dunay usa ka plato nga
nahulog gikan sa lamesa
nga maayong pagkabuak
didto sa salog
nalisang ang usa ka babaye
nakasyagit sa iyang kakurat
nangahilom ang mga bisita
"plato lang kanang nahulog"
(dili kana kabahin sa usa ka
relasyon)
dili kana buak nga
kasingkasing
ug busa nanumbalik ang katawa
ang pagkumustahay
ang mga kahimuot sa matag-tagsa
adunay nagkinidhatay
naghunghungay
adunay mipahiyom
ang mga bata sa gawas nagdula ug
tago-tago ug
dakpanay
ang ubang mga lalaki nagpunay ug bulhot og
sigarilyo sa ilalom sa buwan nga
tibuok
adunay nakigsulti sa iyang kaugalingon
kabahin sa maong plato isip usa ka
tanghaga sa usa ka
gugmang napughaw
iyang nasaksihan sa unahan ang
labaw pa sa kabuak sa plato
ang mga tipak nga sa iyang hunahuna
dili na masumpay
dili na magamit
ug busa
angayan na gayod nga
ilabay
ilubong sa ilalom sa yuta
aron unta
wala nay masamdan
pa sa sunod nga
higayon
No comments:
Post a Comment