana, ug palong sa mga kalayo,
mogawas kini gihapon sa dapogan ug magsiging
panugilon didto sa taboan, sa plaza, sa mga estasyonan
sa bus, sa daplin sa kalsada,

ug nabungog ang atong mga dalunggan, ug giangkon
nato ang atong mga kasal-anan, aron lang unta kita
mapasaylo ug masalbar ang mga pasahero ning
malunod ta nga barko,

taas nga sugilanon, nga gusto usa nakong putlon,
samtang ikaw, nanambo sa bintana, nagpaabot sa
bulan, wala ang kahayag, ug gisapat ka, misulod sa
imong lawak, midagkot sa kandila, miluhod, mihirit
sa rosaryohan, ug gisulayan nimong kaon ang imong
dila, nga nagdugo, nga mimantsa sa imong gisuot,
apan wa na nimo maambat, tungod kay mas sakit
ang samad sa imong kasingkasing, ug

ako, naglingkod sa hagdanan, ning tungang gabii,
mihangad sa langit, misulay ug panarap ug mga bitoon
sa pukot sa akong nga panaghap,

wala, wala gayod bisag usa ka bitoon ang langit
karon, unya sakto ka, ang kahayag wala usab, kay
ang mga dag-om sa bagang mga panganod nga itom
ning tungang kagabhion, mitabon man sa bulan,
nga morag nasayod sa tinood tang kahimtang.

ang mga iro

gibuhat lang nato ang atong angayang buhaton
miabot kita sa punto nga
gipanglabay na nato ang mga damgo

mas gipili nato ang pagkabungkag kay
mas haom kini sa bag-ong dagan sa atong
pagpakabuhi

akong gipasulod sa atong hawanan ang kalipay
milantaw ka
samtang giabi-abi ko ang bag-ong miabot
gikalipay mo usab kini

sama sa pagtawag mo sa usa ka layong
gihigugma
nga ako sang nasabtan nga haom sa imong
mga tinguha

karon ania na kita dinhi
andam na ang mga bagahe
nagkisikisi na ang mga tiil nga mosaka
sa hagdanan sa eroplano

ang talad kan-anan nalimpyo na
ang mga baso anaa na sa ilang mga hiposanan
gipakaon na nato ang mga bukog alang
sa atong mga iro

ugma, hapiton silang tanan sa usa ka
bunguton natong silingan nga taga-Bukana
dako ang iyang bag-ang ug ang iyang sundang
hait ug ang pisi nga maoy iyang ihikot sa mga
iro iya ng giandam sa usa ka lit-ag

ihawon silang tanan ug himoong sumsuman
sa tanang mga silingan

ug kita nga wala na dinhi, ikaw sa imong panaw
ug ako sa akong lingaw
dili na gayod makadungog sa ilang mga
syagit nga morag nangayog panabang

Turno ug Labason

sa dihang nakita ko ang
mariposa didto sa Turno

mahinumduman ko na usab
dayon ang

akong sakayan nga midunggo
sa puting balas sa Labason

mga kamot nga lapokon.

 

ang daghang lapok sa kamot
mahugasan

ang kabugnaw sa tubig nagmugnang
kasingkasing sa sapa

nga gitamnan sa daghang mga halok
nga nanubo isip mga

ngabil unya sa kilid nagpaabot ang
mga sakayan nga nagsigig lantaw

sa mga panganod nga naglaray
sa dughan sa langit

nga sa wa madugay namulak ug
mga bitoon nga

naghatag ug kahayag sa duha
ka anino nga karon lang

nagkita apan bisan pa sa
bag-ong pagkahibalag dali

ra kaayo nilang nasabtan ang
kasubo sa usag-usa nga mora

bag gikan sila sa usa ka lugar
diin gadungan sila sa ilang

pagkabatan-on, nga sa kanhiay
lamang nangaligo sila

dinhi, dinhi, dinhi gayong
sapaa nga tag-iya ning

tubig nga naghugas sa ilang
mga kamot nga lapokon.

ang ulahing miabot

 

ang kahilom imong natintal og
miawit,

ang kasubo, tungod sa imong
gisugid,
mipahiyom

ang kasingkasing nga samdan,
mihunong sa pagdugo,

ikaw, ang naulahing balak sa
akong kinabuhi

ang mga bulak sa lubnganan
namuswak

apan, hain ka na kaha karon?

 
gikulit nako sa
bairan

bisan kanus-a
dili na gayod ako
mingayon
nimo

bisan kanus-a
pa
dili na ako
maghandom
kanimo

gibalik balik ko
kini sa pipila ka
katuigan

ulan ug init
bagyo ug linog

kalimtan ko na
ikaw
kalimtan ko na
ikaw
kalimtan ko na
ikaw


gibalik balik ko
kini
gisirad-an ko
ang bintana
ug pultahan

katulgan ko na
ang mga
katuigan nga
umaabot


apan,  hain ka
na kaha karon?
kinsa kaha
ang moagak
kanimo?

dagko ug
daghan na kaha
ang imong
kaliwatan?

sundang nga habol

hanap na  ang akong
panglantaw kanimo

nakapili na ko
sa dili hanap

ligti, hagtik, di
madutlan sa
kasakit, karon,

nanaad ko ug
akong tumanon,

ako,
ako kini,
karon

dugay ka man
god
nga miabot

ang imong
saad
sundang
nga habol

di magdayon.

lahi na karon
mas nasabtan ko na
mas lalom na ang atabay
ug mas lig-on na ang pisi

di na ko mangutana
nganong hiloan ta ang mga bagtok
nganong huktan ta ang punoan
sa kamatis

lahi na karon
di na ko magitik nianang kibot
di na ko malingla sa
kagilok sa akong ilok

kamao na kong moharong
walay bayad ang akong
mga pulong
di sab ko mopalit ug
mohangyo sa imong
mga baligya

lantaw lantaw lang
pangupangutana
diha ra ko kutob sa
giwang sa bintana

bisan sa kataas sa giabtan
sa atong mga sugilanon
kamao pa gihapon akong
mobalik sa akong
kaugalingon

kay ang pung pung lang
di magdayon.

diha sa pagtakuban sa katulugon.

sa pagkagamay sa iyang hawak
sa pagkanipis sa iyang tiyan, nga
akong gitutokan pag-ayo sa
pipila ka gutlo, disir ko gihulog
ang akong kaugalingon, usahay
makapangutana ko,

asa kaha niya giluklok ang
iyang atay? asa kaha niya gitago
ang iyang kasingkasing?

kining hunahuna, lahi sa mugna
sa kasingkasing
gikahig ang mga dili angay
gisilhig nga morag mga
balahibo sa iro diha sa
puti nga salog sa kusina

unya sa dihang hawan na
misayaw ang mga tiil nga
wala na kaila ug unsay kaulaw
militok ang mga baba sa
mga pulong nga nagmaskara

gihuwad ang tanan diha sa
habol gawas sa higdaanan
unya nagpiyongpiyong
aron ingnon nga gidaman
diha sa pagtakuban sa
katulugon.

kabahin ni E.

pagkagamay sa lawak
pagkainit sa hangin

pagkagamay sa hawak
pagkaguot pa sa panit

pagkahumot sa buhok
pagkaugdo sa dughan

pagkadugay na sa panahon
nga hagbayng milabay

ug nganong hangtod karon
nganong di pa malimtan?

ikasalo kita nila sa ilang yanong panihapon

bisan pag milapas
na kita sa eskinita

bisan pag nawala
ta og di na katultol

asa ang paulian
apan ayaw ka diha

duna pa gihapoy
gamayng kahayag

sa unahan, naa gihapoy
nanagkot ug kandila

naa pa gihapoy abri
nga mga pultahan

naa pa gihapoy
makaila kanato

mopahiyom mangaghat
kon mahimo bang

ikasalo kita nila sa
ilang yanong panihapon

mga panultion sa usa ka kontrabida

ang pagtabang usahay
dili katabang

ang imong gitabangan
misamot kalisod misamot ka laog ug kahakog
gikubalan angduha ka palad
sa sigig dawat anang
imong mga limos

unya kadtong kusog sab mangayo
aron kunuhay itabang sa naglisod
mao man hinooy
mitukob sa imong gihatag
ug didto sa tago durong buhakhak ug katawa
kay nakailad
na usab ug laing unggoy
nga gakurbata

ang mga mangingilad
sigi sab nang simba
ampo, dupa-dupa
maglakaw pa gani nga magluhod
nga gilantaw sa mga
tawong magdayeg kaniya
paingon sa altar
sa santissima

sigi sab nag  han-ay sa mga salmo gikan sa
bibliya
unya sigig wali nga kon "ikaw manghatag
ikaw usab pagahatagan" ug kapili pa pilo-piloon nga mga
balod sa grasya ug mga himaya

apan siya mismo
sulayig subay
wala say gihatag bisag
usa.

karong adlawa nadasig ko sa pagsulat

karong adlawa
nadasig ko sa pagsulat

kon unsa kangulngol ang sakit sa akong
balatian nga dili nimo mabantayan mao usab kadako
ang akong kadasig

kay kining kasakit dili kamaong mosyagit sama sa mga irong hinuktan
sa among mga silingan

usahay man god pilion ang  kahilom kay mas matahom kini diha
sa dulom

morag babayeng nagturong apan puti kaayo ang suwang ug ilong
unya ang mga balod sa pilok nanglabaw sa panapton

karong adlawa nadasig ko sa pagsulat
kabahin sa kasakit

hunahunaa kon unsa katahom ang nilubaan sa akong hawak sa usa ka hait kaayong punyal
mga nababagan sa akong gusok
unya pinaagi sa akong wala nga kamot akong gidapionon aron dili moagas ang daghang dugo
sa akong kiliran

hunahunaa pag-ayo kon giunsa ko gihapon pagsulat ang tanan pinaagi sa pagamit sa akong
too nga kamot

sa akong lima ka tudlo lamang nga morag bagtok nga gaambak-ambak sa mga pindotonon
aron lang mahulma kining mga pulong....

dili sab motingog.

ang kamatooran dili motingog
apan nagpakita  nako, nga wa sab katingog,
nimo, nga nagpakaaron-ingnon sab nga
wa kakita,

di ko ganahan moiyak, ikaw sab nagpahiyom,
dili ta katutok, morag hayag ra kaayo,

wa sab ta modungo, kay nianang pagduko
dali rang motulo ang luha unya atong
giisip nga walay pulos ang pag-iyak kay
hayag ug dayag ra kaayo ang tanan

buhi ang kamatooran, dili nato mapatay,
kita ang mamatay, ug ilubong, ug bisan silang
nagsubo sa atong kamatayon,

dili sab motingog.

sa dihang natagboan ko si bobby

nagdrive kos akong
Dmax nga bag-o

Puti kaayo, gasinaw
diha sa adlaw

hinay lang ang akong
dagan

sa dihang natagboan
ko ang sikat kaayo kaniadtong si bobby nga kusog manghasi sa baylehan,
unya daghang mga botelya sa beer nga iyang gibuak ug wala bayari ang mga
makalolooy nga tindera didto sa pordoy usab nga barangay

kaniadto, hugot ang panit, taas ang buhok, saktog pomada, dato ug postura,
daghang barkada, de kotse, dakog basakan, lapad ang kalubian, kinadatoan
ang daddy, unya class ang mommy

karon naunsa na ba kini si bobby? naniwang man, luag ang purol, taas ang bungot,
walay alot ang buhok, galakaw, gisi ug sapatos, namyahok ang aping, morag unggoy
nga nahug sa taas nga kahoy,

usahay, makaingon ko
mas maayo pa lang ug nagsugod ug kamote unya misangpot sa pan de leche

usahay makaingon ko, lisod gayod kining wala maanad sa trabaho,
kanang magsalig lang sa daddy ug mommy,

nangamatay na silang tanan, nabaligya ang katigayonan, ug ang nabilin si bobby
na lang

di na kamaong molangoy nga siya na lang ning galawod tang kalibotan.

ako kadtong iyang gisuntok sa baylehan kaniadto, kang nanay kadtong mga botelya
sa beer, kang tatay kadtong mga tuba nga nangayabo kay nag wild si bobby kaniadto
sa iyang kabatan-on

wala mabayri ang iyang utang, apan kami nga karon nagsakay sa among bag-ong
Dmax wa na poy ganang maningil

ug nagtinan-away kaming tanan. Walay tingog tingog samtang among gilabyan
ang bobby kaniadto.

karon, unggoy na.

ug dayog lupad nga dili na mananghid

sa matag adlaw
gihinay hinay ko ug taod ang
akong mga balahibo

giabonohan ko ang
mga tuig
aron mahingpit ang
akong mga pako

andam na ang akong
paglupad
bisag wa pa ko kahibalo
kon asa ako
mopaingon

ang hunghong sa akong
kasingkasing
mao ang kaanindot sa
usa ka halayong
lugar

wala ako'y nailhan didto
apan sayod ako nga kini
nga gayod ang akong
gidamgo sa matag gabii
nga ikaw natulog
sa akong kiliran

usa na lang ang akong
gipaabot nga mahitabo
kon imong hikapon ang
akong ulat unya mahinumduman
ko na unya ang
kasakit sa karaang samad niini

nan, daghang salamat
kay ako mobukhad na sa akong
pako
ug dayog lupad nga dili
na mananghid

hangopa ang imong pagka-ikaw

ayaw kabalaka anang
gibati mo nga mora kag kagaan
sa gapas

unya ang imong dughan morag
alkansyang kawayan nga
walay sulod

ayaw kabalaka kon mora
kag bunot sa lubi nga naglutawlutaw
sa lubog kaayong suba
didto sa Iligan

kon kabalo ka pa lang

daghang lansang gustong mahimong
gapas
daghang alkansyang gustong
haw-asan sa mga sinsilyong
gitay-an
daghang bato sa daplin sa
suba nga gustong
maglutawlutaw sama sa
bunot

pagkaswerte pa gihapon nimo

daghang nasina
ayaw na lang ug tingog
kay basin mabisto ka
nga ikaw
dili ganahan sa imong
pagkaikaw

kon madunggan ka nila
malangan ka
kay daghan silag mga
pangutana

busa, hangopa ang pagkagaan
sa gapas
pagkahawan sa sulod sa
kawayan
pagkanindot sa dakong suba
nga karon
imong gisuroysuroyan

hangyo gikan nako

unta kon makita mo
ang akong pagsalop
dili ka magbagotbot
nga way koy lami

puhon padungga ko
nga "oi, misalop na
diay siya, unya,
mas nindot pa siya
kaysa misalop
nga adlaw didto
sa Dipolog Boulevard".

lad-ok lang dayog duko.

di ko kaako
ug luwa
sa langit
sayod ko nga
maigo ko
kon dili ko
kaayo kamaong
molikay
inig balik
sa akong
laway

apan
sa kabaho ug
kahugaw sa
kasagarang lugar
sa kalibotan
bisan unsaon
ug pugong
makapangluwa
ta sa
unahan

sa laing bahin
kung
atong hunahunaon
ang mga aslom
sama sa manggang
hilaw og
kamansiles
ug iba

ug mga
maanindot
ang mga gihay-ad
ug gipaibog
mutubod baya
ang laway

unya sa atong
pagtagotago
aron di ta kaayo
maatikan ug
maulawan
ato lang sa pung
tunlon ang
atong laway

lad-ok lang
sa 
dayog
duko.

away sa samin

nakigbangga ko
sa akong nawong sa samin

way daog.
pareho ra man

apan wa jud kabalos
sa dihang akong
gilud-an.

ang akong pagkatinood/sa saktong panahon

lahi ang akong
dalan
ang akong kalibotan
walay
utlanan
ang akong
paingnan
ngiob man
gapuyo ako
karon lamang
ang ugma
wala unya
ang kaniadto
hilis

busa ayaw
na akog
dapita
diha sa inyoha

kanang imong
gibitbit
kataw-an ko
lang kana

kanang imong
kuyog
dili ko
ilailahon
kanang gamayng
kamot nga
imong ipalamano
kanako
iwakli
nako

ako ang
tinood nga
panaw

sa pag-abot
ko dinhi
wa koy dala
ug sa akong
pagpahawa
wa sad koy
dalhon

naa kay
ibilin

ako
bisag buling
bisag abog
walay
ibilin

kon magtungtong
ka na unya
sa panganod
o kaha ba sa kinatumyang
bungtod
aduna kay
lantawon
aduna kay
handomon

ako, wala.

kon atua ka na
sa imong
langit
aduna kay mga hangyo
nga unta kini ug
kini kana

 adunay mga miiyak
kanimong
gatuires
unya dagkotan kag
mga kandila
mataghapon
sa biernes



ako, wala gihapon.

nindot tan-awon
nga ikaw mopahiyom
panalagsa

sakit tan-awon
nga ako
wala

apan ang tinood
ug ang tinood gayod

kitang tanan,
wala baya gayod
gihapon
bisan pag
unsaon

busa sa kataposan
nasabtan ko ang
kasakit

ug kon samdan ako
niya
dili man galing ako
mokatawa
apan dili sab
ko magmug-ot
sa akong
lapida

kay ang tinood kining
mga pagbati
dayandayan lamang
sa atong karon

sa saktong panahon
dili na nato kini
mailhan ug dili na
usab kita
ganahang mobalik
aron kini
ilailahon

sa atong pagkatonto

sa atong unang panagkita
wala nagdilaab ang atong mga kasingkasing
gani nagmala man ang akong
alingagngag
apan nasayod kita sa atong mga gihambin

 karnerong sungayan
pagi nga ikugan
anay nga gibiyaan
walay katingad-an

sa atong paghinabi
sa silong sa ngitngit nga
panganod
ang atong gisabotan nga
kon unsa ang naa
diha
mao na gyod kana

walay pangagho
walay pangandoy
walay damgo

pila na ka palid sa
kalendaryo ang
atong gilangkat ug
gisunog?

sila nga nagtan-aw
kanato
nagmalipayon
dayon miabot ang
higayon nga
kita wala na
nila giambat

tungod kay kita
dili na katingalahan
ang atong mga
gamot
gamot nga tugas
ang atong dahon
dahon sa puthaw

miabot ang mga
pangagho
nga atong madungog
inig dulog nato
apan tungod
kay gasabot man
kita
wala na nato kini
giambat

ang atong mga pultahan
nag-iyahay na ug
pangabre ug panirado
ang atong mga
hagdan
lain laing lapok ang
mitapot

kon molingkod ako
usahay sa kahoy nga
bangko didto sa
hardin sa parpagayo
gilantaw ko ang bintana
ug sakit pamation nga
puhon lain na usab
ang manambo niini

ah, kapoy na ang
pagpasabot
kapoy na ang
pagpanaw

gibalikan ko ang
atong unang
panagkita unya miyango
ko: sakto ang atong
sabot

kon unsa ang naa diha
mao lang kana
aduna bay gibati ug
wala
basta mao na lang
gyod kana

unya magdungan
tag panihapon sa
atong  naandan
nga inun-onan ug
kan-on nga
sinabawan: lamog na
diha ang asgad ug
aslom
pait ug tam-is

ug sa mga kutsara ug
tinidor nga atong
gipatukar
kinsa pa kahang mga
pangagho ang
madungog sa
atong pagkatonto

pagbalik sa usa ka kalendaryo

kadtong tigbugha sa among
bil-ungan ug mga kahoy kaniadto
nga giandam alang sa pista
ni San Antonio
anaa ra gyod ug yampongad
sa kalendaryo matag
hapon human sa iyang trabaho

karon nasabtan ko na ug ngano


ang kataposang balita kabahin niya
nga siya
patay na, dili sa ingon nga siya giluba
sa iyang kontra
og naligsan ba kaha sa
trak de karga
o nalumos ba kaha sa kakusog
sa sulog sa baha
nga kalit mitunga sa bukid
sa Malala

namatay lamang siya sa iyang katigwayon
samtang natulog sa silong sa punoan
sa dum-on didto sa bukid
sa Moliton

karon nasabtan ko nga nganong
ako usab nagyampungad niining kalendaryo

pagkagamay pa kaayo sa akong mga tudlo nga
mihikap kaganihang buntag sa
kaniadto
karon gikubalan na ang akong mga palad
samdan ug giulatan na ang akong
tudlo diin mihugot na ang singsing sa akong
kaminyoon
nga gahatag ug sakit
sa akong
duha ka bukton

kunot na ang akong kumingking
ang akong mga kuko gisuksukan na sa mga buling
agig kinuha sa mga kugmo matag adlaw
sa sud sa akong ilong nga dili na kasimhot
sa kahumot sa mga buwak didto sa hardin
sa akong kabuntagon

kabahin sa perigee moon

kon wa mo hisgoti ang
perigee
na, wa jud ko kasabot
kon unsa
ang apogee

ug busa kon litokon
mo na unya ang kalisod
sa paglangoy nianang
pagtaob andam na
usab ako sa pagsulat
kabahin sa akong
gilakat nga mga hunasan.

kabahin sa taas kaayong balak nga bungat-pamatbat

tungod sa daghan
kaayong mga buluhaton
sa matag adlaw
ning atong pagpangita
sa kan-on ug sud-an

tungod sa nagtampuog
nga labhonon nga bulingon,
platong hugasonon, irong
lawgan, manok nga patuktukon,
kabaw nga balhinon, kanding
nga itulugway, atop nga libwasan,
ug mga duyan nga tabyogon

dili ko na una ikaw basahon.

pangutana sa balak ni carmi flor kabahin anang "pag-inusara"

ngano kaha nga ang kahaw-ang

man lang ang nadakpan sa mga 

naglatagaw nga hunahuna didto

sa suok sa utok ug kasingkasing

nga unta ang pagpadayag sa

pagbati kanunay man kining

gikuyugan sa mga nindot nga

lawas sa gugma o bisan ba na

lang kaha nianang labyog sa

lubot sa sayo ra kaayong
pagpangulag?

pagbali sa balak ni Gratian kabahin sa usa ka mansanitas didto sa Biasong

Walay hunong sa pagpangiti ang
mga langgam matag buntag
ang mga kabog  matag gabii
ug ang mga sunoy ug himongaan
sa punoan sa mansanitas nga
mitubo sa among tugkaran

apan bisan pag nanimahong 
iti ang among tugkaran  wa kini
namo putla kay kining mansanitas
siging gapamunga unya kon
among tilawan ug tilapan nan
haska baya gayong tam-isa
labi nag kita na lang duha 
ang nahibilin sa silong niini 
inig takdol sa bulan....