duha ka minyo

usa ka buntag niana
dinhi sa katipunan sa panahon sa tingtugnaw
sa daplin sa dalan
milabay ka: taas ang imong buhok, nindot pa gihapon
ang imong lawas, anaa pa ang kahumot sa rosas
sa imong liog, sa imong dughan anaa pa gihapon nagsalag ang mga
maya,

nag-estorya ta
kadyot lang, wa na gani nako mahinumdumi kon unsa to,
mipahiyom ka, masulub-on ang imong mga mata,
morag pyous nga wa kabuswak,
kadyot lang kadto, apan ang di nako malimtan
mao ang pagbesobeso mo kanako

gidapion mo ang imong aping sa akong aping
og wa ako maanad niini
lahi

ambot og mao ba usab ang imong gibati
kanang gusto unta
apan dili na lang
dili sa ingon nga dili ta magkauyon apan
kana bang
mahimo kitang ilang
sumsuman....

kabahin sa imong gitungtungan

Nganong gipakisama mong bulawan
ang akong gikuptan?
bato lang kini nga gikuha ko sa
kilid sa dalan
usa lamang kini sa daghan kaayong bato didto

gitan-aw ko kini sa makausa og akong
gilabay sa dalan
dayon nimong panugilon nga ako usa ka
sapian
nga nanglabay og bulawan sa kadalanan

pagkadaghan mog bulawan
nagtuntong ka sa dakong bungtod nga bulawan
apan wala ako
magsaba

nganong dili ka man moduko panalagsa
aron makita mo
ang imong katigayonan?

ang estorya niya

diha sa kutson
miabot ang kapuol
naghay-ad
walay miambat

ang habol mitabon
sa gitay-an nga
mga bukton
sa katre

talan-awon

hanging
minggitik sa kahoy

yutang
gihagwa sa bitin

panganod
nga nagbalhinbalhin

panag-uyon sa katapusan (alang kang L.)

ngano kaha
nga kon magtagbo na gani ang atong mga mata
mahilis man ko
morag mantika sa baboy nga
giinit diha
sa kalaha?

og unya kon molingiw na ko
maayo man gyod nga pagkapilit sa imong nawong diri sa akong dughan

gusto ko nga motan-aw pag-usab
apan naglagot ang akong mga kamot og giwingig ang akong aping
morag miingon
sakto na!

nagsikadsikad ang akong mga tiil aron moduol kanimo
og ang akong dughan nagbutobuto nga morag dunay gubat didto sa Jolo

kining akong utok mitulibagbag
mibudhi sa akong kasingkasing og miingon sabat sa akong mga kamot
sakto na! sakto na!
ayaw na og kastigoha pag-ayo ang imong kalag
mora ba og motan-aw ko kanimo pagbalik
mangsuko silang tanan kay kuno ang akong kalag
akong gibunalbunalan
gisuntok og gisikaran


abi nimo
mipatoo baya sab ako sa akong mga kamot
ang akong utok miduko
mihapuhap sa gabakho ko
nga kasingkasing

SA DAMGO LAMANG

sudlon ko ang pultahan paingon kanimo
bisan diha lamang sa damgo

pag-abot didto ikaw usa lamang ka gapnod
nga sa dihang gisulayan ko paghinod

bisan og alisngaw sa kainit
wala gayod ako'y mapignit

ginadili ang pagkatawa...

nakita mo na ba
ang pagpatutoy ni
Mr. Elton John
sa iyang
baby boy?

mga paghandom...

daghan kang mahinumduman og sa paghunas sa dagat sugdan mo kini og ayag sama sa mga balas nga nalamog sa imong nakuhang mga tagimtim si Hamber nga nangawat sa imong bisikleta si Nidas nga namunit sa itlog sa inyong bebe si Toldo nga namatay sa basakan si Bebing nga nahibilin sa payag og nagyawyaw si Bation nga nahulog sa lubi si Tonya nga miangkon sa yuta si Ramer nga nananom og lubi nga haskang sipita si Elma nga di mobayad og utang si Greg nga gikaon sa leukemia si Petra nga imong yaya nga gikulata sa iyang bana daghan pa daghan pa ang kataposan nga imong gikalisangan si Nelson nga nag-inom og hilo didto sa kasilyas sa korte. naglibog ka nganong wala na nimo mahinumdumi ang inyong pagpamasol didto sa sapa sa Olingan diin daghan kaayo ang inyong kuha nga haw-an og rami ang pagsalom ninyo sa suba og sakay sakay sa dakong tablon sa kahoy ang pagsaka ninyo sa punoan sa mangga nga naghitik sa hinog kaayong mga bunga didto sa bungtod sa Bandera nga wala'y namuyo nga mga tawo puno ang inyong bukag sa inyong pagpauli ang pagsakay-sakay sa kabaw og mga kabayo sa kilid sa lasang diin madungog ang mga sungog sa mga unggoy ang pagpahulay didto sa kilid sa suba nga giagian sa dakong baha tupad sa kiliran sa imong Papa silong sa tibuok kaayo nga bulan....

bali...

pagkadaghan pa unta sa isulti apan pagkakulang na sa panahon siya kagabii pang mihapnig sa iyang usa ka parisan nga karsones og usa ka puti nga polo shirt
pagkakaadlawon mipahawa siya nga walay pananghid
walay gidala bisan usa sa iyang gipili og gihapnig
ang akong nakita moa nga gahubo siya og kalit nga nawala
sama sa usa ka gapnod didto sa halayong bungtod

pagkataas pa sa akong panahon apan nahutdan na ako sa pulong

balak sa usa ka nagpakabuang kanimo...

sa silong sa dakong kahoy
morag kalayo ang mga buwak
nanglingkod tang duha
ikaw tupad kanako
gihawiran ko ang imong kamot
gibayaw ko sa langit
sa unahan pagkatin-aw sa lanaw
nanamin pa man gani ang mga panganod
pagkalunhaw og pagkabugnaw sa panahon
sa dihang gisulti ko kanimo
ang tinood kong gibati

sayang lang
wala miduyog kanato ang mga higayon
og ang mga panghitabo
nagsamad kanato

adunay dakong dagat sa atong mga isla
wala'y sakayan
ang naglabaylabay mao lamang ang hangin
og mga kanaway

gisampungan mo na ang imong mga dunggan
samtang mibalak ko sa kawanangan
ang namati kanako
mao na lamang ang bulan

gihawiran ko ang akong kamot
gidap-ig ko ang gamayng kainit sa akong dughan
dinhing lugara nga akong balikan
buhi pa gihapon ang dakong kahoy
nagkalayo pa gihapon ang iyang mga bulak
tin-aw pa gihapon ang lanaw
og nanamin pa gihapon ang mga panganod

bulawanon...

didto sa bungtod
dapit sa kinatumyan
wala'y misuway pagpuyo
kay kuno
walay mabuhi

apan pagkapalaran mo
ikaw nga masupilon og
gahian og ulo

miasenso ka didto
gidungog nga ang imong mga baka
minumero na og kwarenta
pagkadaghan kuno sa imong mga
kanding
morag mga kuto sa lawas sa
mga kabayo

adunay tubod ang imong
kakugi
sa matag adlaw midagayday
ang singot
sa imong agtang
miulan
sa nag-uga nga yuta
milabong ang sagbot
nga nagpakaon sa mga hayop

gitago mo kining tanan kanila
ikaw
nga usa ka kahilom lamang
tupad sa mga panganod
didto sa kinatumyan sa
bungtod
sa tinagoan mong
bulawan

nadungog ko ang imong gisulti...

pagkadaghan
og pagkawalay-lami

og adunay mitubag
dapit sa unahan

pagkalami unta apan
pagkanihit usab

pagkadaghan sa giuhaw
apan pagkanihit sa tubig
pagkakulang sa mga baso nga imong gitagoan
pagkadaghan sa giguto
apan pagkakulang gayod sa pagkaon
gamay lang ang plato nga imong gipagawas

pagkataas sa panon sa wala matagbaw

og busa
namauli na lang
balik sa ilang payag didto sa tiilan sa bungtod
mikuskos sa gitara
miawit og misayaw kuyog
sa ilang
mga aninong nagsakit
naglunos midaot
nagniwang.

kanang mubo og gamay...

palihog inday
himoi ko og balay nga mubo og
gamay
og mahimo kanang humok
og humot

sama sa usa ka
pula nga nipis nga tapis nga
gitabon mo sa imong paa

o dili ba sama sa dahon sa
sampaguita nga gitabon mo
sa imoha

sama sa mamon nga adunay
gamayng liki
sama sa usa ka pahiyom
nga bag-o
pang gikuha sa usa ka hurno.

sa daghang mga nangahagbong

gisulat ko kini dinhi
aron dili ninyo mabasa
kamong mga nangahagba
milagapak og
sayod ko nga nasakitan pag-ayo

dili ako magsulti kaninyo kon unsa ang kasakit sa maong panghitabo
ang pagkalaglag og pagkahulog
ang tingog sa hagbong mao mismo ang magsulti kaninyo og magsudya
kon asa kamo nagkulang og kon unsa ba kaha ang inyong mga sala

dili kamo moangkon nga kamo kaniadto nagtinapulan
kasabot ako niana
makita ang mga larawan sa inyong kagahapon
tin-aw pa ang mga sapa og ang mga adlaw andam nga mohatag sa lamdag

kadtong nangatawa kamo samtang nagtungab sa mga ilimnon
kadtong ang inyong mga kamot naghapuhap sa nanagko ninyong mga tiyan
kadtong mga tinidor nga walay pahulay og tugsok sa mga sumsuman
nahuman na kadto

karon mao ang pag-iyak diha sa pag-inosara
karon ang paglabay sa mga pangutana kon unsa ang sunod nga buhaton
manirado ka sa imong lawak og ang imong amahan manago sa pusil og kutsilyo
ang imong inahan manglabay sa mga hilo
gibati usab silag kahadlok

mao karon ang pag-awit sa kamingaw sa disyerto mo nga dughan
mao karon ang pagpangita sa usa ka bitin sa tambal nga panit sa kahoy og sa mga dahon
samdan ang dughan

molalom ang dagat og moginhawa ka panalagsa
buhi ka gihapon og andam nga moatubang ning tanan
sa tinood lang walay mabasol niini
kay sagad kining mahitabo og daghan ang moagi niini
gani mao kini ang tinood nga agianan
paingon sa ganghaan sa kalamposan

pailob lang, dili pa ulahi ang tanan
ang dagat mohunas motaob
ang adlaw mosalop og mosubang
ang tawo mapandol og motindog usab pagbalik
dili moatras, dili maparog
haliging lig-on lang gayod gahapon
sama kaninyo
mga higala ko.

tambag ko kanimo

ayaw pagsaad
kay ang imong mga saad nahimong mga bato
mas maayo pag
maghilom-hilom ka na lang sama sa usa ka dakong lasang
kay atua ang imong mga kahoy
nanag-as og
sa ilang tiilan nanaghan ang mga ligbos
nilabong ang mga pako
og sa ilang kiliran
namulak ang mga antulanga
og mga pangadlaw

Bohemian Rhapsody
ang tukar sa Ipod
kusog kaayong bulyo
diha sud sa imong
dalunggan

diha sa pula nga
sofa
gihan-ay mo ang
imong lawas
sablay ang kamot

naglirawliraw ang
imong mga mata
gubot ang imong
buhok
(apil na ang hunahuna)

daghang mga libro
ang gibagyo
og gilabyan ka

mao kini ang
imong hukom:
wa na akoy labot
kaninyong tanan

wala akoy nahibaw-an
kaninyo
wala akoy namatngonan
ang akong kinabuhi
inyong gihimong
mga letra og papel
mga anib mga yugto
mga panid
na lamang

mikuyog ka
sa usa ka Bohemian Rhapsody
paingon sa usa ka
lugar diin ang mga
panganod
pulahon og ang mga
dagat abohon
og ang mga kahoy
itom...

alang kang Tu Fu

ang mga tamsi
usa ka hapon niana
nanugpa sa
punoan sa kawayan
milamog sa
mga dahon niini og
dayog kawala
samtang ang hangin
sa hinay-hinay nga huyohoy
misamot
og katugnaw
naghatod og kahingangha
dapit sa tingkoy

diha sa kangitngit
misamot kag katigulang
sa taas nimong bungot
nga aso sa imong
pagpanigarilyo
nga walay
undang

ang imong kabatan-on
usa ka paspas nga
kiyod
apan
kadyot lamang

nahisama sa iro
ngadto sa laing iro
sa kilid sa dalan
nga pagkahuman sa
pipila ka segundo
lamang
dayog ukang
dayog dagan....

ang bakakon...

ang iyang
gipanghambog nga siya
ang gisultian sa
namatay niyang
amahan
kabahin sa usa ka
palit,


sa paningkamot
nga siya
katuhuan unta
giyongyong niya
ang iyang kilay
giwiriswiris niya
ang iyang kamot
gipaak niya
ang iyang kaugalingong
ngabil
ug busa mitulo
ang luha nga
wa na gani mihapit
sa iyang aping

pagpili....

sa mindanao wala sila'y nahimo
bisan gani
nianang pagsalig sa swerte
wa gihapon maghimpos

sige lang bakwet, wala silay mahimo
gidawat ang tanan, way kapuslanan
ang kapakyasan

mao sab kita, wa na kita'y mahimo
misamot ang sakit, wa na'y laing utlanan

diha na lang ta sa mga pangutana
nga walay ganahang motubag.

ang gugma ko kanimo...

mokanta ko, kantahon ko ikaw, ikaw man god ang akong awit,
gibudhian ko ikaw,
langgam ka nga akong gibuhian, gitugyan sa hangin

misilaw ang adlaw, nangahilis ang mga bitoon
mibatog ang mga tamsi, nahinanok sa ilang mga salag

sud sa 25 ka tuig giamuma ko ikaw
apan usa ka adlaw, ugma damlag,

basin ugma badbaron nako ang
hukot sa akong kasingkasing

buhian ko ikaw
og dayon ako usab mawala

kon imo akong makit-an pag-usab
sulayi ko og hawid

basin mabalik pa ang atong mga kamot
basin og mobalik ang kalayo sa akong handurawan
bisan og diha lang sa katulogon....

niadtong bugnaw nga Disyembre

Ikaw ni og ako, nagtupad ta sa ibabaw sa bungtod
sa likod nato ang haw-ang nga dagat

Disyembre, bugnaw ang mga adlaw
sigeg ulan ang mga gabii

nag-sunglass ka, itom imong taas nga bukton nga gisuot
ako nagkalo og buli, nakamaong, dakog pahiyom

samtang mi-click ang camera
nangatikig ta
sa atong gugma.

mga pangungusap ni laklak pagkatapos ng lindol sa Japan

Sana d na lumindol kawawa nmn ung mga nasalanta at nasawi sa lindol..Lord tama na po!wag nu po kmi papabayaan.
Salamat din sa mga ngworried at ngdasal para sa aming *kaligtansan.
I really appreciate it.
From the bottom of my heart thank you so much!
Lets keep on praying...un lng ung only *weapon natin,red alert parin kami dto until now.san...a po malagpasan natin to lahat ng nangyayari.May God bless us all.

* kaligtasan (iba naman yong tansan)
* ano ba yan laklak, digmaan?

pagkat-on nga ikaw lang usa....

lahi ang tanan kabahin nimo
utokan ka, ang tanan sa klase mihangad nimo
sama ka sa adlaw sud sa lawak
og ang mga planeta mituyok palibot nimo

usa kana sa kalahian
nga dili nila maapsan

apan daghan pang kalahian nga anaa kanimo

ang imong polo shirt nga morag sobra nga tela
sa usa ka kurtina
tinapakan na ang ilok
gidaginot gihapon sa imong nanay

nagpapalit ka og bag-ong sapatos
apan ang makaya ni tatay mao lamang ang didto sa
ukay-ukay

wala'y sakyanan nga maghatod niyo sa
tunghaan
sayo sa buntag ikaw magsugod na og lakaw
labyan ka sa imong mga kauban
nga saktog bulsa ang mga ginikanan

wala ka'y ipalit og snack
nagbalon ka og kamoteng kahoy
nga pinutos sa layang dahon sa saging

dili ka na mopauli pa aron maniudto sa inyong balay
kay wala na didto si nanay og tatay
si tatay kargador sa pier og si nanay labandera ni Mrs. Glepa
nagbalon ka og kan-on
diin gilubong ang inon-on nga pirit
nga giputos sa hinalob nga dahon sa saging
nga gitagkosan og uga nga abaka

nagkat-on kang mag-inosara sa silong sa dakong punoan sa mangga
sa kilid sa pader sa eskwelahan
ikaw lang usa
naghulma sa kan-on nga morag kumo sa imong palad
dayon og hungit, usap og tulon
sagol sa asgad nga inon-on
og dayon og adto sa gripo sa kantina
ukbon ang palad og
salo sa tubig nga imong
imnon

nagbasa ka sa balak ni Shelly
Ode to the West Wind

Be through my lips to unawaken'd earth

The trumpet of a prophecy! O Wind,

If Winter comes, can Spring be far behind?

nanug-ab ka
wala pa kaayo'y nasabtan

diha sa tagpilaw
ikaw mipahuway.

mao ra gihapon...

mao ra gihapon...

pagpahawa ko ganiha
anaa ang sapatos nga wala gamita
og ang medyas nga bulingon
sa kilid sa pultahan

pagbalik ko mao ra gihapon
anaa ang sapatos nga wala gamita
og ang medyas nga bulingon
sa kilid sa pultahan

dili ba sumo?

pagkawalay pulos...

kay wala lagi siya nakatabang
sa mga lamok nga kalit lang gitukob
sa tuko
nga busog na kaayo sa ilang kisame

iya na lang gipalong ang
suga

pagkahurot sa pagtoo..

kon gikuha na ang tanan
sa yawa gikan kanimo
og wala na lang gayoy gibilin
bisag usa na lang ka
tipik sa
pangagho

nan unsa pa mang ginooha ang
imong ampoan?

tan-aw sa bangaw

hunungon ta una kining
atong lantugi

kadali lang
lantawon ko una ang bangaw
nga maghatag na usab og
laing mga saad....

ang tigre tang mga sala

ang mga puntik-puntik tang mga sala
nga atong gipatik sa atong lawas
nakaporma og usa ka tigre

haskang isuga
hilom apan andam na usab nga motukob
og sama kanato

Gubat.

sugdan na ang gubat

una ang pagtug-an sa tinood
dayon, ikaduha ang pagbasolay
ikatulo, ang pagbinungulay
og ang ikaupat ang hinay nga
pagsulti nga
angayan na segurong putlon
ang pusod
aron kining itoy nga
kahiubos
og kasakit
makasuroy-suroy na diha
sa gawas sa labat

kay kon matapos na kining
gubata
nahan, mobalik na usab ang
kalipay og kalinaw

diha sa pag-inosara nga maoy
unang gamot ning dako
kaayong kahoy

natapos na ang tanan...

natapos na ang tanan...

unsaon ba pag-ingon nga
natapos na ang tanan?

maawat mo kaha si
Kristo sa dihang mihangad siya sa langit
nagbitay sa krus
samdan ang kilid
nahutdan sa dugo
og dayon mibungat og
consummatum est?

ang motunhay...

ang motunhay...

bisag gipanglabay na ang mga plato
og ang mga tinidor og kutsara

nanglupad na ang mga tasa og platito
didto sa pader nasangko og nangabuak

dili nila maparog ang iyang paglingkod
himo og balak, dayon og basa niini

bisan og mahugno kining balaya og
kan-on sa dakong liki sa yuta

dili gahapon nila maparog ang
magbabalak, gahunahuna sa mga

tanghaga, bisan og matapos pa ang
kalibotan, bisan pa og moabot na ang

mga dagkong kalayo sa impyerno
dili gayod nila mapilde ang kagamhanan

sa mga pulong, ang kaputli sa mga balak,
ang kaanindot sa mga awit sa kasingkasing.

si Peryong

si Peryong

kapoy magpas-an og kalibotan
sa likod
miabot na ang panahon nga iyang
gitangtang ang maong
pag-antos
milingkod siya sa dakong bato
mipahulay og
nanaad nga pasagdan na niya
ang kalibotan nga
moligid paingon sa
kaparotan
bahalag mabuak kini
wala na siya'y labot

ingon siya
dili siya si Atlas

Peryong ra siya
yanong tawong kabalo sang
mokaon og tagam

si Alegria...

si Alegria...

nangurtina siya aron
dilli kaayo makita ang buak nga
samin sa iyang bintana

kagabii man god
gibuno siya og bato sa iyang bana
itunong unta sa iyang agtang
maayo gani kay
maayo siyang molikay

itom nga kurtina ang iyang
gitaod
tanghaga sa usa ka patay nga
gugma

mitubay ang langit
nga puno kaayo sa baga nga dag-om
nga mipatong sa ibabaw sa dakong
kahoy sa kamansi

unya moulan na usab
og unya madungog niya ang bakho sa
iyang pag-inosara

nahurot na ang iyang luha
hapdos sab kon mopatulo napod siya
og pipila ka lugas
sa luha
nga modagayday
sa bun-og niyang aping

sa tiilan sa punoan sa gumamela...

sa tiilan sa punoan sa gumamela...

hangtod kanus-a pa ba
magpakaaron-ingnon ang mga gumamela
atubangan sa adlaw
nga kunuhay dili sila malaya
pag-abot sa kahaponon?

pag-abot sa alas kwatro
surahoy na kini sa baki nga
nagpaabot sa iyang mga gihay
tapad sa mga batong
gilumotan
nga naghinayhinay og
tam-os sa mga
lata nga dahon

sa bata nga gidaogdaog...

sa bata nga gidaogdaog...

kining bataa haskang isoga,
sa kalagot sa iyang mama
gibunalan siya og kawayan
kapito
apan wala mosyagit sa
kasakit
gadugo ang iyang bitiis
apan wala manumbaling
naglurat ang mata
lantaw sa unahan
gipaslotan sa baga sa bagol
ang iyang kamot
iyang gibuklad ang iyang palad
wala moiyak
gipaluhod, miluhod,
gipadupa, midupa,
gipaak sa mga hulmigas ang
iyang mga tiil
nanghubag apan
mao lang gihapon
wala mosyagit sa kasakit
wala panumbalinga ang
pagdaogdaog kaniya

sa iyang edad nga lima
ka tuig
sayod siya
sa pagsulod niyag upat
ka tuig pa lang
nga siya patay na

wala na niya mabati ang
mga pagbati
natilawan na niya ang
tanang kasakit og
kahapdos
wala gayod bisag usa na
lang ka piknit nga
gugma
wala ang kaasgad og
wala usab ang katam-is
ang kapait
wala nay kahulugan kaniya

gusto unta niyang mawala
sama sa hangin
apan wala pa siya masayod
kon unsaon

pagmahay..

pagmahay..

ang pagsulat
tambal kana
usa ka kapsula
lang
wagtang ang
kasakit
ambot og unsa
kaha ang
naa sa mga pulong
nga imong isulti
sa kaugalingon
nga mawala man
kining labad sa
pagmahay?

kwentador nga balay sa iyang iyaan nga hakog...

kwentador nga balay sa iyang iyaan nga hakog...

nagpaabot lang si Onorio
sa saktong takna
apan ang iyang bag nga
gisudlan niya sa iyang
duha ka polo shirt, duha
ka pantalon,
usa ka toothbrush,
colgate, usa ka sachet nga
palmolive, og usa ka bareta nga
surf, og Camay
andam na

wala kaayo siyay gidala sa pag-abot
og pagpuyo dinhi
og busa wala usab siya'y daghan dalhon
sa iyang pagpauli

usa kini sa mga dapit nga nakahukom
siya nga dili na gayod niya balikan
bisan makanus-a pa

yano lang ang iyang katarungan
walay humot sa gugma ang
nataran dinhi
og ang sud sa mga lawak wala didto
ang kainit sa pagmahal
sa sala wala usag ang magdilaab unta
nga kalayo sa gugma

ang mga salog dinhi
daghang buling sa kasilag
sa kilid sa mga bongbong
naa ang mga mantsa sa
kasina
og sa lamesa anaa ang listahan
sa iyang gikaon
og giinom nga karon ilang
singlon gikan kaniya

nakaingon siya: maayo untag
maigo sa liti kining balaya
paakon sa ngipon sa
dalugdog og tunlon sa
dakong bakunawa

si raul o?

si raul o?

kon kulion kuno siya
aron mawa
magFB

Dayon samtang gachatchat
tagayan niya ang
iyang baba og pipila ka
bol sa tuba

aron og mahubog na siya
sulayan dayon niya og
himo ang mga balak nga
nagtago sa iyang
alingagngag

diha kuno sa sayos makita
ang iyang mga
pag-antos

sulayan niyag pangita ang
haom sa iyang
pagkakulion

kon mahuma na siya
kon wala nay sulod ang mga bol sa tuba
mobalik siya sa iyang trabaho

magmasa sa pan
aron ibaligya sa mga katawhan

nabati niya
nagmasa siya sa iyang mga pagmahay
diha sa mitubo nga tiyan
sa iyang mga pandesal
sa iyang mga palad
wala na man god ang kainit sa
tinood nga gugma

sa boarding house...

sa boarding house...

nag-iyak si Melma
og dayog ingon og sorry ang
tag-iya sa balay

mahimong magbakho
siya diha sa ngitngit
antosan nila kinig pamati

apan palungon na
gyod niya ang mga suga
kay mahal pod baya ang
kuryente.

kagabiii sa akong mga damgo...

niadtong gabhiona
klaro kaayo ang tanan sud sa
akong nagpilo-pilo nga
mga damgo
nga gihapnig sa mga kamot
sa akong hunahuna

klaro kaayo ang mga bulok
sa sulog sa isog kaayo nga mga pulang
kalayo
sa gadag-om nga dagat
sa mga lagom kaayong mga panganod
sa lagong nga hoyohoy sa
hangin

ako kadtong puti nga kahayag nga
milapos sa atop
silong sa ngingit kaayong kagabhion
sa ilalom sa
wa mabanban nga kusog usab nga
bulusok sa dakong ulan

pagpangadye

sud sa simbahang katoliko
adlaw nga Domingo
misimba siya
mipiyong sa iyang mga mata
aron pagpangadye
sa Ginoo

sa unahan
atua ang nangilad kaniya nga babaye
nindot og alot sa iyang buhok
bagay sa bulok sa iyang sapot
og sapatos og
turong


sa iyang kilid mao ang nangutang kaniya
og 200 mil nga bag-o lang
miabot
nagbakasyon sa Dubai og tulo ka adlaw
kuyog sa tibouk pamilya

duha na ka tuig nga wala pa mabayri
ang utang
og ang kiha niadtong tawo sa atubangan
hangtod karon wa pa
gyod mahuman

ang pangutana mao kini:
sa pagpiyong sa iyang mga mata
makapangadye pa kaha siyag tarong
sa atubangan sa
ilang Ginoo?

giganahan kaha ang Ginoo sa
ilang mga dagway?
og siya nga mipiyong sa iyang mga mata
unsang matang og bulok
ba usab ang iyang
kalag?
wala ba usab siya'y sipyat sa iyang
kinabuhi?

lahi nga inahan

sa iyang kabangis
nausob ang iyang nawong

sa iyang kaisog
nangurog ang iyang lawas

niining mga sakit nga kausbanan
sa mga anak wala na siya nailhan

sa sulod sa balay

adunay baki nga ambot
nganong nakasulod sa balay

sirado ang pultahan og
ang mga bintana

gusto niining mogawas
nangita og lutsanan

kay wala makaangay.

ang buslot sa atop

wala na nila buliti ang
buslot sa atop

gipasagdan na ang
pagtulo sa ulan

ang pagkabasa sa
salog og lingkoranan

unya sa pag-undang sa
ulan sa pagpahawa

sa kagabhion gusto na
nilang lantawon ang

tinood diha sa kahayag
mga mulusot niini.

hangyo sa usa ka patay...

unsang hangina ang
nagdala kanimo dinhi?
ikaw nga gilantaw karon
sa mga mata nga
walay nailhan
nagsigig pangutana kon
kinsa ka
og dis-a ka gikan
ikaw nga
sa pag-abot patay nang
daan

mohangyo kaha ako sa lain
na usab nga hugna
sa pagpakabuhi aron
masulti na nako
ang tanan?