ang mga basura

nagkutkot ko
ug dakong buho
diin ginalabay nako
ang akong mga
basura

gitabunan sa yuta
sa dihang
kini napuno
gipalata aron mobalik
sa yuta

sa ibabaw niini
gipatubo pag-usab ang
mga salibotbot

ang nagmahal kanako
hinoon
nagtanom sa mga rosas....

ang atong katungod

pilion ta ang kalipay karon
pilion ta ang lugar ang panimalay
hisgotan ta ang gugma
ang panagdait ang panaghigala

aduna kitay gamayng tuba
gamayng pagkaon
puso, bulad, saging, balanghoy
tinuwang manok
ginamos
nilung-ag nga saging

pilion ta ang lugar sa atong panagsama
lugar sa kalinaw
sa kalipay

dili una kita anang mga pag-asoy sa
mga kasakit
wagtangon usa ang mga pagmahay
ang kahiubos
ang kangilngig ang kamaot ang 
kasilag

magtagay una kita dinhi
hisgotan ta ang  mga makalipay kanato
ang atong mga nangagi
ang atong mga gugma
ang atong mga minahal sa kinabuhi

gamiton usa nato ang gahom sa pagpili
lapad ang kalibotan
pagkadako sa kalangitan
walay sukod ang kadagatan
wala pa gihapon maputol ang mga pako
sa kalanggaman
dili pa lubog ang mga suba
dili pa patay ang mga kahoy

diri una kita sa kalipay
kay unsa ba gayod ang imong dalian aron ka
maguol
maglagot masilag manimalos mopatay?

dali una ngari
mag-inom ta, mangatawa ta
atong patuboon ang mga kalipay
ang atong mga paglaum
ang atong mga damgo

katungod nato kini...

pagpili paghipos

adunay babaye nga miabot sa akong
panimalay

gabinbin sa iyang mga kasakit
nagpahungaw
nagpatambag
nagpakitabang 

unya ako namati pag-ayo
miyango
mitutok mihatag sa dugay
nga panahon 
aron siya malipay
mahupong
mogaan ang iyang pagbati
sa mga pasalig nga
pagtabang

(wala gani siya mangutana
kon ako malipayon ba usab
kon ako naunsa na
sa dugay niyang pagpahungaw
diri kanako

wala na gani niya lantawa ang
akong dunggan
kon kini gipuy-an na ba
sa kato
kon ang akong utok nasudlan
na ba usab
ug mga bakukang?)

(sud sa akong kasingkasing
anaa ang pagmaya
anaa ang pakigsandurot sa usa
ka nagsubo,

aron usab ako malipay kaniya
sayon ra

gipalapos ko ang tanan sa pikas
dunggan
unya sa wala na siya

gitiwas ko ang pagtusnob sa
nilung-ag nga saging didto sa
mawos na kaayong ginamos nga
tuloy

gisala nako ang akong hunahuna
gibahin
akong gikuha ang ako
akong gilabay ang para kaniya

ang makalipay kanako
akong gihipos)

walay tabontabon

gisulat ko lang ang ania
dinhi
wala na nako usba pa ang
anaa na 
akong nakita
ug nahikap

walay lipod lipod
walay pagdapig

aron makita kon unsa ang tinood
nga anaa sa sulod

gitangtang na ang mga kurtina
gikuha na ang mga tabon

giablihan na gani ang mga bentana
ug pultahan
gilig-on pa ang mga hagdanan

bisan gani sa kabuntagon
ang mga suga wala gipalong....

dili gayod unta nato kini ihatag kaniya

unsa kaha
kon atong himoong 
wala lang
ang mga panghitabo

pananglitan kon gibombahan
ang merkado
unya kabalo ta nga 14 ang patay
67 ang angol
unya duna pay laing nagtinga
naningkamot nga dili maapil sa
ihap sa nangawala

unsa kaha no kon ato kining
pakisamahong usa lamang ka gabon
usa ka kaadlawon niana

nawala mibalik nawala pag-usab
sa iyang pagbalikbalik unya
naandan unya morag wala na lang

mahimo kaha kini?
matingala kaha ang terorista nganong
morag wala na lang kini kanato

mausob kaha ang iyang timplada
unya tungod lagi kay morag wala na man lang
dili na kaha kini niya buhaton?


ang iyang gipangayo man god mao man
nga unta kita malisang

unya wala man nato kini  gihatag kaniya.

alang kang J.

sa kadugay sa panahon
nangudlot ra gayod ang mga sanga sa akong
kahoy

usa na lang kagabii ang akong palabyon
mamulak na kini

laing semana antosan ko basin
mamunga na kini

laing mga adlaw ug mga gabii
idugang ko pa niini

giandam ko na ang tukmang adlaw
aron ang hinog ihatag ko na kanimo

kana kon mobalik ka pa.

tungod sa palami

nagpalami ko
nagpalami ka usab

sayong buntag
wala na gani kita
makalung-ag

nagpalami ka pa
nagawsan ka

ako wala
wala man goy nilung-ag...

lisod sabton

daghan pa unta
pagkadaghan pa unta

ang mga kato
ang mga lusa ang mga kuting
ang mga bonhok
ang mga kuyamad


pagkadaghan pa unta
walay sama
dili na matukib ang mga kalipay

pagkabaga pa unta
pagkalami pa unta  diha

sa mga pulong nga nalimtan
diha sa pag-irok sa pagbira sa
pagtangtang

apan wala nay panahon
miabot na ang adlaw
lamdag na ang kalibotan

lahi na man god ang makita
dinhi sa kahayag

babay na
 pauli na sa balay
pagtarong baya diha
 sa tumang
kahilom

tungod sa dengue ni marlon

ang sunoy nagpunay ug tugtugaok
gimingaw ni marlon

ang iro nga bulaw kanunay nga nag-atang
sa pultahan
gimingaw ni marlon

ang mga buwak wala nay bobo
nakalimtan na ug lawog ang baboy
ang salog wala na masilhigi
ang mga plato walay hugas
ang suga sa likod sa kusina wala na mapalong

nangita ni marlon....

pagbalik sa kaugalingon human sa kaulag

ginahandom pa gihapon 
ang pag-abot sa kasumo

gipangita ang pultahan
sa kagawasan

paingon sa sulod sa 
kaligdong nga ug kon

mahimo dili  na mobalik
sa langob nga gigikanan

hapit na hapit na ang
tutok nga walay gana

moabot na ang kahilom
ang tiunay nga kalipay

mahimo na nga ikaw ikaw
bisag walay nakaila

ang mga wala matuman....

kon balikan mo pagbasa ang
nahisulat
tungod kay kini gisulat man
sa kasingkasing
manumbalik ang tanan 

diha sa silaba ang larawan
sa ngabil
sa usa ka pulong ang nawong
sa gihigugma
unya kon mopadayon ka pa
sa garay sa mga pulong 
hinayhinaya lang kay didto
sa tumoy, sa katapusang
ginhawa nimo 
madungog ang agulo sa mga
wala matuman....

hinuklog 101

didto sa nataran
atua gikulinitan sa
mga pulang hulmigas
ang patay nga
tiki nga sa matag
hapon mohalok
sa yuta

naglingkod ko sa
bato naghinuktok kabahin
ning butanga nga

ang moampo diay
sa kadugayan 
mamatay unya ang
patay nga lawas niini
gikaon sa kadaghanan

ambot unsay akong
nakaon nga ako mang
gisalbar ang patay nga
lawas sa tiki

samtang ang mga hulmigas
mihangad kanako sa
tumang kalabot nganong

giinitan pa gayod ang
ilang ginagmayng kalipay....

amping kanunay

kitang tanan
naghandom nianang
kabag-ohan

kanang mas maayo
mas molungtad
mas nindot mas limpyo
mas mabungahon

maong sa matag panamin
nato kuyugan kini sa pangagho
sa mga unta

samin sa banyo
sa terrasa sa kilid sa pultahan
apil pa gani sa bodega

hangtod karon sa 
imong pag-amping
sa pagpailob
walay bisan usa ka samin
ang nabuak

bisan gani sa milabay
nga linog
sa milabay nga away
sa milabay nga tumang
kasuko
pati na ang di masukod
mong kahiubos

apan....

kristal kaayo ang tubig
makita ang asul nga isda
sa kilid sa mga corrals
lunhaw pa ang mga lato

pagkabugnaw sa tubig
pagkalimpyo sa baybayon
pagkaanindot sa mga panganod
pagkahayahay sa kinabuhi

apan kalit nga natunok ako
sa tuyom...

kusog ang ulan
himamaton ko na usab
ang mga dili ko
na madungog

ganahan ko nga
mawala pag-usab sa
tungatunga sa
kasikas
sa atop nga gidagandaganan
sa mga lusok sa ulan
kuyog kini sa sayaw
sa nanghagit  nga
hangin

miabot na ang orkestra
sa tubig ug hangin
ako ang namati
milantaw sa mga panganod
nga nagpakahilom lamang
sa mga dahon sa kahoy
nga nangahulog
paingon sa yuta aron 
dakpon na usab kini
sa ilang pagkadugta

ang mga awit sa
tamsi
morag kahayag

milapos kini
sa samin nakong
mga pagbati

ug sulod sa akong
dughan
ang tanang kaugatan
mikundat sa
usa ka
sayaw....

daghan ra kaayo
labaw pas mga balas

labaw pas
mga abog nga gustong
maghimog
palasyong
panganod

kon gusto ka nga
mohikap kanako
sulayi

ayaw ang bato o
ang dahon
ayaw ang punyal o
ang dyamante

kanang ikaw ra
kadtong kagahapon
moagi ka sa 
salaan sama sa kahayag

molapos ka sa akong
kasingkasing
sama sa usa ka nindot
nga 
panumduman

makigdula tang
duha sa
atong mga
kaniadto

mora tag mga
bata nga ang mga katawa
miabot
sa langit

pisik-pisik sa tubig
lapok-lapok sa aping
ambak-ambak
sa labat
lukso-lukso sa bato
landing sa
suba nga kusog ang
sulog
sa atong mga 
pagbati

makalibog nganong
usahay mas nindot man
ang mga
nanglabay

ngano ba nga ang mga
hagbay nang patay
mas buhi man hinoon?

ngano ba nga mahikap
pa man ang
wala na? 

ang mga saad nga
wala matuman ngano ba
nga kini
balik-balikan man?

mas gamhanan ba kaha
ang mga kasakit kaysa
sa kalipay?

kining
puting iring sa akong kiliran
sa kanunay
nanguhit sa akong bukton
unya hait baya
ang iyang mga kuko....

unya sa akong pamati
hugaw sab ang iyang
dila....

kusog
mamaak ang
gabi nimong
tinunoan

kagabii
wa ko
katulog 

gikalipay ko
ang mga
butang nga
walay
timailhan

dili sama sa
gabi
nga dunay
gilukatan

angayan unta ako nga masina sa nahitabo kanimo.
dugay  ang mga katuigan nga wala na kita magkita.
karon mora kag punoan sa mangga nga durong pamunga.
kon hanginon ka man ugaling ang mga hinog diha kanimo ang mangahulog.
ang mga bata nag-ilog sa kalipay kay ang ilang mga dughan puno man.

apan wala ako masina kay daghan baya usab akog grasya nga nadawat gikan Kaniya.
ang kahayag, ang ulan, ang mga panganod, ang dagat, ang mga lapyahan.
ang mga atabay, ang suba, ang bukana. 
ang mga sapa nga gilangoyan sa mga isda.
ang mga kalubian nga nanghitik usab sa bunga.
ang basakan nga gibug-atan sa ilang mga anihonon.

lahi ang atong mga agianan.
ania ako sa wala, misutoy ka ngadto sa too.
mas malipayon ako sa akong kasagbotan.
sa akong mga sanggotan. 
ako ug ako lamang.

bongbong sa pikas
bongbong
ang atong mga pagbati
duha ka tag-as nga
mga haligi
nga kinahanglang dili
magtupad
aron dili matumba kining
balayan tang
pati.

mihangad kita sa langit
aron makita ang mga tubag

sa atong kagabhion sa
atong mga kamingaw

nakita nato ang mga bitoon
nagagilakgilak

di nato matugkad ang tumang
kalay-on sa kangitngit

nabati nato ang tubag 
diri sa atong kagamay

mga abog nga napalid
hangin nga naglahoslahos